ހާހަކަށް ވުރެ ގިނަ މީހުންނާއެކު މި އަަހަރުގެ ހަވަނަ ކްރޫޒް ލައިނާ ރާއްޖެ އައިސްފިއެވެ.
އެމްއެސް ވައިކިން ސްކައި ނަމަކަށް ކިޔާ މި ކްރޫޒް ލައިނާ ލަންކާގެ ކޮލަމްބޯއިން ފުރައިގެން ރާއްޖެ އައިސްފައިވަނީ މި މަހުގެ 9 ވަނަ ދުވަހުއެވެ.
އިމިގްރޭޝަނުން ކުރި ޕޯސްޓެއްގައި ބުނެފައިވަނީ މި ކްރޫޒް ލައިނާއިން ރާއްޖެ އައި 765 ފަސެންޖަރުންނާއި، 469 ފަޅުވެރިންނަށް އިމިގްރޭޝަނުން ކްލިއަރެންސް ދީފައިވާ ކަމަށެވެ. އެއީ 1,234 މީހުންނެވެ.
މި ކްރޫޒްއިން ރާއްޖެ އައި މީހުންނަށް އެން ރޫޓް ކްލިއަރެންސް ދިނުމުގައި އިމިގްރޭޝަންގެ ސީޕޯޓު ޑިވިޝަން އޮފިސަރުން ވަނީ ހަރަކާތްތެރި ވެފައެވެ.
މި މަހުގެ ފުރަތަމަ ދުވަހު ސީޝެލްސްއިން ރާއްޖެ އައި "އެމްއެސް އިންސިގްނިއާ" ނަމަކަށް ކިޔާ ލައިނާގެ 576 ފަސިންޖަރުންނާއި 406 ކުރޫ މެމްބަރުންނަށް އިމިގްރޭޝަނުން ކްލިއަރެންސް ދީފައިވެއެވެ.
މީގެއިތުރުން, މި މަހުގެ 7 ވަނަ ދުވަހު ލަންކާއިން އައި އިތުރު ކްރޫޒު ލައިނާއަކުން 1,274 ފަސިންޖަރުންނާއި 751 ކުރޫ މެމްބަރުންނަށް އިމިގްރޭޝަން ކްލިއަރެންސް ދީފައިވެއެވެ.
ރާއްޖެ ޒިޔާރަތްކުރާ ހުރިހާ ކްރޫޒް ލައިނާތަކުން އަންނަ މީހުންނަށް އިމިގްރޭޝަނުން ކްލިއަރެންސްގެ ޚިދުމަތް ދެއެވެ. އާންމު ގޮތެއްގައި އެންމެ ގިނައިން ރާއްޖެއަށް ކްރޫޒް ލައިނާ އަންނަނީ ހޫނު މޫސުމުން ފެށުމުންނާއި, އާ އަހަރު އަދި ފެސްޓިވް ސީޒަންތަކާ ދިމާކޮށެވެ.
މާޝަލް އައިލެންޑްސްގައި ރަޖިސްޓަރީ ކޮށްފައިވާ ކްރޫޒްލައިނާ "އޯޝޭނިއާ ރިވެއެރާ" އާއި ބަހާމަސްގައި ރަޖިސްޓަރީ ކޮށްފައިވާ "ނޯވިއަން ސްކައި" އަދި ބަހާމަސްގައި ރަޖިސްޓަރީ ކޮށްފައިވާ "ކްރިސްޓަލް ސިންފަނީ" އިން ގިނަ އަދަދެއްގެ ފަތުރުވެރިން މި އަހަރު ރާއްޖެ އައިސްފައިވެއެވެ.
