އެމެރިކާ މީހަކު ވެލާނާ އެއާޕޯޓުގައި މާރާމާރީ ހިންގައިފި

އެމެރިކާއަށް ނިސްބަތްވާ ފިރިހެނަކު، ވެލާނާ އިންޓަނޭޝަނަލް އެއާޕޯޓުގެ މުވައްޒަފުންތަކެއްގެ ގައިގައި ތަޅައި މަރާމާރީ ހިންގައިފި އެވެ.

ފުލުހުން ބުނީ މިއަދު ހެނދުނުގެ ވަގުތެއްގައި ވެލާނާ އެއާޕޯޓުގައި މާރާމާރީ ހިންގި ކަމަށް ތުހުމަތު ކުރެވޭ ބިދޭސީ ފިރިހެން މީހާ މިހާރު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ.

ސޯޝަލް މީޑިއާގައި ދައުރުވަމުންދާ ވީޑިއޯއިން ފެންނަނީ އެ ބިދޭސީ މީހާ އެއާޕޯޓު މުވައްޒަފަކާ ދެބަސްވުމަށްފަހު އޭނާގެ ގައިގައި ބާރަށް ގޮށްމުށުން ޖަހާ މަންޒަރެވެ. އެެހެން ކަންތައް ކުރުމުން އިތުރު މުވައްޒަފަކު އެ ބިދޭސީ މީހާ ކޮއްޕާލުމުން އޭނާގެ ގައިގައި ވެސް ޖަހާ މަންޒަރު ވީޑިއޯއިން ފެނެ އެވެ.

އެމީހާއާއި މުވައްޒަފުންނާ ދެމެދު ޖެހުނީ ކޮން މައްސަލައެއް ކަމެއް ސާފެއް ނޫނެވެ. އެ މައްސަލަ އިތުރަށް ތަހުގީގު ކުރަމުން އަންނަ ކަމަށް ފުލުހުން ބުނެ އެވެ.