މާލެ ސަރަހައްދުގެ އިހްސާސްކުރެވޭ ހޫނުމިން 44.3 ޑިގްރީ ސެލްސިއަސްގައި

މާލެ ސަރަހައްދަށް އިތުރަށް ހޫނުވެ، އިހުސާސްކުރެވޭ ފިނިހޫނުމިން 44.3 ޑިގްރީ ސެލްސިއަސްއަށް އަރައިފިއެވެ.

މެޓް އޮފީހުގެ އެނެމް ފަހުގެ މައުލޫމާތުގައިވާ ގޮތުން މިއަދުގެ 14:00 ގައި މާލޭގެ ހޫނުމިން ހުރީ 33.0 ޑިގްރީ ސެލްސިއަސްގައެވެ. އެހެން ނަމަވެސް އިހުސާސް ކުރެވޭ ހޫނުމިން ހުރީ 44.3 ޑިގްރީ ސެލްސިއަސް ގައި ކަމަށްވެސް މެޓުން ވަނީ ބުނެފައެވެ.

އެގޮތުން ހަނިމާދޫއަށް ހޫނުމިން ހުރީ 33 ގައެވެ. އެހެން ނަމަވެސް އިހުސާސްކުރެވޭ ހޫނުމިން ހުރީ 41.4 ގައެވެ. އަދި ކައްދޫއަށް ހޫނުމިން 30.6 ގައި ހުރި އިރު، އިހުސާސްކުރެވޭ ހޫނުމިން ހުރީ 49.1 ގައި ކަމަށް މެޓުގެ އެންމެ ފަހުން އާންމުކޮށްފައިވާ މައުލޫމާތުގައި ވެއެވެ.

މެޓް އޮފީހުގެ ވައިބާ ގްރޫޕާއި ސޯޝަލް މީޑިއާ އެކައުންޓްތައް މެދުވެރިކޮށް، ކޮންމެ ދުވަހެއްގެ ހެނދުނު 11:00 އިން މެންދުރުފަހު 2:00 އަށް އަދި ހަވީރު 5:00 ޖަހާއިރު ހުންނަ ވައިގެ ފިނިހޫނުމިނާއި އިހުސާސްކުރެވޭ ފިނިހޫނުމިން އާންމު ކުރެއެވެ.

މާޗް އަދި އޭޕްރީލް މަހަކީ އަހަރުގެ ތެރޭގައި ރާއްޖޭގެ ސަރަހައްދަށް ހޫނުމިން އެންމެ މައްޗަށްދާ ދުވަސްވަރު ކަމަށްވާޢިރު ވިލާ މަދުވުމާއި، ވައި މަޑުވުން އަދި ވައިގެ ތެތްކަން މަތިކޮށް ހިފެހެއްޓިފައި ހުރުމުގެ ސަބަބުން ވައިގެ ހޫނުމިނަށްވުރެ އިހްސާސްކުރެވޭ ހޫނުމިން އިތުރަށް މަތިވުމުގެ ފުރުސަތު އޮތްކަން ދުނިޔޭގެ މޫސުމާބެހޭ ޖަމްއިއްޔާއިން ވަނީ ލަފާކޮށްފައެވެ.