ގާތްތިމާގެ މީހުން ތިބާއާ ގުޅުން ނުބޭއްވިޔަސް، ތިބާ އެމީހުންނާ ދުރަށް ނުދާށެވެ: ޚުތުބާ

ގާތްތިމާގެ މީހުން ތިބާއާ ގުޅުން ނުބޭއްވިޔަސް، ތިބާ އެމީހުންނާ ދުރަށް ނުދިއުމަށް މިއަދު ޢީދު ޚުތުބާގައި ބުނެފިއެވެ.

ފިޠުރު ޢީދު ދުވަހުގެ ޚުޠުބާގައި ބުނެފައިވާގޮތުގައި އިސްލާމީ ޢީދުތަކަކީ މާތްﷲ ޝަރުޢުކުރައްވާފައިވާ މުހިންމު އަޅުކަމެކެވެ. އެގޮތުން ޖާހިލީ ޒަމާނުގައި ފާހަގަކުރި ޢީދުތައް ކީރިތި ރަސޫލާ ﷺ އުވައިލައްވައި، އިސްލާމީ ދެ ޢީދު ފާހަގަކުރުމަށް އެންގެވިކަމަށާއި ފިޠުރު ޢީދަކީ މާތްﷲ ފަރުޟުކުރެއްވި ރޯދަ އަދާކުރެވުނީތީ، އެކަމަށް ޝުކުރުކޮށް، ފިޠުރު ޒަކާތް ނެރޭ ދުވަސްކަމަށް ޚުތުބާގައި ބުނެފައިވެއެވެ.

އަދި އިސްލާމީ ޢީދުތަކުގެ ފެށުމަކީ މާތްﷲއަށް ޝުކުރު ދެންނެވުމަށްޓަކައި އަދާކުރެވޭ ޢީދު ނަމާދުގެ ޖަމާޢަތްކަމަށާއި މި މުހިންމު އެއްވުމުގެ ސަބަބުން އެއްބަޔަކު އަނެއްބަޔަކާ ބައްދަލުވެ، ސަލާމްގަލާންކޮށް، ހެޔޮ އެދުމާއި ތަހުނިޔާ ބަދަލުކުރުމުގެ ފުރުޞަތު ލިބެއެވެ. މިއީ އިސްލާމީ އުޚުއްވަތްތެރިކަމާއި ގާތްތިމާގެކަމުގެ ޝުޢޫރުތައް ފާޅުކުރެވޭ މުހިންމު ދުވަހެއްކަމަށްވެސް ޢީދު ޚުތުބާގައި ބުނެފައިވެއެވެ.

ޚުތުބާގައި އިތުރަށް ބުނެފައިވަނީ އިސްލާމީ ޢީދުތަކަކީ އޭގެ އުފަލުގައި އެންމެން ބައިވެރިކުރުވަންޖެހޭ އިޙްތިފާލުތަކެއްކަމަށާއި ތަނަވަސްކަމުގެ އަހުލުވެރިން، އެ ދުވަހުގައި އުފާފާޅުކުރަންވީ ފަޤީރުންނަށާއި މިސްކީނުންނަށް ހެޔޮ ފޯރުކޮށްދީ، ޢީދުގެ އުފަލުގައި އެ މީހުން ވެސް ބައިވެރިކޮށްގެންކަމަށެވެ. އަދި ފިޠުރު ޢީދު ދުވަހު، ޢީދު ނަމާދުގެ ކުރިން ފިޠުރު ޒަކާތް ނެރުމަށް އަންގަވާފައިވަނީ، އޭގެ ސަބަބުން ފަޤީރުންނަށް ޢީދުގެ އުފަލުގައި ބައިވެރިވުމުގެ ތަނަވަސްކަން ލިބޭނެތީކަމަށްވެސް ޢީދު ޚުތުބާގައި ބުނެފައިވެއެވެ.

މީގެއިތުރުން މި މުނާސަބަތުގައި ހަނދާންކުރަންޖެހޭ އެންމެ މުހިންމު އެއްކަމަކީ، މި ބަރަކާތްތެރި ޖަމާޢަތަށް އަހަރެމެން ޙާޟިރުކުރުވީ މާތްވެގެންވާ އިސްލާމްދީންކަންކަމަށާއި އަދި ރަޙިމުގެ ގުޅުން ދެމެހެއްޓުމަށްޓަކައި ގާތްތިމާގެ މީހުންނަށް ޒިޔާރަތްކޮށް، ޢީދުގެ ތަހުނިޔާއާއި ހެޔޮ އެދުންތައް ފޮނުވުމަކީ މުހިންމުކަމެއްކަމަށްވެސް ޚުތުބާގައި ބުނެފައިވެއެވެ.

"ރަޙިމުގެ ގުޅުން ދެމެހެއްޓުމަކީ މައިންބަފައިންގެ ޙައްޤުތަކާ ގުޅިފައިވާ ކަމެކެވެ. މިއަދު ގާތްތިމާގެ މީހުންނަށް ޒިޔާރަތްކޮށް ހެޔޮފޯރުވާށެވެ! ޢީދުގެ ތަހުނިޔާއާއި ހެޔޮ އެދުންތައް ފޮނުވާށެވެ! އަދުގެ ދުނިޔޭގައި މިއީ ވަރަށް ފަސޭހަ ކަމެކެވެ. އެކަމަށް ހޭދަކުރާން ޖެހޭނީ ކުޑަ ހިނދުކޮޅެކެވެ. އެ މީހުން ތިބާއާ ގުޅުން ނުބޭއްވިޔަސް، ތިބާ އެމީހުންނާ ދުރަށް ނުދާށެވެ!" ޢީދު ޚުތުބާގައި ބުނެފައިވެއެވެ.