ޔުކްރެއިނުން ފިލައިގެން ރުމޭނިއާއަށް އައި މީހުންގެ އަދަދު 11 މިލިއަނަށްވުރެ އިތުރުވެއްޖެ

ޔުކްރެއިންގެ ބިމުން ފިލައިގެން ރުމޭނިއާއަށް އައި މީހުންގެ އަދަދު 11 މިލިއަނަށްވުރެ އިތުރުވެއްޖެއެވެ.

ރުމޭނިއާގެ ބޯޑަރ ފުލުހުން ހާމަކުރި މައުލޫމާތުގައިވާ ގޮތުން، 2022 ވަނަ އަހަރުގެ ފެބްރުއަރީ 10 އިން 2025 ވަނަ އަހަރުގެ ޖަނަވަރީ 15 އާ ހަމައަށް، 11,005,575 ޔުކްރެއިން ރައްޔިތުން ރުމޭނިއާއަށް ވަދެފައިވެއެވެ.

ބޯޑަރ ފުލުހުން ބުނީ ޔުކްރެއިންގެ ރައްޔިތުންނަށް ބޯޑަރ ކޮންޓްރޯލް ފޯމަލިޓީތައް ކުރިއަށް ގެންދަނީ ގައުމީ އަދި ކޮމިއުނިޓީ ގަވާއިދުތަކާ އެއްގޮތަށް ކަމަށެވެ.

އދ. ގެ ރެފިއުޖީ އެޖެންސީގެ ތަފާސް ހިސާބުތަކުން ދައްކާ ގޮތުގައި 2022 ވަނަ އަހަރުގެ ފެބްރުއަރީ މަހުން ފެށިގެން 6.8 މިލިއަން ޔުކްރެއިން ރައްޔިތުން އެ ގައުމުން ބޭރަށް ހިޖުރަކޮށްފައިވެއެވެ. މީގެ ތެރެއިން ގިނަ އަދަދެއްގެ މީހުން، ނުވަތަ 6.2 މިލިއަން މީހުން ވަނީ ޔޫރަޕްގައި ވަޒަންވެރިވެފައެވެ.

2022 ވަނަ އަހަރުގެ ފެބްރުއަރީ މަހު ރަޝިއާއިން ޔުކްރެއިންއަށް ހަމަލާތައް ދޭން ފެށުމާ ގުޅިގެން، އެތައްހާސް ޔުކްރެއިން ރައްޔިތުން ވަނީ އެހެން ޤައުމުތަކަށް ރައްކާތެރިކަން ހޯދުމަށް ފިލައިގެން ގޮސްފައެވެ.

މި ހަނގުރާމައިގެ ސަބަބުން، ދެވަނަ ބޮޑު ހަނގުރާމައަށް ފަހު ޔޫރަޕްގައި ދިމާވި އެންމެ ބޮޑު ރެފިއުޖީ ހާލަތު ކުރިމަތިވެފައިވާކަމަށް އދ. އިން ވަނީ ބުނެފައެވެ.

ޔުކްރެއިންގެ އަވައްޓެރި ގައުމުތަކުގެ ތެރެއިން ޕޮލެންޑް، ރުމޭނިއާ، މޮލްޑޯވާ އަދި ހަންގޭރީ ފަދަ ގައުމުތަކަށް ވަރަށް ގިނަ އަދަދެއްގެ ރެފިއުޖީން ވަނީ ހިމާޔަތަށް އެދިފައެވެ. މި ގައުމުތަކުން ޔުކްރެއިންގެ ރެފިއުޖީންނަށް ވަގުތީ ރައްކާތެރިކަމާއި އެހީތެރިކަން ފޯރުކޮށްދީފައިވެއެވެ.

މީގެ އިތުރުން، ޔޫރަޕިއަން ޔޫނިއަންގެ އެހެން ގައުމުތަކުންވެސް ވަނީ ޔުކްރެއިންގެ ރެފިއުޖީންނަށް ވަގުތީ ހިމާޔަތް ދިނުމާއެކު، ތައުލީމާއި ސިއްހީ ފަރުވާގެ ޚިދުމަތްތައް ފޯރުކޮށްދީފައެވެ.

އދ. ގެ ރެފިއުޖީ އެޖެންސީން ބުނާ ގޮތުގައި، ގިނަ އަދަދެއްގެ ޔުކްރެއިން ރައްޔިތުން އަދިވެސް އެދެނީ ހަނގުރާމަ ނިމުމުން އެނބުރި ޔުކްރެއިންއަށް ދިއުމަށެވެ. ނަމަވެސް ޔުކްރެއިންގެ ގިނަ ސަރަހައްދުތަކުގައި މިވަގުތު އަމާންކަން ނެތުމާއި، އަސާސީ ވަސީލަތްތަކަށް ލިބިފައިވާ ގެއްލުމުގެ ސަބަބުން، ގިނަ ރައްޔިތުން އެނބުރި ދިއުމަށް ދަތިތަކާ ކުރިމަތިވާނެކަމަށް ބެލެވެއެވެ.