ހޮނިހިރުގެ ކުރިން ހުރިހާ ރަހީނުން ދޫނުކޮށްފިނަމަ ހަނގުރާމަ އަލުން ފެށުމަށް ޓްރަމްޕް ގޮވާލައިފި

ހޮނިހިރު ދުވަހުގެ ކުރިން ޣައްޒާގައި ތިބި ހުރިހާ ރަހީނުން ދޫނުކޮށްފިނަމަ ހަނގުރާމަ އަލުން ފެށުމަށް ޓްރަމްޕް ގޮވާލައިފިއެވެ.

އެމެރިކާގެ ރައީސް ޓްރަމްޕް ވިދާޅުވެފައިވަނީ ހޮނިހިރު ދުވަހުގެ މެންދުރު 12:00 ގެ ކުރިން ހަމާސްއިން ހުރިހާ ރަހީނުން ދޫނުކޮށްފިނަމަ، އިޒްރޭލާއި ހަމާސްއާ ދެމެދު ވެފައިވާ ހަނގުރާމަ ހުއްޓާލުމުގެ އެއްބަސްވުން ބާތިލްކޮށް، އަލުން ހަނގުރާމަ ފެށުމަށް ގޮވާލައްވާ ކަމަށެވެ.

ވައިޓްހައުސްގައި ޓްރަމްޕް ނޫސްވެރިންނާ ވާހަކަދައްކަވަމުން ވިދާޅުވީ ހުރިހާ ރަހީނުން އެއްފަހަރާ ދޫކުރަންވާނެ ކަމަށާއި، އެކި ދުވަސްތަކުގައި މަދު އަދަދަކުން ދޫކުރުމަކީ ގަބޫލުކުރެވޭނެ ކަމެއް ނޫން ކަމަށެވެ.

މީގެ އިތުރުން، ޓްރަމްޕް ވިދާޅުވެފައިވަނީ އުރުދުނާއި މިސުރުން ފަލަސްތީނުގެ ރައްޔިތުން ބަލައިނުގަތުމުން އެ ގައުމުތަކަށް ދެމުންދާ އެހީ ހުއްޓާލުމަށްވެސް ވިސްނާނެ ކަމަށެވެ.

މިހާރު ހިނގަމުންދާ ހަނގުރާމަ ހުއްޓާލުމުގެ އެއްބަސްވުން ދެމިއޮންނާނީ މާރިޗު މަހުގެ ކުރީކޮޅާ ހަމައަށެވެ. މި އެއްބަސްވުމުގެ ދަށުން އިޒްރާއީލުގެ 33 ރަހީނުން ދޫކުރުމަށް ހަމަޖެހިފައިވެއެވެ.

މިދިޔައަހަރުގެ އޮކްޓޯބަރު 7 އިން ފެށިގެން ހިނގާފައިވާ ހަނގުރާމައިގައި މިހާތަނަށް 48،000 އަށްވުރެ ގިނަ މީހުން މަރުވެފައިވާއިރު، ގާޒާ ވަނީ ބޮޑުތަނުން ހަލާކުވެފައެވެ.

ޣައްޒާގެ ރައްޔިތުން ޣައްޒާއިން ނެރެލައި، އެހެން ގައުމުތަކަށް ބަދަލުކުރުމުގެ ވާހަކަ އަކީ ޓްރަމްޕްގެ އިތުރުން އިޒްރާއީލުން ކުރިން ވެސް ދައްކަމުން އައި ވާހަކައެކެވެ. ސަރަހައްދީ ގައުމުތަކުން މިކަމާ ދެކޮޅުހަދާއިރު، ޖޯޑަނުގެ ރަސްގެފާނު އަބްދުﷲ ވަނީ ޣައްޒާ ރައްޔިތުން އުރުދުނަށް ބަދަލުކުރުމަކީ "ރަތް ރޮނގު ހުރަސްކުރުން" ކަމަށް ވިދާޅުވެފައެވެ.