މިދިޔަ މަހު އިމްޕޯޓު އެކްސްޕޯޓުން ލިބުނު އާމްދަނީ ދަށަށް

މިދިޔަ މާޗު މަހު އިމްޕޯޓު އެކްސްޕޯޓުން ދައުލަތަށް ލިބުނު އާމްދަނީ ފެބްރުއަރީ މަހާ އަޅާ ބަލާއިރު ދަށްވެފައިވާ ކަމަށް ކަސްޓަމްސްގެ ތަފާސްހިސާބުތަކުން ދައްކައިފިއެވެ.

ކަސްޓަމްސްއިން އާންމުކޮށްފައިވާ ތަފާސްހިސާބުތަކަށް ބަލާއިރު މާޗު މަހު އިމްޕޯޓާއި އެކްސްޕޯޓުން ދައުލަތަށް ޖުމްލަ ލިބިފައިވަނީ ޖުމްލަ 350 މިލިއަން ރުފިޔާއެވެ. މިއީ އޭގެކުރީ މަހު ލިބުނު އަދަދާ އަޅާބަލާއިރު 13 މިލިއަން ރުފިޔާ ދަށް އަދަދެކެވެ.

ފެބްރުއަރީ މަހު ކަސްޓަމްސް އިން އެންމެ ގިނައިން އިމްޕޯޓުކޮށްފައިވާ ބާވަތްތަކަށް ބަލާއިރު, އޫރުމަހާއި ބަނގުރާ އަދި ދުންފަތުގެ ބާވަތްތައް ނުހިމަނައި 1 ބިލިއަނަށް ރުފިޔާގެ ކާބޯތަކެތި އިމްޕޯޓުކޮށްފައިވެއެވެ.

އަދި 867 މިލިއަން ރުފިޔާގެ ޑީސެލް, ޕެޓްރޯލް އަދި އޭވިއޭޝަން ތެޔޮ އިމްޕޯޓު ކޮށްފައިވެއެވެ. މީގެއިތުރުން, 729 މިލިއަން ރުފިޔާގެ މެޝިނަރީ އަދި މެކޭނިކަލް އާލާތްތައް އިމްޕޯޓުކޮށްފައިވެއެވެ.

މިދިޔަ މަހު އެންމެ ގިނައިން ރާއްޖެއިން ބޭރަށް އެކްސްޕޯޓު ކުރި ބާވަތްތަކަށް ބަލާއިރު, 115 މިލިއަން ރުފިޔާގެ ގަނޑުކުރި ކަޅުބިލަމަހާއި, 46 މިލިއަން ރުފިޔާގެ ބަންދުކުރި ކަޅުބިލަމަސް ހިމެނެއެވެ. އަދި 13 މިލިއަން ރުފިޔާގެ ގަނޑުކުރި ރީނދޫ އުރަހަ ކަންނެއްޔާއި ހަތް މިލިއަން ރުފިޔާގެ ފްލޯސް މީލްސް އެންޑް ޕެލެޓްސް އޮފް ފިޝްގެ އިތުރުން ހަތަރު މިލިއަން ރުފިޔާގެ ޗިލްޑް ރީނދޫ އުރަހަ ކަންނެލިވެސް ބޭރުކޮށްފައިވެއެވެ.