ޖެނުއަރީ މަހު ރިޔާސީ ބަޔާން އިއްވަން ޖެހޭ ގޮތަށް ގަވާއިދު އިސްލާހު ކުރަނީ

ކޮންމެ އަހަރަކުމެ، މަޖިލީހުގެ ފުރަތަމަ ދައުރުގެ ފުރަތަމަ ޖަލްސާގައި ރައީސުލްޖުމްހޫރިއްޔާ އިއްވާ ރިޔާސީ ބަޔާން ޖެނުއަރީ މަހަށް ބަދަލުވާނެ ގޮތަށް ރައްޔިތުންގެ މަޖިލީހުގެ ގަވާއިދަށް އިސްލާހު ހުށަހަޅައިފިއެވެ.

މަޖިލީހުގެ ގަވާއިދު ބުނާ ގޮތުން މަޖިލީހުގެ ފުރަތަމަ ދައުރު ހިނގާނީ ފެބްރުއަރީ މަހުގެ އެއްވަނަ ދުވަހުން ފެށިގެން މޭ މަހުގެ 15 ވަނަ ދުވަހުގެ ނިޔަލަށެވެ.

އަދި ކޮންމެ އަހަރަކުމެ، މަޖިލީހުގެ ފުރަތަމަ ދައުރުގެ ފުރަތަމަ ޖަލްސާގައި ގައުމުގެ ހާލަތު ބަޔާންކޮށްދި އަދި ގައުމުގެ ހާލަތު އިތުރަށް ރަނގަޅުކުރުމަށްޓަކައި ކުރަންޖެހޭ ކަމަށް ރައީސުލްޖުމްހޫރިއްޔާއަށް ފެންނަ ކަންތައްތަކުގެ މައްޗަށް އެކުލެވޭ ރިޔާސީ ބަޔާނެއް މަޖިލީހުގެ ޖަލްސާއެއްގައި އިއްވަން ވާނެއެވެ.

ރައްޔިތުންގެ މަޖިލީހުގެ ފުރަތަމަ ދައުރު ކުރުކޮށްލުމަށް މަޖިލީހުގެ ގަވާއިދަށް އިސްލާހު ގެނައުމަށް ހުށަހެޅުއްވީ މާފަންނު ދެކުނު ދާއިރާގެ މެންބަރު އަބްދުﷲ ރިފާއުއެވެ.

މެންބަރު ވަނީ މަޖިލީހުގެ ގަވާއިދުގެ 24 ވަނަ މާއްދާގެ (ހ) ގައި މަޖިލީހުގެ ދައުރުތައް ބެހިގެންވާ ގޮތް އިސްލާހު ކުރުމަށް ހުށަހަޅާފައެވެ.

1. މަޖިލީހުގެ ފުރަތަމަ ދައުރު ހިނގާނީ ޖެނުއަރީ މަހުގެ ފުރަތަމަ ދުވަހުން ފެށިގެން ޖެނުއަރީ މަހުގެ ނިޔަލަށެވެ.

2. މަޖިލީހުގެ ދެވަނަ ދައުރު ހިނގާނީ އެޕްރީލް މަހުގެ ފުރަތަމަ ދުވަހުން ފެށިގެން ޖުލައި މަހުގެ ނިޔަލަށެވެ.

3. މަޖިލީހުގެ ތިންވަނަ ދައުރު ހިނގާނީ ސެޕްޓެމްބަރު މަހުން ފެށިގެން ނޮވެމްބަރު މަހުގެ ނިޔަލަށެވެ.

ފަހުގެ ތާރީޚުގައި ރިޔާސީ ބަޔާން އިއްވަމުން އައިސްފައިވަނީ ފެބްރުއަރީ މަހުގެ ފުރަތަމަ ހަފުތާއެވެ. ނަމަވެސް ހުށަހަޅާފައިވާ ގޮތަށް ގަވާއިދު އިސްލާހު ކޮށްފިނަމަ ދެން ރިޔާސީ ބަޔާން އިއްވަން ޖެހޭނީ ޖެނުއަރީ މަހުގެ ފުރަތަމަ ދުވަހުއެވެ.

މަޖިލީހުން މި އިސްލާހު ފާސްކުރަން ފަށާ ތާރީޚުން ފެށިގެން މި އިސްލާހަށް އަމަލުކުރާނެއެވެ. މި އިސްލާހު ބަލައިގަނެ ކަމާ ބެހޭ ކޮމިޓީއަށް މިހާރު ވަނީ ފޮނުވާފައެވެ.