އިޤުތިޞާދު ސިންދަފާތުކުރުމުގައި އެހީތެރިވުމާ ގުޅޭ ފަހުމުނާމާއެއްގައި ސީވެއިކްއާއެކު ސޮއިކޮށްފި

ދިވެހިރާއްޖޭގެ އިޤުތިޞާދު ސިންދަފާތުކުރުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ތަންފީޒުކުރައްވަން ނިންމަވާފައިވާ ސިޔާސަތުތައް ތަންފީޒުކުރުމުގައި އެހީތެރިވުމާ ގުޅޭ އެއްބަސްވުމެއްގައި އިކޮނޮމިކް ޑިވެލޮޕްމެންޓު މިނިސްޓްރީއާއި ކޮމަންވެލްތު އެންޓަޕްރައިޒް އެންޑް އިންވެސްޓުމެންޓު ކައުންސިލް (ސީވެއިކް)އާ ދެމެދުގައި ސޮއިކޮށްފިއެވެ.

ސީވެއިކްއާއެކު ސޮއިކުރި ފަހުމުނާމާގައި ދިވެހި ސަރުކާރުގެ ފަރާތުން ސޮއިކުރެއްވީ އިޤުތިޞާދީ ތަރައްޤީއާ ބެހޭ ވަޒީރު މުޙައްމަދު ސައީދެވެ. އަދި ސީވެއިކްގެ ފަރާތުން ސޮއިކުރެއްވީ އެ ކައުންސިލުގެ ސީއީއޯ ރޯސީ ގްލޭޒްބްރޫކްއެވެ.

ރާއްޖޭގެ މާލީ ޚިދުމަތްތަކުގެ ދާއިރާ ތަރައްޤީކުރުމާ ގުޅޭ މަޝްވަރާތައް ކުރެއްވުމަށް އިނގިރޭސިވިލާތަށް މިނިސްޓަރު ސައީދު ކުރެއްވި ދަތުރުފުޅުގެ ތެރެއިން، މާލީ ދާއިރާއަށް ގެންނަންޖެހޭ ބަދަލުތަކާ ގުޅޭ ގޮތުން އިނގިރޭސިވިލާތުގެ މާލީ ދާއިރާގެ ތަޖުރިބާކާރުންނާއެކު މިނިސްޓަރު ބޭއްވެވި ރައުންޑް ޓޭބަލް މަޝްވަރާތަކަށްފަހު ސޮއިކުރި މި އެއްބަސްވުމުގެ ދަށުން ރާއްޖޭގއ އިޤުތިޞާދީ ތަރައްޤީއަށް އިކޮނޮމިކް މިނިސްޓްރީން ކުރާ މަސައްކަތްތަކުގައި އިނގިރޭސިވިލާތާއި ކޮމަންވެލްތުގެ ތަނަވަސް ވަސީލަތްތައް މެދުވެރިކޮށް ސީވެއިކްއިން އެހީތެރިކަން ފޯރުކޮށްދޭނެއެވެ.

އެގޮތުން މައިގަނޑު ގޮތެއްގައި ތިން ދާއިރާއަކުން ސީވެއިކްގެ އެހީތެރިކަން މިނިސްޓްރީއަށް ދިނުމަށް މި ފަހުމުނާމާގައި އެއްބަސްވެފައިވާކަމަށް އެ މިނިސްޓްރީން އިއްޔެ ނެރުނު ނޫސްބަޔާނެއްގައި ބުނެފައިވެއެވެ.

MOU signed with @CWEICofficial @MoEDmv to seek UK’s expertise in developing the financial services industry to achieve the objectives set by HEP @MMuizzu to develop Internationally competitive financial centre in the Maldives, capitalizing on our USP’s. pic.twitter.com/aCafawn4aG

— Mohamed Saeed (@em_saeed) May 16, 2024

އެއިން ފުރަތަމަ ދާއިރާއަކީ މޯލްޑިވްސް އިންޓަނޭޝަނަލް ފައިނޭންޝަލް ސާވިސަސް އޮތޯރިޓީއަށް އިތުރު ފައިދާ ލިބޭނެ މަގެއް ފަހިކުރުމުގެ ގޮތުން ސޮވެރިން ވެލްތު ފަންޑެއް ޤާއިމުކޮށް، އެ ފަންޑު ހިންގުމަށް ބޭނުންވާ މުއައްސަސީ އޮނިގަނޑު އެކުލަވައިލާ، ލަންޑަނުގައި އެ ފަންޑު ހިންގައި ބައިނަލްއަޤުވާމި ފެންވަރުގައި އެ ފަންޑު ޕްރޮމޯޓުކުރުމުގެ ފީސިބިލިޓީ ދިރާސާކުރުމެވެ.

އޭގެ އިތުރަށް ބައިނަލްއަޤުވާމީ ބޯޓުފަހަރު ރާއްޖޭގައި ރަޖިސްޓަރީކޮށް އެ ބޯޓުފަހަރަށް ބޭނުންވާ އެހީތެރިކަން ފޯރުކޮށްދިނުމުގެ ސިނާއަތް ރާއްޖޭގައި ޤާއިމުކުރުމަށް ބޭނުންވާ މުއައްސަސީ އޮނިގަނޑު ތަރައްޤީކުރުމާއި، ކަނޑުދަތުރުފަތުރުގެ ދާއިރާއާ ގުޅިފައިވާ އިންޝުއަރޭންސްގެ ޚިދުމަތް ފަދަ ޚިދުމަތްތައް ފެށުމުގެ މަސައްކަތުގައި އެހީތެރިވުމަށް އެއްބަސްވެފައިވެއެވެ.

އަދި ރާއްޖޭގައި މާލީ މަރުކަޒުތައް ޤާއިމުކުރުމާއި ޑިވެލޮމެންޓު ބޭންކުތައް އުފެއްދުމަށް ބޭނުންވާ މުއައްސަސީ އޮނިގަނޑުތައް ތަރައްޤީކޮށް އެ ދާއިރާއިން ޤާބިލުކަން އިތުރުކުރުމުގައި އެހީތެރިވުމަށްވެސް ސީވެއިކްއާއެކު އެއްބަސްވެފައިވެއެވެ.

މި އެއްބަސްވުމުގައި ސޮއިކުރުމުގެ ކުރިން މިނިސްޓަރު ސައީދު ކުރިއަށްގެންދެވި ރައުންޑް ޓޭބަލްސްގައި އިނގިރޭސިވިލާތުގެ މާލީ އަދި ޕްރޮފެޝަނަލް ޚިދުމަތްތައް ފޯރުކޮށްދޭ އެކި ކުންފުނިތަކާއި ބޭންކުތަކުގެ އިސްވެރިން ބައިވެރިވެވަޑައިގެންފައިވެއެވެ.