ރާއްޖޭގައި ހުންނަ އެމްބަސީ ބަންދުކުރަން ޓްރަމްޕު ވިސްނަނީ

އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން ސްޓޭޓް ޑިޕާޓްމަންޓުގެ ޚަރަދުތައް 50 އިންސައްތައަށް ކުޑަކުރުމުގެ މަސައްކަތުގެ ތެރެއިން، ރާއްޖޭގައި ހުންނަ އެމެރިކާ އެމްބަސީ ހިމެނޭ ގޮތަށް 30 މިޝަނެއް ބަންދުކުރުމަށް ވިސްނަމުންދާ ކަމަށް ހާމަވެއްޖެއެވެ.

ރޮއިޓާސް އިން ހާމަކުރި ގޮތުގައި، އޮކްޓޫބަރު 1، 2026 ގައި ފެށޭ މާލީ އަހަރަށް ސްޓޭޓް ޑިޕާޓްމަންޓުގެ ބަޖެޓުން 30 ބިލިއަން ޑޮލަރު ކުޑަކުރުމަށް ވައިޓް ހައުސްގެ އޮފީސް އޮފް މެނޭޖްމަންޓް އެންޑް ބަޖެޓް (އޯއެމްބީ) އިން ވަނީ ނިންމާފައެވެ. މިގޮތުން ސްޓޭޓް ޑިޕާޓްމަންޓުގެ ބަޖެޓް 54.4 ބިލިއަން ޑޮލަރުން 28.4 ބިލިއަން ޑޮލަރަށް ކުޑަކުރުމަށް ވަނީ ހުށަހަޅާފައެވެ.

ރޮއިސްޓާއިން ހާމަކުރިގޮތުގައި ރާއްޖޭގައި ހުންނަ އެމެރިކާ އެމްބަސީގެ އިތުރުން ބަންދުކުރުމަށް ހުށަހަޅާފައިވާ އެހެން އެމްބަސީތަކުގެ ތެރޭގައި އެރިޓްރިއާ، ގްރެނާޑާ، ލެސޯތޯ، ސެންޓްރަލް އެފްރިކަން ރިޕަބްލިކް، ލަގްޒެމްބާގް، ރިޕަބްލިކް އޮފް ދަ ކޮންގޯ، ގެމްބިއާ، ސައުތު ސޫދާން އަދި މޯލްޓާ ހިމެނެއެވެ.

ރާއްޖޭގައި ހުންނަ އެމެރިކާ އެމްބަސީ ބަންދުކުރަން މަޝްވަރާކުރާކަން ހާމަވެފައިވާއިރު މިހާރު ހުޅުމާލޭގައި ހިންގަމުންދާ އެމެރިކާ އެމްބަސީއަށް ދާއިމީ އިމާރާތެއް އެޅުމަށް ހުޅުމާލެއިން ބިމެއް ވެސް ވަނީ ހަމަޖައްސާފައެވެ. އެމްބަސީ ހުޅުވުމުގެ ކުރިން ރާއްޖޭގެ ކަންކަން ބަލަހައްޓަމުން ދިޔައީ ސްރީ ލަންކާގައި ހުންނަ އެމެރިކާ އެމްބަސީ މެދުވެރިކޮށެވެ.

އެމްބަސީތައް ބަންދުކުރުމުގެ އިތުރުން ޔޫއެސްއެއިޑް ބަންދުކޮށް، ބޭރުގެ އެހީގެ ޕްރޮގްރާމްތައް 38.3 ބިލިއަން ޑޮލަރުން 16.9 ބިލިއަން ޑޮލަރަށް ކުޑަކުރުމަށް ވެސް އޯއެމްބީން ވަނީ ހުށަހަޅާފައެވެ. ނަމަވެސް މި ނިންމުންތަކަށް ބަދަލު އައުމުގެ ފުރުސަތު އޮތް ކަމަށާއި، ކޮންގްރެސްގެ ރުހުން ހޯދުމުގެ ކުރިން ފައިނަލް ވާޝަނަށް ބަދަލު އަތުވެދާނެ ކަމަށް ރޮއިޓާސް އިން ވަނީ ފާހަގަކޮށްފައެވެ.