ދެމަފިރިއަކު ފިހުނު މައްސަލަ ފުލުހުން ތަހުގީގުކުރަނީ

ރޭ އއ. ރަސްދޫގައި ހިނގި އަލިފާނުގެ ހާދިސާގައި ދެމަފިރިއަކު ފިހުނު މައްސަލަ ފުލުހުން ތަހުގީގުކުރަން ފަށައިފިއެވެ.

ފުލުހުން ބުނީ ރޭ 11:15 ހާއިރު ރަސްދޫ ގެޔެއްގައި އަލިފާން ރޯވި މައްސަލަ އެ އިދާރާއަށް ރިޕޯޓުކޮށްފައިވާކަމަށެވެ.

މި ހާދިސާގައި އެގޭގައި ދިރިއުޅޭ ދެ މީހަކު ޒަޚަމްވެގެން ފަރުވާ ދިނުމަށްޓަކައި މާލެއަށް ގެންގޮސްފައިވާކަން ފާހަގަކޮށް ފުލުހުން ބުނީ މި މައްސަލަ އެ އިދާރާއިނ ތަހުގީގުކުރަމުންދާކަމަށެވެ.

މި މައްސަލަ ތަހުގީގުކުރަމުންދާކަމަށް ބުނި ނަމަވެސް މައްސަލައިގެ ތަފްސީލު ފުލުހުން ނުދެއެވެ.

މަންޒަރުދުއް މީހަކު "ދިޔަރެސް"އަށް ކިޔައިދިން ގޮތުގާ މި ހާދިސާގައި ބޮޑަށް ފިހިފައި ވަނީ އަންހެން މީހާ އެވެ. އޭނާގެ ހަށިގަނޑުގެ 90 އިންސައްތަ ވަރު ފިހިފައިވާކަމަށް އެފަރާތުން ބުނެފައިވެއެވެ.

'ދިޔަރެސް' އަށް މައުލޫމާތު ދެމުން އައިޖީއެމްއެޗްގެ މީޑިއާ އޮފިޝަލަކު ވިދާޅުވީ ފިހިގެން ހޮސްޕިޓަލަށް ގެނައީ އުމުރުން 31 އަހަރުގެ އަންހެނަކާއި ފިރިހެނެއް ކަމަށެވެ. އަދި އެ ދެމީހުންގެ ހާލު ވެސް ސީރިއަސް ކަމަށާއި، ދެމީހުން ވެސް މިހާރު ވެންޓިލޭޓަރަށް ލާފައިވާ ކަމަށް ވެސް ވިދާޅުވިއެވެ.