މަކުނުދޫގައި ނަރުދަމާ ސައިޓްގައި އެއްޗެއް ގޮވައި، ދެ މީހުން ނިޔާވެއްޖެ

ހދ. މަކުނުދޫގައި ނަރުދަމާގެ މަސައްކަތް ކުރަމުންދިޔަ ސައިޓުގައި އެއްޗެއް ގޮވައި، ދެ މީހުން މަރުވެއްޖެއެވެ.

ފުލުހުން މައުލޫމާތު ދިން ގޮތުގައި މަކުނުދޫގައި ނަރުދަމާގެ މަސައްކަތް ކުރަމުންދިޔަ ސައިޓުގައި އެއްޗެއް ގޮވާފައިވާކަމަށް ހޮނިހިރު ދުވަހު ވަނީ ރިޕޯޓުކޮށްފައެވެ. މި ހާދިސާގައި ދެ މީހުން މަރުވެފައިވާކަމަށް މައުލޫމާތު ލިބިފައި ވާކަމަށްވެސް ފުލުހުން ބުންޏެވެ.

ފުލުހުން އިތުރަށް މައުލޫމާތުދެމުން ބުނެފައިވަނީ މި ހާދިސާގައި މަރުވީ ބިދޭސީ ދެ މީހުން ކަމަށެވެ. އަދި ސައިޓުގައި ގޮވީ ގޭސް ސިލެންޑަރެއްކަމަށްވެސް ފުލުހުން ބުންޏެވެ.

މި ހާދިސާ ހިނގި ސަރަހައްދުގައި ފުލުހުން ދަނީ ހަރަކާތްތެރިވަމުންނެވެ.

މަކުނުދޫގައި އެއްޗެއް ގޮވާފައިވާއިރު, ބުރާސްފަތި ދުވަހު އެ އަތޮޅު ކުޅުދުއްފުށީ އެއާޕޯޓުގައި އެއްޗެއް ގޮވުމުގެ ސަބަބުން މީހަކަށް ވަނީ ސީރިއަސް އަނިޔާތަކެއް ލިބިފައެވެ.