އެންމެ ބޮޑަށް ތަޤްވާވެރީ ޢިލްމު އުނގެނި އެއާ އެއްގޮތަށް ޢަމަލުކުރާ މީހުން: ޚުތުބާ

އެންމެ ބޮޑަށް ތަޤްވާވެރިވާ މީހުންނަކީ ޢިލްމު އުނގެނި އެއާ އެއްގޮތަށް ޢަމަލުކުރާ މީހުންކަމަށް މިއަދުގެ ހުކުރު ޚުތުބާގައި ބުނެފިއެވެ.

މިއަދުގެ ހުކުރު ޚުތުބާގެ މައުޟޫއުއަކީ "ޢިލްމު އުނގެނުމުގެ މާތްކަން" މިއެވެ.

"މާތް اللهއަށް އެންމެ ބޮޑަށް ބިރުވެތިވެ، ތަޤްވާވެރިވާ މީހުންނަކީ، ޢިލްމު އުނގެނި އެ ޢިލްމާ އެއްގޮތަށް ޢަމަލުކުރާ މީހުންނެވެ. އެ މީހުން މާތްﷲ އަށް ތަޤްވާވެރިވެއެވެ." ޙުކުތުބާގައި ބުނެފައިވެއެވެ.

އަދި ތަޤްވާވެރީންނަކީ އެންމެ މާތް މީހުންކަމުގައި އަންގަވައި މާތްﷲ ވަޙީކުރައްވާވަފައިވާ ބަސްފުޅެއްވެސް ޚުތުބާގަިއ ބަޔާންކޮށްފައިވެއެވެ.

އެ ބަސްފުޅުގެ މާނާގައިވަނީ:

"ހަމަކަށަވަރުން، اللهގެ ޙަޟްރަތުގައި ތިޔަބައިމީހުންކުރެ އެންމެ މާތްކަން ބޮޑީ، ތިޔަބައިމީހުންކުރެ އެންމެ ތަޤްވާވެރި މީހާއެވެ. ހަމަކަށަވަރުން، اللهއީ، މޮޅަށް ދެނެވޮޑިގެންވާ، ޚަބީރުވަންތަ ރަސްކަލާނގެއެވެ."

ހުކުރު ޚުތުބާގައިވާގޮތުން މާތް الله ޢިލްމުވެރީންނަށް ޚާއްޞަކަމެއް ދެއްވައިފައި ވެއެވެ. އަދި ޢިލްމުގެ މަޤާމު މަތިވެރިވާކަން ފާހަގަކޮށް ފާހަގަކޮށް ޚުތުބާގައި ބުނެފައިވަނީ ޢިލްމު އުނގެނުމަށް، ނަބިއްޔާ ﷺ ވަރަށް ބޮޑަށް ބާރު އެޅުއްވެވިކަމަށެވެ.

ހުކުރު ޚުތުބާގައި އިތުރަށް ބުނެފައިވަނީ ނުދަނެ ހުރެ އަޅުކަންކުރާ މީހަކަށް، ބާޠިލު ގޮތުގައި އަޅުކަމެއް ކުރުމަށް ޝައިޠާނާ ވިސްނައިދީފާނެކަމަށާއި އެކަމުގެ ސަބަބުން އޭނާ މަގުފުރެދި، އެހެންމީހުން ވެސް މަގުފުރައްދައިފާނެކަމަށެވެ.

ނަމަވެސް ޢިލްމު ވެރިޔާ މަގުފުރައްދާކަށް ޝައިޠާނާއަކަށް ފަސޭހައެއް ނުވާނެކަމަށާއި އޭގެ ބަދަލުގައި އޭނާ، އޭނާއަށް ލިބިފައިވާ ޢިލްމުގެ މަތީގައި ސާބިތުވެ ހުރެ، އަނެކުން ވެސް ހެޔޮ މަގަށް އަޅުވަން މަސައްކަތްކުރާނެކަމަށްވެސް ޚުތުބާގައި ބުނެފައިވެއެވެ.

"ދީނީ ޢިލްމު އުނގެނުން، ކޮންމެ މުސްލިމަކަށް ވެސް ވާޖިބުވެގެން ވެއެވެ. ޢިލްމު އުނގެނުމަށް، މާތް الله ގެ ރަސޫލާ ﷺ އެހައި ބޮޑަށް ބާރުއަޅުއްވައިފައިވަނީ އެހެންވެއެވެ. އަދި އެ ކަމަށް އެދި ދުޢާކުރުމަށް ވެސް ކީރިތި ޤުރްއާނުގައި އަންގަވައިފައި ވެއެވެ." ޚުތުބާގައި ބުނެފައިވެއެވެ.