14 ކިލޯގެ ޑްރަގާއެކު ހައްޔަރުކުރި މީހާގެ ބަންދަށް އިތުރު 15 ދުވަސް

މިދިޔަ މަހު ހުޅުމާލޭގައި ހުރި ގެއަކުން 14 ކިލޯއަށްވުރެ ގިނަ މަސްތުވާތަކެއްޗާއެކު ހައްޔަރު ކުރި 23 އަހަރުގެ އަންހެން މީހާގެ ބަންދަށް އިތުރު 15 ދުވަސް ޖެހުމަށް ކްރިމިނަލް ކޯޓުން އަމުރު ކޮށްފިއެވެ.

ކައުންޓަރ ނާކޮޓިކްސް އިންޓެލިޖެންސް އާއި ޑްރަގް އެންފޯސްމަންޓް ގުޅިގެން ހިންގި އޮޕަރޭޝަނެއްގައި މިދިޔަ މަހުގެ 19 ވަނަ ދުވަހު ހައްޔަރުކޮށްފައިވަނީ ހއ. ތުރާކުނު / އާހިޔާ، މަރްޔަމް ޒީނާ އެވެ.

ކޯޓު އަމުރެއްގެ ދަށުން ހިންގި މި އޮޕަރޭޝަންގައި ހުޅުމާލެ ފޭސް 1 ގައި ހުރި އެޕާޓްމަންޓެއް ބަލައި ފާސްކުރިއިރު، 14 ކިލޯއަށްވުރެ ގިނަ މަސްތުވާތަކެތި ކަމަށް ޝައްކުކުރެވޭ އެއްޗެހި ވަނީ އެތަނުން ފެނިފައެވެ.

މައްސަލައާ ގުޅިގެން ހައްޔަރުކުރި އަންހެންމީހާގެ ބަންދާމެދު ގޮތެއް ނިންމުމަށް އެންމެ ފުރަތަމަ ކޯޓަށް ހާޒިރުކުރުމުން، 15 ދުވަހުގެ މުއްދަތަށް ބަންދުގައި ބެހެއްޓުމަށް ކޯޓުން ވަނީ އަމުރު ކޮށްފައެވެ.

ބަންދުގެ މުއްދަތު އިއްޔެ ހަމަވުމުން، ކޯޓަށް ހާޒިރުކުރުމުން ކޯޓުން ވަނީ އޭނާގެ ބަންދަށް އިތުރު 15 ދުވަސް ޖަހާފައެވެ.

ކޯޓު އަމުރުން އެނގޭ ގޮތުގައި މި އޮޕަރޭޝަނުގައި އަތުލައިގަތް 14 ކިލޯގެ މަސްތުވާތަކެތީގެ ތެރޭގައި 12.28 ކިލޯގެ މެތާއި 1.58 ކިލޯގެ ހެރޮއިން ހިމެނެއެވެ.

ފުލުހުން ދަނީ މި މައްސަލަ ތަހުގީގު ކުރަމުންނެވެ.