އޮކްސިޖަން ނުލިބިގެން މީހަކު މަރުވިކަމަށް ބުނާ މައްސަލަ ބަލަން ފަށައިފި

ކިނބިދޫގެ ދުވަސްވީ އަންހެނަކު ފަރުވާއަށް މާލެ ގެނައުމަށް ތ. ތިމަރަފުށީ އެއާޕޯޓަށް ގެންދިއުމަށް ބޭނުންކުރި އެމްބިއުލާންސްގައި އޮކްސިޖަން ނެތިގެން އެމީހާ މަރުވިކަމަށް ބުނާ މައްސަލައެއް ހެލްތު މިނިސްޓްރީން ތަހުގީގުކުރަން ފަށައިފި އެވެ.

މައުލޫމާތު ލިބިފައިވާ ގޮތުގައި އެ އަންހެން މީހާ އެންމެ ފުރަތަމަ ވޭމަންޑޫ ހޮސްޕިޓަލަށް ގެންދިއުމުން، އިތުރު ފަރުވާއަށް މާލެ ގެންދިއުމަށް އެންގި އެވެ. އެހެންވެ، އެއާ އެމްބިއުލާންގައި މާލެ ގެނައުމަށް ވޭމަންޑޫއިން ތިމަރަފުއްޓަށް ފޮނުވާލީ އެވެ.

އެ އާއިލާ މީހަކު ސޯޝަލް މީޑިއާގައި ބުނެފައިވާ ގޮތުގައި، އެ އަންހެން މީހާ އިއްޔެ މަރުވީ ސިއްހީ އިހުމާލަކުންނެވެ.

އެ އަންހެން މީހާ ވޭމަންޑޫގައި އެޑްމިޓުކޮށްފައި އޮތުމަށްފަހު ސީ އެމްބިއުލާންސްގައި ތިމަރަފުއްޓަށް ގެންދިޔައީ ވެސް އޮކްސިޖަން ގުޅައިގެން ކަމަށާއި، ނަމަވެސް އޮކްސިޖަން ބަދަލުކުރަން ބެލިއިރު، ތިމަރަފުށި އެއާޕޯޓަށް ގެންދިއުމަށް ބޭނުންކުރި އެރަށު އެމްބިއުލާންސްގެ އޮކްސިޖަން ފުޅި ހުރީ ހުސްވެފައި ކަމަށް އޭނާ ބުނެފައިވެ އެވެ.

މިއަދު ވަކިވެގެން އެދިޔައީ ގާތްތިމާގެ ދައްތައެއް.
ނަމަވެސް އެންމެ ދެރަވަނީ ނޭވާލުމުގެ މައްސަލައެއް ދިމާވެގެން އެމަޖެންސީކޮށް އެއަރއެމްބިއުލާސަށް ތ.އަތޮޅު ހޮސްޕިޓަލުން ވޭމަންޑޫއިން އުފުލީ ތިމަރަފުށިން ލޭންޑް އެމްބިއުލާންސްގަ ހުރީ ހުސްފިޅިއެއް.
ކޮންމެ… pic.twitter.com/jefnNmRjyw

— Ibrahim Latheef (@ibrahimlatheef) April 27, 2024

އެ މައްސަލަ ތަހުގީގުކުރުމަށް ތިމަރަފުއްޓަށް ޓީމެއް ގޮސްފައިވާ ކަމަށް މައުލޫމާތު ލިބެ އެވެ. އަދި އެ މައްސަލަ އިތުރަށް ބަލަމުން އަންނަ ކަމަށް ހެލްތު މިނިސޓްރީން ވެސް ވަނީ ބުނެފަ އެވެ.