ހީނާ އެމްޑީޕީއަށް: އެމްޑީޕީގެ ލީޑާޝިޕް ކޮމްޕްރޮމައިޒްވާ ފަދަ މައުލޫމާތުތަކެއް އަލީ ވަހީދުގެ އަތުގައި ހުރީތޯ؟
ގިނަ އަދަދެއްގެ އަންހެނުންނަށް ޖިންސީ ފުރައްސާރަކުރުމުގެ ތުހުމަތުވެފައިވާ ކުރީގެ ޓުއަރިޒަމް މިނިސްޓަރު އަލީ ވަހީދުގެ ފަރާތުން އަނިޔާ ލިބުނު އަންހެނުން ފުލުހުންގެ ތަހުގީގަށް ދިން ބަޔާންތައް އާންމުވުމުން އެމްޑީޕީގެ ލީޑާޝިޕުން އެކަމުގައި އެއްވެސް ބަހެއް ނުބުނަނީ އެޕާޓީގެ ލީޑާޝިޕު "ކޮމްޕްރޮމައިޒްވާނެ"ފަދަ އެއްޗެހިތަކެއް ނުވަތަ މައުލޫމާތުތަކެއް އަލީގެ އަތުގައި ހުރުމުގެ ސަބަބުންތޯ ސަރުކާރު ހިންގާ ކޮންގުރެސް ކޯލިޝަނުގެ ތަރުޖަމާން ހީނާ ވަލީދު ސުވާލުކުރައްވައިފިއެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ހީނާވަނީ އަލީ ވަހީދުގެ މައްސަލާގައި ކަންކަން ހިނގައިދިޔަ ގޮތުގެ މައްޗަށް އަލިއަޅުއްވާލައްވާފައެވެ. އެގޮތުން އަލީގެ ފަރާތުން ޖިންސީ އަނިޔާއާއި ފުރައްސާރަ ކުރިމަތިވި އަންހެނުން، އެއިރުގެ ޖެންޑާ މިނިސްޓަރުގެ އެދިވަޑައިގަތުމަށް ކުރީގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާ ބައްދަލުކުރައްވައި އަލީގެ ފަރާތުން އެމީހުންނަށް ކުރިމަތިވި ކަންކަމުގެ ތަފުސީލުތައް އެމަނިކުފާނާ ހިއްސާކުރިކަން ހީނާ ފާހަގަކުރެއްވިއެވެ. އޭނާ އިތުރަށް ފާހަގަކުރެއްވީ އެ ވާހަކަފުޅުތައް އަޑުއެއްސެވުމަށްފަހު ރައީސް އިބްރާހީމު ވަރަށް ބޮޑަށް ކީރިތިކުރެއްވި ވާހަކަ އެއިރު ނޫސްތަކުން ރިޕޯޓުކުރި ކަމެވެ.
"ޖިންސީ ގޯނާގެ މައްސަލާގައި އެއިރުގެ ޖެންޑާ މިނިސްޓާ ވިކްޓިމްސް ގޮވައިގެން ރައީސުލްޖުމްހޫރިއްޔާގެ އަރިހަށް ވަޑައިގެންނެވި. އަދި ވިކްޓިމްސްގެ ވާހަކަތައް އަހާފައި ރައީސުލްޖުމްހޫރިއްޔާ ވަރަށް ބޮޑަށް ކީރިތިކުރެއްވިކަމަށް ނޫސްތަކުގެ ހެޑްލައިންތަކަށް އެރި،" ހީނާ ވިދާޅުވިއެވެ.
އެ މައްސަލަ ކުރިއަށްދަނިކޮށް ކުއްލިއަކަށް އަލީ ވަހީދު ރާއްޖެ ދޫކުރައްވައި ވަޑައިގަތީ ވެލާނާ އިންޓަނޭޝަނަލް އެއާޕޯޓުގެ ވީއައިޕީ ލޯންޖު ބޭނުންކުރައްވައިގެންކަން ފާހަގަކުރައްވަމުން ހީނާ ވިދާޅުވީ އިދިކޮޅުން އެއިރުވެސް ޤަބޫލުކުރީ އަދި މިހާރުވެސް ދެކެނީ އެ މައްސަލަ އޮއްބައިލުމަށް އެއިރުގެ ސަރުކާރުން އަލީ ވަހީދު ފުރުވައިލީ ކަމަށެވެ. އަދި އޭގެ ފަހުން ހިނގި ކަންކަންވެސް ހީނާ ވިދާޅުވެދެއްވިއެވެ. އެގޮތުން އަލީ ކޯޓަށް ހާޒިރުނުކުރެވި ދިގުލައިގެންދިޔަ ކަމެވެ.
އަލީ ވަހީދު އިނގިރޭސިވިލާތުގައި ހުންނަވައިގެން ބޭއްވެވި ފުރަތަމަ ނޫސްވެރިންގެ ބައްދަލުވުމުގައި ވިދާޅުވި ބައެއް ވާހަކަފުޅުތައްވެސް ހީނާ ފާހަގަކުރެއްވިއެވެ. އެގޮތުން ސަރުކާރުގެ ވެރިން ކޮމްޕްރޮމައިޒްވާނެ މައުލޫމާތު ހުރިކަމަށާއި، ވަރަށް އަވަހަށް އެ މައުލޫމާތު ހާމަކުރާނެކަމަށް އެއިރު އަލީ ވަހީދު ވިދާޅުވިކަން ފާހަގަކުރެއްވުމާއެކު ހީނާ ވިދާޅުވީ އޭގެ ފަހުން މުޅި މައްސަލަ މަޑުޖެހުނު ކަމަށެވެ. އަދި ފަހުން އެވާހަކައަކީ "ސްމޯކް ސްކްރީނެއް"ކަމަށް ވިދާޅުވެ އަލީގެ ވާހަކަ މުޅިން ބަދަލުކުރެއްވި ކަމަށެވެ.
ހީނާ ފާހަގަކުރެއްވި އަނެއް ނުކުތާއަކީ އަލީގެ ވާހަކަ ބަދަލުވުމުގެ ކުރިން ރާއްޖެ ޓީވީއަށް ދެއްވި ބަސްދީގަތުމެއްގައި އަލީ ވަހީދުގެ ސިޔާސީ މުސްތަޤުބަލެއް އޮތްކަމަށާއި، އަލީ ވަހީދަށް ސިޔާސީ ކެރިއަރު ބިނާކުރުމުގައި އެހީތެރިވެވަޑައިގަންނަވާނެ ކަމަށް، ރައީސް އިބްރާހީމު ވިދާޅުވި ކަމެވެ.
"ދެން އަޅުގަނޑުމެންނަށް ފެނުނީ ޔޫކޭގައި ހުންނަވައިގެން އަލީ ވަހީދު ޕްރެސް ކޮންފަރެންސްއެއް ބޭއްވެވި. އެއިރުގެ ޕްރެސް ކޮންފަރެންސްގައި ވިދާޅުވި ސަރުކާރުގެ ވެރިން ކޮމްޕްރޮމައިޒްވާނެ ވާހަކަތަކެއް ތިމަންނަގެ އަތުގައި އެބަހުއްޓޭ. އެވާހަތައް ވަރަށް އަވަހަށް ހާމަކުރާނަމޭ. އެއަށްފަހު ފެނުނީ ރައީސުލްޖުމްހޫރިއްޔާ ރާއްޖެޓީވީގެ ޕްރޮގުރާމެއްގައި މިވިދާޅުވަނީ އަލީ ވަހީދަކީ ސިޔާސީ މުސްތަޤުބަލު އޮތް ބޭފުޅެކޭ. އެހެންވީމާ ތިމަންމަނިކުފާނު އަލީ ވަހީދަށް އެހީތެރިވާނަމޭ.،" ހީނާ ވިދާޅުވިއެވެ.
އެއަށްފަހު އަލީ ވަހީދުގެ ޝިކާރއަކަށްވިކަމަށް ބުނާ އަންހެނުން ދީފައިހުރި ހެކިބަސްތައް އަނބުރާ ގެންދިޔަކަމަށް ހީނާ ވިދާޅުވިއެވެ. އަދި އެއަށްފަހު އަލީ ރާއްޖެއަށް ވަޑައިގެން އެމްޑީޕީ ޓިކެޓުގައި ރައްޔިތުންގެ މަޖިލީހުގެ އިންތިކާޞުގއި ވާދަކުރައްވާކަން ފާހަގަކުރައްވައި ހީނާ އުފެއްދެވި ސުވާލަކީ އެމްޑީޕީގެ ލީޑާޝިޕު ކޮމްޕްރޮމައިޒްވާ ފަދަ ކަންތައްތަކެއް އަލީ ވަހީދުގެ އަތްޕުޅުގައި ހަގީގަތުގައިވެސް ހުރީތޯއެވެ.
ރޭޕްގެ ތުހުމަތުވާ އަލީގެ ސިޔާސީ ކެރިއާ އޭނާ އެދޭ ގޮތަށް ބިނާކޮށްދޭންޖެހޭކަމަށް ރައީސް އިބްރާހީމު ވިދާޅުވި
— Dhiyares (@DhiyaresNews) April 1, 2024
https://t.co/TOFOxJcp0t
"އަޅުގަނޑުމެން ސުވާލު އުފައްދަން ބޭނުންވަނީ ހަމަ އެމްޑީޕީގެ ލީޑާޝިޕް ކޮމްޕްރޮމައިޒްވާ ފަދަ ކަންތައްތަކެއް އަލީ ވަހީދުގެ އަތްޕުޅުގައި ހުރީތޯ، ނުވަތަ ނޫނިއްޔާ މިކަމުގައި އެބޭފުޅުން ބަހެއް ވިދާޅުނުވަނީ ހަމަ އަލީ ވަހީދުގެ މިކަންތައްތަކަކީ ޕާޓީގެ އުސޫލާ އެއްގޮތް ކަންތައްތަކެއްތޯއޭ؟،" ހީނާ ވިދާޅުވިއެވެ.
ގައަށް އަތްލުމުގެ އިތުރަށް އަނގަ ބަހުންނާއި މެސެޖުކޮށްގެން އަލީ ޖިިންސީ ފުރައްސާރަކޮށް މަތީ މަޤާމެއްގައި ހުރި މީހަކު ދައްކައިގެންނުވާނެ ވާހަކަތައް ޓުއަރިޒަމް މިނިސްޓްރީގެ މުވައްޒަފުންނާ ދައްކާފައިވާކަމަށް އެ އަންހެނުންގެ ބަޔާންތަކުގައި ބުނެފައިވެއެވެ.
އަލީ އިނގިރޭސިވިލާތުގައި ހުރުމުގެ ސަބަބުން މައްސަލަ ކުރިއަށްނުގޮސް މަޑުޖެހިފައިވަނިކޮށް މައްސަލާގައި ހެކިބަސްދިން އަންހެނުންނަކީ ކޮބައިކަން ބައެއް ފަރާތްތަކަށް އެނގިގެން ދިޔައެވެ. ފަހުން އެ އަންހެނުންވަނީ އެމީހުން ދިން ހެކިބަސް އަނބުރާ ގެނެސްފައެވެ. އެ ހެކިބަސް ގެނައީ ނުފޫޒު ފޯރުވައިގެންކަމަށް އެއިރުވެސް ބައެއް ފަރާތްތަކުން ތުހުމަތުކުރިއެވެ. އޭގެ ފަހުން އަލީ ވަހީދު އަނބުރާ ރާއްޖެއަށް އައިސް ސިޔާސީ މަސައްކަތްތައް ފެށިއެވެ.
އަދި މިހާރު އޭނާއަކީ ރައީސް އިބްރާހީމު އެ ޕާޓީއެއްގެ އެޑްވައިޒަރުކަމުގައި ހުންނެވި އެމްޑީޕީގެ ފަރާތުން ކުޅުދުއްފުށީ ދެކުނު ދާއިރާގެ ރައްޔިތުންގެ މަޖިލީހުގެ ގޮނޑިއަށް ވާދަކުރައްވާ ކެންޑިޑޭޓެވެ.
