ފިޠުރު ޢީދު ދުވަސް ކުލަގަދަކޮށް ފާހަގަކުރުމުގެ ގޮތުން ސަރުކާރުން އިންތިޒާމްކޮށްގެން ބާއްވާ "ޢީދު ހަވީރު"ގައި އެމްޓީސީސީއިން "އެމްޓީސީސީ އީދު ކޯޑީ" ގެ ނަމުގައި ހާއްސަ ސްޓޯލެއް ބަހައްޓައި، ހާއްސަ ހަރަކާތްތަކެއް ކުރިއަށް ގެންދިއުމަށް ހަމަޖެހިފައިވާކަމަށް އެކުންފުނިން ބުނެފިއެވެ.
އެމްޓީސީސީން ބުނިގޮތުގައި މި ސްޓޯލަކީ ދިވެހި ސަގާފީ ތީމަކަށް ފަރުމާކުރެވިފައިވާ، އެވޭލާ ޒަމާނުއްސުރެ ދިވެހިން ޢީދު ފާހަގަކުރުމަށް ކުރަމުން އައި ބައެއް ކަންކަމުގެ މައްޗަށް ބިނާކޮށް ހަދާފައިވާ ސްޓޯލެކެވެ. މި ސްޓޯލުގައި ކުރިއަށްގެންދާ ހަރަކާތްތަކުގެ ތެރޭގައި ކޯޑި، ބޮޑުމަސް އަދި ކުޑަކުދިންނަށް ފަނުން ކުޅޭ އެއްޗެހި ވިޔަން ދަސްކޮށްދިނުން ހިމެނޭހެން ޖުމުލަ ފަސް ހަކަރާތެއް ކުރިއަށް ގެންދިއުމަށް ވަނީ ހަމަޖެހިފައެވެ.
އެމްޓީސީސީ ބުނިގޮތުގައި ޢީދު ހަވީރުގައި އެމްޓީސީސީގެ ސްޓޯލުގެ އެންމެހައި ހަރަކާތްތަކުގައި ހަރަކާތްތެރިވާނީ ކުންފުނީގެ މުވައްޒަފުންނެވެ. މި ހަވީރު އޮންނާނީ ފިޠުރު ޢީދު ދުވަހުގެ ހަވީރު 4:00 އިން 6:00 އަށް ޖުމްހޫރީ މައިދާނުގައެވެ. އެމްޓީސީސީގެ ސްޓޯލް ބަހައްޓާފައި ހުންނާނީ އިއްޒުއްދީން ފާލަމާއި އެމްއެމްއޭ އާ ދެމެދު އޮންނަ ސަރަހައްދުގައެވެ.
