މަކުނުދޫގައި މަރުވި މީހުންގެ ހަށިތައް އިންޑިއާއަށް ފޮނުވައިފި

ހދ.މަކުނުދޫގައި ގޭސް ސިލިންޑަރެއް ގޮވައިގެން ހިނގި ހާދިސާގައި މަރުވި ދެ މީހުންގެ ހަށިގަނޑު އެމީހުންގެ އާއިލާއާ ހަވާލުކުރުމަށް އިންޑިއާއަށް ފޮނުވާފައިވާ ކަމަށް ފުލުހުން މިއަދު ބުނެފިއެވެ.

ފާއިތުވި ހޮނިހިރުދުވަހުގެ ހާދިސާގައި މަރުވެފައިވަނީ އިންޑިއާއަށް ނިސްބަތްވާ އުމުރުން 27 އަހަރުގެ މުހައްމަދު ރާޖާ އަންސާރީއާއި އުމުރުން 25 އަހަރުގެ ސުދީރާ ސެތީއެވެ. މިހާދިސާގައި އެމީހުން ހަށިތައްވަނީ ވަރަށް ބޮޑަށް ހަލާކުވެފައެވެ.

އެމީހުންގެ ހަށިގަނޑުތައް މާލެއަށް ގެނެސް ބަލަންޖެހޭ ކަންކަން ބެލުމަށްފަހު އާއިލާއާ ހަށިގަނޑުތައް ހަވާލުކުރުމަށް އިންޑިއާއަށް ފޮނުވައިލާފައިވަނީ އިއްޔެކަމަށް ފުލުހުންގެ ޚިދުމަތުން މީޑިއާއަށް މައުލޫމާތު ދިނެވެ.

މި ހާދިސާ ހިނގިީ މަކުނުދޫގައި ނަރުދަމާގެ މަސައްކަތްކުރާ ސަރަހައްދުގައި ގޭސް އަޅާ ސިލިންޑަރެއް ގޮވައިގެންނެވެ. އެ ދެ މީހުންނަކީ މަކުނުދޫ އެއާޕޯޓުގެ މަސައްކަތްކުރާ ބިގް ފިޝް ކުންފުނީގެ ދެ މީހުންނެވެ.

ގޭސް ސިލިންޑަރު ގޮވުމަށް މެދުވެރި ސަބަބު ދެނެގަތުމަށް ފުލުހުންނާއި ޤައުމީ ދިފާއީ ބާރުން އަންނަނީ ތަހުގީގެއް ހިންގަމުންނެވެ.