އުސޫލާ ޚިލާފުވި 19 ޢުމްރާ ގުރޫޕަށް ފިޔަވަޅު އަޅައިފި

ޢުމްރާއަށް މީހުން ގެންދިއުމުގެ އުސޫލާ ހިލާފުވި 19 ކުންފުންޏަކަށް ފިޔަވަޅު އަޅައި ޖޫރިމަނާކޮށްފައިވާކަމަށް އިސްލާމިކް މިނިސްޓްރީން ބުނެފިއެވެ.

އިސްލާމިކް މިނިސްޓަރު ޑރ.މުހައްމަދު ޝަހީމް އަލީ ސައީދު މީޑިއާތަކާ ހިއްސާ ކުރެއްވި މެސެޖެއްގައި ވިދާޅުވީ ޢުމްރާއަށް މީހުން ގެންދިއުމުގެ އުސޫލާ ބައެއް ކުންފުނިތަކުން ހިލާފުވެފައިވާ މައްސަލަ ފެންމަތިވުމުން، 19 ކުންފުންޏެއް ޖޫރިމަނާކުރީ މައްސަލައިގެ ކުޑަބޮޑު މިނަށް ބެލުމަށްފަހު ކަމަށެވެ.

"އުމްރާއަށް މީހުން ގެންދިއުމުގެ އުސޫލާ ހިލާފު ވެފައިވާތީ އެ ކަންކަމުގެ ކުޑަބޮޑު މިނަށް ބަލައި، 19 ކުންފުންޏެއް 5،000ރ. އިން ޖޫރިމަނާ ކޮށްފައި ވަނީ،" މިނިސްޓަރު ޝަހީމް ވިދާޅުވިއެވެ.

މިނިސްޓަރު ވިދާޅުވި ގޮތުގައި އުމްރާއަށް މީހުން ގެންދިއުމުގައި އަމަލުކުރާން ގެޒެޓް ކޮށްފައިވާ އުޞޫލަށް އަމަލު ނުކުރާ ހުރިހައި ކުންފުނިތަކަށް ފިޔަވަޅު އަޅާނެއެވެ.

މީގެއިތުރުން ޢުމްރާއަށް މީހުން ގެންދިއުމަށް މިނިސްޓްރީ އިން ދީފައިވާ ރަސްމީ ލައިސަންގެ ދައްކައިގެން އުމްރާއަށް ފުރަން ކަމަށް ހަދައި އެމްއެމްއޭ އިން ޑޮަލަރު ނަގައި، އުމްރާއަށް ނުދިޔަ ކުންފުންޏެއް ފާހަގަ ކުރެވިފައިވާކަމަށްވެސް މިނިސްޓަރު ވިދާޅުވިއެވެ.

މަރުކަޒީ ބޭންކުން އުމްރާ އަދި ހައްޖު ގްރޫޕުތަކަށް ޑޮލަރު ދޫކުރާނީ ފުރުމުގެ ޓިކެޓާއި ލިޔެކިޔުންތައް ހުށަހެޅުމުންނެވެ. އެ ކުންފުނިން ޑޮލަރު ހޯދާފައިވަނީ ސައްހަނޫން ލިޔެކިޔުންތައް ހުށަހަޅައިގެން ކަމަށް ތުހުމަތު ކުރެވޭތީ އެކަން އިތުރަށް ބަލައި, މިނިސްޓްރީއަށް އެކަން ސާބިތުވެއްޖެ ނަމަ އެ ކުންފުނި 30,000 ރުފިޔާއިން ޖޫރިމަނާ ކުރާނެ ކަމަށް މިނިސްޓަރު ވަނީ ވިދާޅުވެފައެވެ. އަދި މިނިސްޓްރީން ދޫކޮށްފައިވާ ހުއްދަ ހިފަހައްޓައި މައްސަލަ ތަހުގީގު ކުރުމަށް ފުލުހުންނަށް ފޮނުވާނެ ކަމަށް ވެސް ވިދާޅުވިއެވެ.

އެކި އެކި އަމިއްލަ ގްރޫޕުތަކުގެ ހަވާލުގައި ހައްޖަށާއި އުމްރާއަށް މީހުން ގެންގޮސް އެ މީހުންނާ މެދު އިހުމާލުވާ މައްސަލަތައް ދޭތެރެއަކުން ފެންމަތިވެއެވެ. އެފަދަ މައްސަލައެއް މި ފަހުން ވެސް ފެންމަތިވެފައިވާއިރު, އުމްރާއަށް ދިޔަ 24 މީހަކު އެނބުރި ރާއްޖެ ނާދެވި ތާށިވެފައިވަނިކޮށް އެ މީހުން ރާއްޖެ ގެނެސްފައިވަނީ މިނިސްޓްރީގެ ހަވާލުގައެވެ. އެ ކުންފުނި މިހާރު ވަނީ އެއްލައްކަ ރުފިޔާއިން ޖޫރިމަނާ ކޮށްފައެވެ.