ނަތީޖާ އިއުލާންކުރާތާ 10 ދުވަސްތެރޭ ކެމްޕެއިން ޕޯސްޓަރުތައް ނަގަންޖެހޭނެ: ހަބީބް

ރައްޔިތުންގެ މަޖިލިސް އިންތިހާބުގެ ރަސްމީ ނަތީޖާ އިއުލާންކުރާތާ 10 ދުވަސްތެރޭ ކެމްޕެއިން ޕޯސްޓަރުތައް ނަގަންޖެހޭނެ ކަމަށް އިލެކްޝަންސް ކޮމިޝަން (އީސީ)ގެ ކުރީގެ ނައިބު ރައީސް އިސްމައީލް ހަބީބް ވިދާޅުވެއްޖެ އެވެ.

މިދިޔަ އާދިއްތަ ދުވަހު ބޭއްވި 20 ވަނަ މަޖިލިސް އިންތިހާބުގެ ރަސްމީ ނަތީޖާ އިލެކްޝަންސް އިން އިއުލާންކުރަން ފެށީ އިއްޔެ އެވެ.

ރޭ އެކްސްގައި ކުރެއްވި ޕޯސްޓެއްގައި ހަބީބް ވިދާޅުވީ އިންތިހާބުތަކާ ބެހޭ އާންމު ގަވާއިދުގެ 19 ވަނަ މާއްދާގައި ވާގޮތުން މަޖިލިސް އިންތިހާބުގެ ރަސްމީ ނަތީޖާ އިޢުލާންކުރާ ދުވަހުން ފެށިގެން 10 ދުވަހުގެ ތެރޭގައި ކެމްޕެއިން މެޓީރިއަލްސް ބެހެއްޓި ތަންތަނުން އެ ތަކެތި ނެގުމަކީ ކެންޑިޑޭޓުންނަށް ލާޒިމް ކަމެއް ކަމަށެވެ.

އިންތިޚާބުތަކާ ބެހޭ ޢާންމު ގަވާޢިދުގެ 19 ވަނަ މާއްދާގައިވާގޮތުން ރައްޔިތުންގެ މަޖިލީހުގެ އިންތިޚާބުގެ ރަސްމީ ނަތީޖާ އިޢުލާންކުރާ ދުވަހުން ފެށިގެން (މިއަދުން ފެށިގެން) 10 ދުވަހުގެ ތެރޭގައި ކެމްޕެއިން މެޓީރިއަލްސް ބެހެއްޓި ތަންތަން އެ ތަކެތި ނެގުމަކީ ކެންޑިޑޭޓުންނަށް ލާޒިމް ކަމެއް.…

— Ismail Habeeb (@IsmailHabeeb) April 25, 2024

ވިހިވަނަ މަޖިލީހުގެ 93 ދާއިރާއަށް މެންބަރުން އިންތިހާބުކުރުމަށް މިދިޔަ އާދިއްތަ ދުވަހު ބޭއްވި އިންތިހާބުގައި 368 ކެންޑިޑޭޓުން ވާދަކުރި އެވެ. އެ ކެންޑިޑޭޓުންގެ ކެމްޕެއިނަށް ރާއްޖޭގެ ހުރިހާ ސަރަހައްދެއްގައި ގިނަ އަދަދެއްގެ ޕޯސްޓަރުތަކާއި ބޯޑުތައް ހަރުކޮށްފައި އެބަހުއްޓެވެ.

މޫސުން ގޯސްވެ ވައިގަދަވާ ދުވަސްތަކުގައި ބޮޑެތި ކެމްޕެއިން ބޯޑުތައް ވެއްޓުމުގެ ހާދިސާތައް ވެސް މިދިޔަ ހަފްތާގައި ވަނީ ހިނގާފަ އެވެ.

ނިމިދިޔަ މަޖިލިސް އިންތިހާބުގައި ސަރުކާރު ހިންގާ މައި ޕާޓީ، ޕީއެންސީން ވަނީ މަޖިލީހުގެ ސުޕަ މެޖޯރިޓީ ނަގާފަ އެވެ. އެގޮތުން، ވިހިވަނަ މަޖިލީހުގައި ޕީއެންސީ ތަމްސީލުކުރާ 73 މެންބަރުން ތިބޭނެ އެވެ. އިދިކޮޅު މައި ޕާޓީ، އެމްޑީޕީއަށް ކާމިޔާބު ކުރެވުނީ މަޖިލީހުގެ 12 ގޮނޑި އެވެ.