ރުހުންނުދިން ވަޒީރުން އަލުން އައްޔަންކުރުމާ ދެކޮޅު ޤަރާރެއް އީވާ މަޖިލީހަށް ހުށަހަޅުއްވައިފި

ރައްޔިތުންގެ މަޖިލީހުްނ ރުހުން ނުދިން 3 ވަޒީރުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަލުން ވަޒީރުކަމަށް އައްޔަންކުރައްވާފައިވާތީ އެކަމާއި ދެކޮޅަށް ރައްޔިތުންގެ މަޖިލީހަށް ޤާރާރެއް ހުށަހަޅުއްވާކަމުގައި ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު އީވާ އަބްދުالله ވިދާޅުވެއްޖެއެވެ.

ސޯޝަލް މީޑިއާ "އެކްސް" ގައި އީވާ ހިއްސާ ކުރެއްވި ޕޯސްޓެއްގައި ވަނީ ރައްޔިތުންގެ މަޖިލީހުގެ ރުހުން ލިބިފައިނުވާ 3 މެންބަރުން ވަޒީރުންގެ މަޖިލީހަށް އަލުން ރައީސުލްޖުމްހޫރިއްޔާ ޢައްޔަންކުރައްވާފައިވާތީ, މިކަމަކީ ދިވެހިރައްޔިތުން ދިވެހި ދައުލަތަށާއި، ދިވެހި ސަރުކާރަށް ކުރާ އިތުބާރުނެތިގެންދާނެ ފަދަ، އުނދަގޫ ހާލަތަކަށް ހިނގައިގެންދާނެ ފަދަކަމެއް ކަމުގައިވާތީ، ދިވެހި ޤައުމުގެ މަސްލަހަތު އިސްކޮށްދެއްވައި، މިކަމާމެދު އަލުން ވިސްނާވަޑައިގެން ޤާނޫނުއަސާސީއަށް އިހުތިރާމްކުރައްވައި، ޤާނޫނުއަސާސީއާ އެއްގޮތަށް ޢަމަލުކުރެއްވުމަށް ގޮވާލައި އެކަމަނާ ހުށަހަޅުއްވާ ޤަރާރެއް ކަމަށެވެ.

ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ ކެބިނެޓްގައި ހިމެނިވަޑައިގަންނަވާ ބައެއް ވަޒީރުންނަށް ރުހުން ނުދިނުމަށް އީވާ ހިމެނިވަޑައިގަންނަވާ ދަ ޑިމޮކްރެޓްސްގެ ޕާލިމެންޓަރީ ގްރޫޕުންނާއި އީވާ ކުރިން އުޅުއްވި ޕާޓީ, އެމްޑީޕީގެ ޕާލިމެންޓަރީ ގްރޫޕުން ނިންމައި އެގޮތަށް ވަނީ ޢަމަލުކޮށްފައެވެ. މިގޮތުން އިސްލާމިްކ މިނިސްޓަރާއި ހައުސިންގް މިނިސްޓަރާއި އެޓަނީ ޖެނެރަލްއަށް ރުހުން ދީފައި ނުވެއެވެ.

މެންބަރު އީވާ މަޖިލީހަށް ހުށަހަޅުއްވާ ޤަރާރުގައި, ރައީސުލްޖުމްހޫރިއްޔާ, މީހަކު މަޤާމަކަށް އައްޔަންކުރުމަށްފަހު އެކަން ފާސްކުރުމަށް މަޖިލީހަށް ހުށަހެޅުމުން އެކަމެއް ފާސްކުރުމާއި ފާސްނުކޮސް ދޫކޮށްލުމުގެ އިޚްތިޔާރު މަޖިލީހަށް ލިބިގެންވާކަމަށާއި މަޖިލީހުން ރުހުން ނުދީ ދޫކޮށްލި ފަރާތްތައް އަލުން މަޤާމަށް އައްޔަންކުރުމަކީ މަޖިލީހުގެ ބާރު ކަނޑުވާލުން ކަމުގައި ވަނީ ސިފަ ކުރައްވާފައެވެ.

އަދި ވަޒީރުންނަށް މަޖިލީހުގެ ރުހުން ނުލިބިއްޖެނަމަ ވަޒީރުންގެ މަޖިލީހުގައި ދެމިނުހުރެވޭނެކަމަށް ސުޕްރީމްކޯޓުން ވެސް ވަނީ ނިންމާފައި ކަމަށާއި މަޖިލީހުން ރުހުންނުދިން 2 މިނިސްޓަރުންނާއި އެޓާނީ ޖެނެރަލް އަލުން މަޤާމަށް އައްޔަން ކުރައްވައި އެބޭފުޅުން މަޤާމުގެ ހުވާކުރައްވާފައި ވުމަކީ ކަނޑައެޅިގެން ޤާނޫނަށާއި ސުޕްރީމްކޯޓަށް ގޮންޖެއްސެވުން ކަމުގައި އިވާ ވިދާޅުވެފައިވެއެވެ.

ބަންޑަރަނައިބު އަޙްމަދު އުޝާމާއި އިސްލާމިކް އެފެއާޒް މިނިސްޓަރު ޑރ.މުޙައްމަދު ޝަހީމް އަލީ ސައީދު އަދި ހައުސިން އެންޑް އާބަން ޕްލޭނިން މިނިސްޓަރު ޑރ.އަލީ ހައިދަރަށް ރުހުން ނުދޭން ޑިމޮކްރެޓްސްއާއި އެމްޑީޕީން ނިންމީ ކޮންސަބަބަކާހުރެކަމެއް ހާމަކޮށްފައެއް ނުވެއެވެ. މިތިން ވަޒީރުންނަކީ އެ ބޭފުޅުންނާ ހަވާލުކުރައްވާފައިވާ ދާއިރާތަކުގެ މަސައްކަތަށް ޤާބިލު އެކަށީގެންވާ ބޭފުޅުންކަން ގިނަ ބަޔަކު ފާހަގަކުރެއެވެ.