ޕެންޝަން އޮފީހުން ސްކޮލަރޝިޕް ޕްރޮގްރާމެއް ތަޢާރަފްކޮށްފި

މާލީ ދާއިރާއިން ފަންނީ މީހުން ބިނާކުރުމާއި ގުޅޭ ހާއްސަ ސްކޮލަޝިޕް ޕްރޮގްރާމެއް، ޕެންޝަން އޮފީހުން ތައާރަފުކޮށްފިއެވެ.

އެ އޮފީހުން ބުނީ މި ޕްރޮގްރާމުގެ ދަށުން ކިޔެވުމަށް ކަނޑައަޅާ ދާއިރާތަކާއި ސްކޮލަަޝިޕްގެ އަދަދު ޕެންޝަން އޮފީހުން އަހަރަކު އެއް ފަހަރު އިއުލާންކުރާނެކަމަށެވެ.

އެގޮތުން މި އަހަރަށް އެއް އަންޑަގްރެޖުއޭޓް ސްކޮލަޝިޕް އިއުލާންކޮށްފައިވާއިރު ކިޔެވުމުގެ ހުރިހާ ހަރަދެއް ޕެންޝަން އޮފީހުން ދޭނެއެވެ.

ޕެންޝަން އޮފީހުން ބުނީ، މި ޕްރޮގްރާމުގެ އަމާޒަކީ ރާއްޖޭގެ މާލީ ދާއިރާއަށް ބޭނުންވާ ތަފާތު ރޮނގުތަކުން މަތީ ތައުލީމު ހާސިލުކޮށް، ކުރިއަށް ދިއުމަށް އެދޭ ހުނަރުވެރި ދިވެހިންނަށް އެ ފުރުސަތު ހޯދައިދީ، މާލީ ދާއިރާގައި މަސައްކަތްކުރާނެ ގާބިލު މީހުން ބިނާކުރުންކަމަށެވެ.

އެ އޮފީހުން ބުނިގޮތުގައި މެރިޓް ބޭސްޑް ޕްރޮގްރާމެއްގެ ގޮތުގައި ހިންގުމަށް ހަމަޖެހިފައިވާ މި ޕްރޮގްރާމަކީ، ދުނިޔޭގެ ޔުނިވަސިޓީ ރޭންކިންއަށް ބަލައި ފެންވަރު ރަނގަޅު ޔުނިވަސިޓީތަކުން އަންޑަގްރެޖުއޭޓް އަދި ޕޯސްޓްގްރެޖުއޭޓް ޕްރޮގްރާމުތަކުގައި ކިޔެވުމުގެ ފުރުސަތު ލިބިގެންދާނެ ޕްރޮގްރާމެކެވެ.