އެމްއެމްއޭ ތެރެއިން މަޢުލޫމާތު ލީކުވި ގޮތުގެ ތަހުގީގެއް ކުރަނީ

މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ހުޅުމާލެއިން 14 ބިލިއަން ރުފިޔާގެ ބިމެއް ގަތުމަށް ނިންމި ނިންމުމާ ގުޅޭ މަޢުލޫމާތު ލީކުވި މައްސަލައިގައި އެ އޮތޯރިޓީގެ އިންޓަރނަލް ތަހުގީގެއް ފަށައިފިއެވެ.

މި މައްސަލައިގެ ތަހުގީގާ ގުޅިގެން އެމްއެމްއޭގެ ބޯޑު މެންބަރުންނާއި ގަވަރުނަރުގެ ސިސްޓަމް އެކްސެސް ވަނީ ވަގުތީގޮތުން ކަނޑާލާފައެވެ. ނަމަވެސް އެމްއެމްއޭގެ މުވައްޒަފުންގެ ސިސްޓަމް އެކްސެސް ކަނޑާފައެއް ނުވެއެވެ. އެމްއެމްއޭގެ އިސް އޮފިޝަލަކު "ދިޔަރެސް" އަށް މަޢުލޫމާތު ދެއްވި ގޮތުގައި މުވައްޒަފުންގެ ސިސްޓަމް އެކްސެސް ކަނޑާލާފައިވާކަމަށް މީޑިއާގައި ދެކެވޭ ވާހަކަތަކަކީ ޙަޤީޤަތާ ޚިލާފު ވާހަކަތަކެކެވެ.

އެމްއެމްއޭގެ އޮފިޝަލް އިތުރަށް ހާމަކުރެއްވި ގޮތުގައި މި މައްސަލައިގެ ތަހުގީގުގައި ދިވެހި ފުލުހުންގެ ޚިދުމަތުގެ އެއްވެސް ދައުރެއް ނެތެވެ. އަދި މިއީ އެމްއެމްއޭގެ އިންޓަރނަލް ތަހުގީގެއްގެ ގޮތުގައި ކުރިއަށްދާ މައްސަލައެކެވެ.

14 ބިލިއަން ރުފިޔާގެ ބިން ގަތުމުގެ މައްސަލައަކީ އެމްއެމްއޭގެ ބޯޑުގެ ތެރޭގައި ބޮޑެތި ޚިޔާލު ތަފާތުތަކެއް އުފެދިފައިވާ މައްސަލައެކެވެ. މި މައްސަލައާ ގުޅިގެން މިހާތަނަށް ބޯޑުގެ ތިން މެންބަރުން ވަނީ އިސްތިއުފާ ދެއްވާފައެވެ.

މި މައްސަލައިގެ ތަހުގީގު ކުރިއަށްދާ ގޮތާއި، އޭގެ ނަތީޖާއާ ގުޅޭ އިތުރު މަޢުލޫމާތު އެމްއެމްއޭ އިން އަދި ހާމަކޮށްފައެއް ނުވެއެވެ.