މަކުނުދޫގައި ފެށި ހުރިހާ މަޝްރޫޢެއް އަންނަނީ އަންނަނީ، އަންނާނެ ދުވަހެއް ނޭނގޭ!

ހދ. މަކުނުދޫގައި މި ސަރުކާރުން ފެށި އެއްވެސް މަޝްރޫއެއްގެ މަސައްކަތް ނިންމިފައި ނެތްއިރު އެ މަޝްރޫޢުތައް ނިންމޭނީ ކޮން ދުވަހަކުކަމެއްވެސް ޔަގީނުން ނޭނގޭކަން ހާމަވެއްޖެއެވެ.

މި ސަރުކާރުން މަކުނޫދޫއަށް ވައުދުވެ ބަޖެޓުގައި 12 ޕްރޮޖެކްޓެއްގެ މަސައްކަތް ހިމަނާފައިވެއެވެ.

މި ޕްރޮޖެކްޓްތަކުގެ އެންމެ ފަހުގެ މައުލޫމާތު ހޯދުމަށް "ދިޔަރެސް"އިން ގުޅުމުން މަކުނުދޫ ކައުންސިލްގެ ރައީސް އައުޒަމް އާދަމް ވަނީ ޕްރޮޖެކްޓްތަކާއި މެދު ކައުންސިލުން ދެކޭގޮތް ވިދާޅުވެފައެވެ.

އައުޒަމް ވިދާޅުވީ ރައީސުލްޖުމުހުރިއްޔާ އިބްރާހިމް މުހައްމަދު ޞާލިހްގެ ދައުރުގައި ފެށި މަކުނުދޫގައި އެއާޕޯޓުގެ މަސައްކަތުގެ އަމަލީ މަސައްކަތްތައް ފެށުމަށްޓަކައި އެންމެހާ ތައްޔާރީތައް މިހާރު ވެފައިވާކަމަށެވެ.

އެއާޕޯޓް މަސައްކަތް ކައުންސިލުން ހިތްހަމަ ޖެހޭ ފަދަ މޭރުމަކުން އައުޒަމް ވާހަކަ ދައްކަވާފައިވާއިރު މަކުނުދޫ އެއާޕޯޓަކީ ރައީސް އިބްރާހިމްގެ ދައުރުގެ ފުރަތަމަ 100 ދުވަހުގެ ތެރޭގައި ފަށައިގެން ކުރިއަށްގެންދަން ވައުދުވީ މަސައްކަތެއް، ނަމަވެސް ދައުރު ނިމެން ބާކީ ކުޑަ ދުވަސްކޮޅަކަށްވީއިރު އަދިވެސް އެއާޕޯޓުގެ އަމަލީ މަސައްކަތް މިވަނީ ނުފެށިއެވެ. އަދި މި މަސައްކަތް ފެށުމުގެ އެއްބަސްވުމުގައި ސޮއިކުރީވެސް ރިޔާސީ އިންތިޚާބު ކުޑަތަންވުމުންނެވެ.

މަކުނުދޫގައި މި ސަރުކާރުން ފެށި ފެނާއި ނަރުދަމާގެ މަސައްކަތް ވެސް އަދި ނިންމިފައިނުވެއެވެ. ނަމަވެސް އެ މަޝްރޫއާ ގުޅިގެން އެރަށު ކައުންސިލްގެ ރައީސް އައުޒަމް ވިދާޅުވީ މަކުނުދޫ ފެނާއި ނަރުދަމާ ޕްރޮޖެކްޓަކީ އެ ސަރަހައްދުގައި އެންމެ ބާރު ސްޕީޑްގައި ކުރިއަށްދާ ފެނާއި ނަރުދަމާގެ ޕްރޮޖެކްޓްކަމަށެވެ.

އަލްޓެކް މޯލްޑިވްސް އާހަވާލުކޮށްގެން ކުރިއަށްގެންދާ އެ ޕްރޮޖެކްޓުގައި އެ ކުންފުނީގެ ފަރާތުން ކައުންސިލަށް ލިބެން ޖެހޭ ސަޕޯޓާއި ރަށުގެ ރައްޔިތުންނާ ގުޅިގެން އެ މަސައްކަތުގައި ކުރިއަށްދާ މިންވަރާއި ސްޕީޑާއި ކޮލިޓީ އެއީ ވަރަށް ބަލައިގަންނަކަމެއްކަމަށްވެސް އައުޒަމް ވިދާޅުވެފައިވެއެވެ.

މަކުނުދޫގެ ފެނާއި ނަރުދަމާގެ މަސައްކަތް ހަވާލުކޮށްފައިވަނީ އަލްޓެކް މޯލްޑިވްސް އާއި ރަޝީދު ކާޕެންޓްރީ އެންޑް ކޮންސްޓްރަކްޝަން އާއި ގުޅިގެން ހަދާފައިވާ ޖޮއިންޓް ވެންޗަރ އަކަށެވެ. އެ މަސައްކަތުގެ އެއްބަސްވުމުގައި ސޮއިކޮށްފައިވަނީ 2021 ވަނަ އަހަރުގެ މާޗު މަހުގެ 3 ވަނަ ދުވަހުގައެވެ. އަދި މަސައްކަތް ނިންމަން ޖެހެނީ 660 ދުވަސް ތެރޭގައެވެ.

އެހެން ނަމަވެސް ނިންމަން ދިން ތާރީޚަށް އެ މަސައްކަތް ނިންމިފައިނުވާއިރު 56 މިލިއަން ހަރަދު ކުރާ އެ މަޝްރޫއު މި އަހަރުގެ ޖެނުއަރީ މަހުގެ ނިޔަލަށް ނިންމިފައިވަނީ އެންމެ 34 އިންސައްތަ މަސައްކަތެވެ.

ރާއްޖޭގެ މީހުން ދިރިއުޅޭ ކޮންމެ ރަށެއްގައި މި ފަސް އަހަރު ނިމުމުގެ ކުރިން ފެނާއި ނަރުދަމާ ގާއިމުކުރުމަކީ ރައީސް އިބްރާހިމްގެ ރިޔާސީ ވައުދެކެވެ. އެހެން ނަމަވެސް ދައުރު ނިމެން ކުޑަ ދުވަސްކޮޅަކަށް ވެފައިވާއިރު ރައީސް ގެ ގިނަ ވައުދުތައް ފަދައިން އެ މަސައްކަތްތައްވެސް އެދެވޭ ސްޕީޑެއްގައި ރަށްރަށުގައި ކުރިއަށް ނުދާކަން ރައްޔިތުން ފާހަގަކުރެއެވެ.

މަކުނުދޫ ހޭންޑްބޯލް ކޯޓުގެ މަސައްކަތާއި ގުޅިގެން ވާހަކަ ދައްކަވަމުން އައުޒަމް ވިދާޅުވީ އެ ދަނޑުގެ އަމަލީ މަސައްކަތް މިހާރު ކުރިއަށްދާކަމަށާއި ކުރިއަށް އޮތް މަހެއް ނުވަތަ ދޮޅުމަހެއްގެ ތެރޭގައި އެ މަސައްކަތް އެކީ ނިންމާލެވޭނެކަމަށް އުންމީދު ކުރައްވާކަމަށެވެ.

މަކުނުދޫ ހޭންޑްބޯލް ދަނޑުގެ މަސައްކަތަކީ 30 ނޮވެންބަރު 2022 ގައި ނިންމާނެ ކަމަށް ސަރުކާރުން ބުނި މަސައްކަތެކެވެ. އެހެން ނަމަވެސް އެ މަސައްކަތް އަދިވެސް ނިންމިފައިވާއިރު އެ ޕްރޮޖެކްޓަށް މި އަހަރުގެ ބަޖެޓުގައި 310,000ރ. އަދި އަންނަ އަހަރުގެ ބަޖެޓުގައި 620,000ރ. ހިމަނާފައިވެއެވެ.

މަކުނުދޫ ހޭންޑްބޯލް ކޯޓުގެ މަސައްކަތް މަހެއްހާ ދުވަސް ތެރޭގައި ނިމޭނެކަމަށް ކައުންސިލްގެ ރައީސް އައުޒަމް ވިދާޅުވި ނަމަވެސް އެ ކޯޓު އަޅާ ސަރަހައްދު އަދި ވަނީ ސާފުވެސް ނުކޮށެވެ. އެހެންކަމުން ކުރިއަށް އޮތް ދެ މަހެއްހާ ދުވަހުގެ ތެރޭގައިވެސް އެ މަޝްރޫއުގެ މަސައްކަތް ނިންމިދާނެކަމަށް ނުބެލެވެއެވެ.

ހޭންޑްބޯލް ދަނޑުގެ އިތުރުން މަކުނުދޫ ފުޓްސަލް ދަނޑާއި ގުޅިގެންވެސް އައުޒަމް "ދިޔަރެސް"އަށް މައުލޫމާތު ދެއްވާފައިވެއެވެ.

އޭނާ ވިދާޅުވީ ފުޓްސަލް ދަނޑު ވަރަށް ބޮޑަށް ހަލާކުވެފައިވާތީ ޒުވާނުން އެކަމަށް ރިކުއެސްޓްކޮށްފައިވާކަމަށާއި ޔޫތް މިނިސްޓްރީން ފުޓްސަލް ދަނޑު މަރާމާތުކުރުމަށްޓަކައި ކައުންސިލަށް ޓާފް ދީފައިވާކަމަށެވެ. އެހެންވެ އެ މަސައްކަތް ކައުންސިލްގެ ބެލުމުގެ ދަށުން ވަރަށް އަވަހަށް ކުރިއަށް ދާނެކަމަށް އޭނާ ވިދާޅުވިއެވެ.

ހދ.މަކުނުދޫ ސްކޫލް މަލްޓި ޕާޕަސް ހޯލު އިމާރާތްކުރުމުގެ މަސައްކަތް ސަރުކާރުން ހަވާލުކޮށްފައިވަނީ އެއިއެމް ކޮންސްޓްރަކްޝަން ޕްރައިވެޓް ލިމިޓެޑްއާއެވެ.

މަކުނުދޫ މަލްޓިޕާޕަސް ހޯލުގެ ކޮންޓްރެކްޓް ބާތިލުކުރީކަމަށް އައުޒަމް ވިދާޅުވީ ނަމަވެސް މަކުނުދޫ ސްކޫލް މަލްޓި ޕާޕަސް ހޯލު އިމާރާތްކުރަމުންދާ މުވައްޒަފުންނަށް މުސާރަ ނުދޭތާ ގިނަ ދުވަސްތަކެއްވުމުން މިދިޔަ ޖޫން މަހުގެ ތެރޭގައި އެ މުވައްޒަފުންވަނީ ކައުންސިލް އިދާރާ ކުރިމަތީ މުޒާހަރާ ކޮށްފައެވެ.

އެ މައްސަލައާ ގުޅިގެން މީގެ ކުރިން މަކުނުދޫއިން މައުލޫމާތު ދިން މީހަކު "ދިޔަރެސް"އަށް ބުނީ އެ މުވައްޒަފުން ކައުންސިލް އިދާރާއަށް މުޒާހަރާއަށް ގޮސްފައިވަނީ މުސާރަ ނުދިނުމުގެ ސަބަބުން ވަރަށް ދަތިވެގެން ކަމަށާއި އޭރު އެ ޕްރޮޖެކްޓްގެ މުއްދަތުވެސް ހަމަވެފައިވާކަމަށެވެ.

މަކުނުދޫ އައުޓްޑީ ޖިމާއި ގުޅިގެން އައުޒަމް ވިދާޅުވީ އެ ޖިމްއަށް ބޭނުންވާ ވަސީލަތްތައް ސަރުކާރުން މިހާރު ކައުންސިލާ ހަވާލުކޮށްފައިވާކަމަށެވެ.

"މިވަގުތު މިދަނީ އައުޓްޑޯ ޖިމް ސަރަހައްދު ޒީނަތްތެރިކުރުމަށްޓަކައި ކުރަން ޖެހޭ މަސައްކަތްތައް މިހާރު ކުރިއަށްދަނީ" އައުޒަމް ވިދާޅުވިއެވެ. އައުޒަމް މިފަދައިން ވިދާޅުވި ނަމަވެސް މަކުނުދޫ ރައްޔިތުން ބުނާ ގޮތުން އައުޓްޑޯ ޖިމުގެ ސާމާނުތައް އެތުރުން ފިޔަވައި ޖިމުގެ އެއްވެސް މަސައްކަތެއް ކުރެވިފައި ނެތެވެ. އަދި ޖިމުގެ މަސައްކަތް ނިމޭނެ ތާރީޚެއްވެސް ނޭނގޭކަމަށް އެ ރަށުގެ ރައްޔިތުން ބުނެއެވެ.

މަކުނުދޫ އައުޓްޑޯ ޖިމްގެ މަސައްކަތްވެސް އަދި ނިންމިފައިނުވާއިރު ސަރުކާރު ވެބްސައިޓް އައިލްސްގައި އެ މަސައްކަތް ފަށާފައިވާކަމަށް ވެސް އަދި ބުނެފައެއް ނުވެއެވެ. އަދި އެ މަސައްކަތަށް މި އަހަރުގެ ބަޖެޓް ގައި 60,000ރ. އަދި އަންނަ އަހަރުގެ ބަޖެޓުގައި 40,000ރ. ހިމަނާފައިވެއެވެ.

ކުނި މެނޭޖުރުމުގެ ޕްރޮޖެކްޓާއި ގުޅިގެން އައުޒަމް ވިދާޅުވީ ކުނި މެނޭޖްކުރުމަށްޓަކައި މަކުނުދޫ ކައުންސިލްއާއި ސޮނެވަރ ނަމޫނާއާއެކު އެއްބަސްވުމެއްވެފައިވާކަމަށެވެ.

ނަމަވެސް އެ މަސައްކަތް ކުރިއަށް ގެންދިއުމުގައ ބައެއް ގޮންޖެހުންތައް ކުރިމަތިވިކަމަށާއި އެ ކަންކަން މިނިސްޓްރީއާ ހިއްސާކުރިކަމަށް އޭނާ ވިދާޅުވިއެވެ. އައުޒަމް ވިދާޅުވީ އެ މައްސަލަތަކަށް ހައްލު ލިބި މިނިސްޓްރީ މަސައްކަތް ކުރިއަށް ގެންދެވޭގޮތަށް މިނިސްޓްރީން އެޕްރޫވަލް ލިބިފައިވާކަމަށެވެ. އެހެންނަމަވެސް އެ މަސައްކަތްވެސް އަދި މިހާތަނަށް ނުފެށޭކަމަށް އޭނާ ވިދާޅުވިއެވެ.

މަކުނުދޫ އާ ސިއްހީ މަރުކަޒުގެ އިމާރާތުގެ މަސައްކަތް ފަށާނެކަމަށް ސަރުކާރުން ބުނީ މިދިޔަ މެއި މަހުގެ ތެރޭގައެވެ. އެހެން ނަމަވެސް މަސައްކަތް އަދިވެސް ފެށިފައިނުވާއިރު އެރަށު ކައުންސިލުން ދިން މައުލޫމާތަށް ބަލާއިރު މި ދައުރުގެ ތެރޭގައި އެ މަސައްކަތް ފެށިދާނެކަމަށްވެސް ނުބެލެވެއެވެ.

އައުޒަމް ވިދާޅުވީ މަކުނުދޫ އޮޑި އެހެލާ ސަރަހައްދު ހެދުމަށްޓަކައި ކައުންސިލާ މަޝްވަރާކޮށް އެ ޕްރޮޖެކްޓް ކައުންސިލާވެސް ހަވާލުކުރިކަމަށެވެ.

އައުޒަމް ވިދާޅުވީ ޕޮލިސް ސްޓޭޝަން ގާއިމްކުރުމަށްޓަކައި ބިޑް ކުރުމުގެ މަރުހަލާއެއްގައި އުޅޭކަމަށް މައުލޫމާތު ލިބިފައިވާކަމަށާއި އެ ޕްރޮޖެކްޓްގެ އަޕްޑޭޓެއް ފަހުން ލިބިފައި ނުވާކަމަށެވެ. މި މަޝްރޫޢަކީ އިންޑިއާގެ އެގްޒިމް ބޭންކުން ބޮޑު ލޯނެއް ނަގައިގެން ހިންގަން ފަށާފައިވާ މަޝްރޫޢެކެވެ.

މި މަޝްރޫޢުގެ ދަށުން މަކުނުދޫގައި ޕޮލިސް ސްޓޭޝަން ޤާއިމުކުރުމަށް ކަނޑައެޅި ބިން ސާފުކޮށް އެތަނުގައި މަސައްކަތްކުރުމަށް މިހާތަނަށް އެއްވެސް ކަމެއް ކުރެވިފައިނުވާއިރު މި މަޝްރޫޢުގެ މަސައްކަތް ފެށޭނެ ތާރީޚެއްވެސް ނޭނގެއެވެ.

މިއިން އެއްވެސް މަޝްރޫޢެއް ނިންމައިނުލެވުނު ނަމަވެސް މަކުނުދޫ ކައުންސިލުގެ ރައީސް އައުޒަމް ވިދާޅުވީ މި ސަރުކާރުގެ މަސައްކަތްތަކާމެދު ވަރަށް އުފާވާކަމަށާއި، ސަރުކާރު ވަރަށް ރަނގަޅު ކަމަށެވެ.