ސަރުކާރުގެ ކުންފުނިތަކަށް ބޮޑެތި އަދަދުތަކުން ފައިސާ ދައްކަންޖެހިފައިވާ އެއްވެސް ކުންފުންޏަކަށް ސަރުކާރުގެ އިތުރު މަޝްރޫޢުތައް ހަވާލުނުކުރުމަށް އެންގުމަށް ރައްޔިތުންގެ މަޖިލީހުގެ މާލިއްޔަތު ކޮމިޓީން މިއަދު ފާސްކޮށްފިއެވެ.
މި ނިންމުން ނިންމާފައިވަނީ ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އަށް އެކި ކުންފުނިތަކުން 1.4 ބިލިއަން ރުފިޔާ ދައްކަންޖެހި، އެ ފައިސާ ނުދައްކާ އޮތް މައްސަލައާ ގުޅިގެން ކޮމިޓީން ތައްޔާރުކުރި ރިޕޯޓުގައެވެ. މި ރިޕޯޓުގައި މިފަދަ ކަންކަން ތަކުރާރުވިޔަ ނުދިނުމަށް ހުށަހެޅުންތައް ހިމަނާފައިވެއެވެ.
މި މައްސަލައިގައި ރައްޔިތުންގެ މަޖިލީހުގެ ނައިބު ރައީސް، ދިއްގަރު ދާއިރާގެ މެންބަރު އަޙްމަދު ނާޒިމް ވިދާޅުވީ ނަސަންދުރަ ތަރައްގީކުރި ކުންފުނި އެންޕީއެޗްއިން ހުޅުމާލޭގައި ހެދި އަކުއާ ވިޓާ ފްލެޓްތަކުގެ ބިމުކުލި ނުދައްކާ އޮތުމާއެކު، އެ ފައިސާ ދެއްކުމާމެދު އެއްބަސްވުމަކަށް އާދެވެންދެން ނަސަންދުރަ ހިންގުމުގެ ހުއްދަ ދިނުމަކީ ރަނގަޅުކަމެއް ނޫން ކަމަށެވެ.
އެންޕީއެޗްއިން އެޗްޑީސީއަށް ދައްކަންޖެހޭ ފައިސާއާއި ޖޫރިމަނާގެ ގޮތުގައި މިހާރު 244 މިލިއަން ރުފިޔާ އަރާފައިވާކަން ވެސް އޭނާ ފާހަގަކުރެއްވިއެވެ.
މި މުހިންމު ހުށަހެޅުން ކޮމިޓީއަށް ހުށަހެޅުއްވީ ފުނަދޫ ދާއިރާގެ މެންބަރު މުޙައްމަދު މަމްދޫޙެވެ. އެ ހުށަހެޅުމަށް ތާއީދުކުރެއްވީ ބާރަށު ދާއިރާގެ މެންބަރު އިބްރާހިމް ސުޖާޢުއެވެ. މި ނިންމުން ވަނީ ކޮމިޓީއަށް ހާޒިރުވި ހުރިހާ މެންބަރުންގެ އަޣުލަބިއްޔަތުން ފާސްކޮށްފައެވެ.
ސަރުކާރުގެ ކުންފުނިތަކަށް ބޮޑެތި އަދަދުތަކުން ފައިސާ ދައްކަންޖެހިފައިވާ އެއްވެސް ކުންފުންޏަކަށް ސަރުކާރުގެ އިތުރު މަޝްރޫޢުތައް ހަވާލުނުކުރުމަށް އަންގަން ކޮމެޓީން ފާސްކޮށްފައިވާއިރު އަމިއްލަ ކުންފުނިތަކުން، ސަރުކާރަށް ފައިސާ ދައްކާއިރު ސަރުކާރުން އެ ކުންފުނިތަކަށް ދައްކަން ހުރި ފައިސާ ކެނޑުމަށް ފަހު ފައިސާ ދެއްކޭނޭ އިންތިޒާމެއް ހަމަޖެއްސުމަށް ލަފާދިނުމަށް ވެސް އެ ކޮމެޓީން ވަނީ ނިންމާފައެވެ.
އެލައިޑް ހެލްތު ދާއިރާއިން 1،500 ދިވެހިން ތަމްރީނު ކުރަނީ
އިމާމުން، މުޖުތަމަޢުއަށް ނަމޫނާ ބަޔަކަށް ވުމަކީ މުހިއްމުކަމެއް: ޑރ. ޞަލާޙުލް ބުދައިރު
އިސްތަންބޫލަށް ބާރުގަދަ ބިންހެލުމެއް އަތުވެއްޖެ
ޝަމްއާން ބަންދުކުރީ ހެކިންނާއި ރައްޓެހިކަމެއް އޮންނާތީ ކަމަށް ބުނެ - ވަކީލް
