ރާއްޖޭގައި ހުންނަވާ ޗައިނާގެ އެކްޓިން އެމްބެސެޑަރ: ޢައްޒާ "ހުހެއްނުކުރެވޭނެ"

ޢައްޒާގެ ރައްޔިތުން ބޭރުކޮށް ޣައްޒާ "ހުސްކުރަން" ރާވާ ރޭވުން ބަލައެއް ނުގަނެވޭނެ ކަމަށް ރާއްޖޭގައި ހުންނަ ޗައިނާ އެމްބަސީގެ އެކްޓިން އެމްބެސެޑަރ ހެ ފެން ވިދާޅުވެއްޖެއެވެ.

ދާދި ފަހުން އެމެރިކާއިން ވަނީ ޣައްޒާ "ކޮންޓްރޯލް" ކޮށް، ފަލަސްތީނުގެ ރައްޔިތުން އެހެން ގައުމުތަކަށް ބަދަލުކުރުމުގެ ޕްލޭނެއް ހުށަހަޅާފައެވެ.

މިކަމާއި ގުޅިގެން ރާއްޖޭގައި ހުންނަ ޗައިނާ އެމްބަސީގެ އެކްޓިން އެމްބެސެޑަރ ހެ ފެން "މޯލްޑިވްސް ޖާނަލް" ގައި ލިޔުއްވި ލިޔުއްވުމެއްގައި ވިދާޅުވީ "ކްލީން އައުޓް" ޣައްޒާގެ ވިސްނުމުގެ ސަބަބުން މެދުއިރުމަތީގެ ނުތަނަވަސްކަން އިތުރުވެގެންދާނެ ކަމަށެވެ.

އިސްރާއީލާއި ފަލަސްތީނުގެ ހަމަނުޖެހުންތައް ފެށި ފަހުން ޣައްޒާގައި ގާތްގަނޑަކަށް 50،000 މީހުންގެ ފުރާނަ ގެއްލިފައިވާ ކަމަށާއި އޭގެ ތެރެއިން 70 ޕަސެންޓަކީ އަންހެނުންނާއި ކުޑަކުދިން ކަމަށް އދ އިން ވަނީ ބުނެފައެވެ. މިދަނޑިވަޅުގައި ބައިނަލްއަޤްވާމީ މުޖުތަމަޢުއިން އަނިޔާއާއި އިހާނެތިކަން އިތުރުކުރުމުގެ ބަދަލުގައި ޚާއްޞަކޮށް ބޮޑެތި ބާރުތައް ގުޅިގެން، ޣައްޒާ އަލުން އާރާސްތުކުރުމަށް އިންސާނީ އެހީއާއި އެހީތެރިކަން ފޯރުކޮށްދިނުމަށް މަސައްކަތް ކުރަންޖެހޭ ކަމަށް ވެސް ހެ ފެން ވިދާޅުވިއެވެ.

ރާއްޖެއަށް ކަނޑައަޅުއްވާފައިވާ އެކްޓިންގ އެމްބެސިޑަރ ވިދާޅުވީ ޗައިނާއަކީ ފަލަސްޠީނުގެ ރައްޔިތުންނަށް އެމީހުންގެ ޤާނޫނީ ޤައުމީ ޙައްޤުތައް އިޢާދަކުރުމަށް އަބަދުވެސް ތާއީދުކުރާ ޤައުމެއްކަމަށާއި، އެއްބައިވަންތަކަން ހަރުދަނާކުރުމަށާއި، ބެއިޖިންގ ޑެކްލަރޭޝަން އޮން އެންޑިންގ ޑިވިޜަން އެންޑް ސްޓްރެންތިންގ ފަލަސްޠީނުގެ ޤައުމީ އެއްބައިވަންތަކަން ތަންފީޒުކުރުމުގައި ފަލަސްޠީނުގެ ހުރިހާ ޖަމާއަތަކަށް އަބަދުވެސް އެއްބާރުލުން ދެމުން އަންނަ ޤައުމެއް ކަމަށެވެ.

އަދި އދ.ގެ ފުރިހަމަ މެމްބަރަކަށް ވުމަށް ފަލަސްތީނަށް ޗައިނާއިން ވަރަށް ބޮޑަށް ތާއީދުކުރާއިރު، މިއަށްވުރެ ފުޅާ ދާއިރާއެއްގައި، ބާރުވެރި އަދި ހަރުދަނާ ބައިނަލްއަޤްވާމީ ސުލްހައިގެ ކޮންފަރެންސެއް ބޭއްވުމަށް ޗައިނާއިން ތާއީދު ކުރާ ކަމަށް ވެސް ވިދާޅުވިއެވެ.

"އަޅުގަނޑަށް ފާހަގަކުރެވުނީ، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވެސް ރިޔާސީ ބަޔާން އިއްވަވަމުން ފަލަސްޠީނުގެ ރައްޔިތުންގެ ޤާނޫނީ ޤައުމީ ޙައްޤުތައް ވަރަށް ބޮޑަށް ދިފާޢުކުރެއްވިތަން. ހަނގުރާމައާއި މީހުން މެރުމަށް ނިމުމެއް ގެނައުމަށާއި ފަލަސްތީނުގެ މައްސަލަ އަލުން ދެ ދައުލަތުގެ ހައްލުގެ ރަނގަޅު މަގަށް ގެނައުމަށް ރާއްޖެ ހިމެނޭ ގޮތަށް ބައިނަލްއަގްވާމީ މުޖުތަމައާ ގުޅިގެން މަސައްކަތް ކުރަން ޗައިނާ އިން ތައްޔާރަށް އޮތް އިރު، އަވަސް ތާރީހެއްގައި ފުރިހަމަ، އިންސާފުވެރި އަދި ދެމެހެއްޓެނިވި ހައްލެއް ހޯދުމުގެ މަގުސަދުގައި މަސައްކަތް ކުރަން ޗައިނާ އިން ތިބީ ތައްޔާރަށް." ހެ ފެންގެ ލިޔުއްވުމުގައި ވިދާޅުވެފައި ވެއެވެ.

އދ.ގެ ސަލާމަތީ މަޖިލީހުގެ ދާއިމީ މެމްބަރެއްގެ ހައިސިއްޔަތުން އަދި ޒިންމާދާރު ބޮޑު ބާރެއްގެ ހައިސިއްޔަތުން، ފަލަސްތީނުގެ މައްސަލައިގައި ސުލްހައާއި އިންސާނީ ވިސްނުމުގެ އެއްފަރާތުގައި ޗައިނާ އަބަދުވެސް ދެމިއޮންނާނެ ކަމަށާއި، ދެ ދައުލަތުގެ ހައްލު ތަންފީޒުކުރުމަށާއި، ސަރަހައްދުގެ ދެމެހެއްޓެނިވި ސުލްހައާއި ހަމަޖެހުމަށް މަގުފަހިކޮށްދީ، ދުނިޔޭގެ ސުލްހައާއި ކުރިއެރުމަށް ގިނަ ގުނަ މަސައްކަތްތަކެއް ކުރަމުން ގެންދާނެ ކަމަށް ރާއްޖޭގައި ހުންނަ ޗައިނާ އެމްބަސީގެ އެކްޓިން އެމްބެސެޑަރ ހެ ފެން ވިދާޅުވިއެވެ.

ޣައްޒާ "ހުސްކުރުމަށް" އެމެރިކާއިން ގެންގުޅޭ ޕްލޭން ބައިނަލްއަގުވާމީ ފަރާތްތަކުން ވަނީ ކުއްވެރިކޮށޤފައެވެ. އަރަބި ގައުމުތަކުން ވަނީ ފަލަސްތީނު މީހުން ބޭރުކުރުމާ ދެކޮޅަށް ނުވަތަ އެއްވެސް ސިފައެއްގައި ނުވަތަ އެއްވެސް ބަހަނާއެއް ދައްކައިގެން ފަލަސްތީނުގެ ބިމުން އެމީހުން ބަދަލުކުރުމަށް މަސައްކަތް ނުކުރުމަށް އެދިފައެވެ. ޔޫރަޕްގެ ގިނަ ގައުމުތަކުން އެމެރިކާގެ ވާހަކަތަކާ ވަރަށް ސާފުކޮށް ދެކޮޅު ހަދާފައިވެއެވެ.

2025 ވަނަ އަހަރަކީ އދ އުފެދުނުތާ 80 އަހަރު ފުރޭ އަހަރެވެ. އަނިޔާވެރިކަމާއި ދެކޮޅަށް ދުނިޔޭގެ ރައްޔިތުންގެ އަޑުތަކާއި ސުލްހައަށް އެދުމާއި އަދުލުވެރިކަމާއި އަދުލު އިންސާފު ދިފާއުކުރުމުގެ އަޑުތައް ދަނީ ގަދަވަމުންނެވެ.