ނުކުޅެދުންތެރިކަން ހުންނަ ކުދިންގެ ތެރަޕީއަށް ތިން މަހުން 25 މިލިއަށް ރުފިޔާ

އެންސްޕާ މެދުވެރިކޮށް ނުކުޅެެދުންތެރިކަން ހުންނަ މީހުންގެ ތެރަޕިއުޓިކް ފަރުވާއަށް މި އަހަރުގެ މާޗު މަހުގެ ނިޔަލަށް 25 މިލިއަން ރުފިޔާ ޚަރަދު ކޮށްފައިވާ ކަމަށް އެ އޭޖެންސީން ބުނެފިއެވެ.

އެ އޭޖެންސީން މިކަން ހާމަކޮށްފައިވަނީ ނުކުޅެދުންތެރިކަން ހުންނަ މީހުންގެ ދަފްތަރުގައި ރަޖިސްޓްރީވެފައިވާ ފަރާތްތަކުގެ ތެރެއިން ތެރެޕީ ޚިދުމަތް ބޭނުންވާ ކިތައް ފަރާތް އެންސްޕާގައި ރަޖިސްޓްރީ ކުރެވިފައި ވޭތޯއާއި އަދި އޭގެތެރެއިން ރާއްޖެއިން ބޭރުގައި ދިރިއުޅެނީ ކިތައް ފަރާތްކަން ހޯދުމަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެމްބަރު މުޙައްމަދު އިބްރާހީމް (ކުޑޫ) ކުރައްވައިފައިވާ ސުވާލުގެ ޖަވާބުގައެވެ.

އެންސްޕާއިން މަޖިލީހަށް ފޮނުވާފައިވާ ސިޓީގައި ބުނެފައިވަނީ ނުކުޅެދުންތެރިކަން ހުންނަ މީހުންގެ ދަފްތަރުގައި ރަޖިސްޓްރީވެފައިވާ ފަރާތްތަކުގެ ތެރެއިން ތެރަޕިއުޓިކް ފަރުވާއަށް ޚަރަދު ހަމަޖައްސައިދިނުމުގެ ޕްރޮގްރާމް މެދުވެރިކޮށް 675 ފަރާތަކަށް އެހީ ހަމަޖައްސައިދީފައިވާ ކަމަށެވެ.

މި ޕްރޮގްރާމު މެދުވެރިކޮށް 18 އަހަރުން ދަށުގެ 652 ކުދިންނަށް އެހީ ހަމަޖައްސައިދީފައިވެއެވެ. އެއީ ޖުމްލަ 24.8 މިލިއަން ރުފިޔާއެވެ. އޭގެތެރެއިން ރާއްޖެއިން ބޭރުގައި ހިމެނޭ 30 ކުދިން ހިމެނޭއިރު، އެ ކުދިންނަށް 1.2 މިލިއަން ރުފިޔާ ހޭދަކޮށްފައިވެއެވެ.

މި އަހަރުގެ މާޗު މަހުގެ ނިޔަލަށް އެ ފަރާތްތަކަށް ޖުމްލަ 25.4 މިލިއަން ރުފިޔާ ހޭދަކޮށްފައިވާ ކަމަށް އެންސްޕާއިން ވަނީ ބުނެފައެވެ.

މީގެއިތުރުން ނުކުޅެދުންތެރިކަން ހުންނަ ކުދީންގެ ތެރެޕިއުޓިކް ފަރުވާއަށް މިދިޔަ އަހަރު 96.7 މިލިއަން ރުފިޔާ ޚަރަދުކޮށްފައިވެއެވެ. އެގޮތުން، މި ޕްރޮގްރާމް މެދުވެރިކޮށް މިދިޔަ އަހަރު 1،087 މީހަކަށް ޖުމްލަ 96.7 މިލިއަން ރުފިޔާ ހޭދަކޮށްފައިވެއެވެ.

ހެލްތު މިނިސްޓަރު އަބްދުﷲ ނާޒިމް ވަނީ ފާއިތުވި ހަފްތާ ޚާއްސަ އެހީއަށް ބޭނުންވާ ކުދިންގެ ބެލެނިވެރިންނާ ބައްދަލުކުރައްވައި އެ މީހުންގެ ކަންބޮޑުވުންތައް އަޑުއައްސަވައިފައެވެ. މި ބައްދަލުވުމުގައި ޚާއްސަ އެހީއަށް ބޭނުންވާ ކުދިންގެ ބެލެނިވެރިންގެ ފަރާތުން ވަނީ އެ ކުދިންނަށް ދެމުންދާ ތެރަޕީތަކާއި ސިއްހީ ހިދުމަތްތައް ހޯދުމުގައި ހުރި ގޮންޖެހުންތަކާ ބެހޭ ގޮތުން މަޝްވަރާކޮށްފައެވެ. މީގެ އިތުރުން އެކުދިންނަަށް ފަރުވާ ހޯދުމުގެ ކަންކަމުގައި ކުރިއެރުން ހޯދުމަށް ހުރި ފުރުސަތުތަކާ ބެހޭ ގޮތުން ވެސް މަޝްވަރާކޮށްފައިވެއެވެ.
މިނިސްޓަރު ވަނީ ބެލެނިވެރިންގެ ކަންބޮޑުވުން އަޑު އައްސަވާ އެކަމަށް ހައްލު ހޯދުމަށް ކުރަމުންދާ މަސައްކަތާއި ކުރެވެން ހުރި ކަންކަން ހިއްސާކޮށްފައެވެ.