ރަޝިއާގެ ތެޔޮ އިމްޕޯޓްކުރުމަށް އިންޑޮނޭޝިއާ އިން ވިސްނަނީ

ބްރިކްސްއާ ގުޅުމަށްފަހު ރަޝިއާގެ ތެޔޮ އިމްޕޯޓްކުރުމަށް އިންޑޮނޭޝިއާއިން ވިސްނަމުންދާ ކަމަށް އެގައުމުން ބުނެފިއެވެ.

އިންޑޮނޭޝިއާގެ އެނަރޖީ އަދި މިނަރަލް ރިސޯސަސްގެ މިނިސްޓަރު ބަހްލިލް ލަހަދާލިއާ ވިދާޅުވި ގޮތުގައި، މިދިޔަ ހަފްތާގައި ބްރިކްސްއާ ގުޅުމަށްފަހު، ބައިނަލްއަޤްވާމީ ގަވާއިދުތަކާ އެއްގޮތްވާ ގޮތުގެމަތިން ރަޝިއާއިން އަގުހެޔޮކޮށް ތެޔޮ އިމްޕޯޓްކުރުމުގެ ފުރުސަތު އެ ގައުމުން ދަނީ ދިރާސާކުރަމުންނެވެ.

ބްރެޒިލްގެ ރިޔާސަތުގެ ދަށުން ހިނގަމުންދާ ބްރިކްސްއާ އިންޑޮނޭޝިއާ ގުޅުމާއެކު، މި އިއްތިހާދުގެ މެންބަރުންގެ އަދަދު 11 އަށް އިތުރުވެފައިވެއެވެ. މިހާރު ބްރިކްސްގައި ހިމެނެނީ ބްރެޒިލް، ރަޝިއާ، އިންޑިއާ، ޗައިނާ، ސައުތު އެފްރިކާ، ސަޢޫދީ އަރަބިއްޔާ، މިސުރު، ޔޫއޭއީ، އީތިއޯޕިއާ، އީރާން އަދި އިންޑޮނޭޝިއާއެވެ.

ނަމަވެސް މި ފުރުސަތު ތަންފީޒުކުރުމުގައި ގޮންޖެހުންތަކެއް ކުރިމަތިވެދާނެ ކަމަށް ބެލެވެއެވެ. އެމެރިކާ ސަރުކާރުން ފާއިތުވި ހަފްތާގައި ރަޝިއާގެ ތެލުގެ ވިޔަފާރިއަށް މިހާތަނަށް އަޅާފައިވާ އެންމެ ހަރުކަށި ފިޔަވަޅުތައް އަޅާފައިވެއެވެ. މީގެ ތެރޭގައި ރަޝިއާގެ ބޮޑު ދެ ތެޔޮ ކުންފުންޏެއް ކަމަށްވާ ގާޒްޕްރޮމް ނެފްޓް އަދި ސަރގުޓްނެފްޓެގާޒް އާއި، 183 އުޅަނދު އަދި ގިނަ އަދަދެއްގެ ތެލުގެ ވިޔަފާރިވެރިންނާއި ޚިދުމަތްދޭ ފަރާތްތައް ހިމެނެއެވެ.

މި ފިޔަވަޅުތަކުގެ ސަބަބުން ރަޝިއާގެ އެންމެ ބޮޑު ތެޔޮ އިމްޕޯޓްކުރާ ދެ ގައުމު ކަމަށްވާ އިންޑިއާ އާއި ޗައިނާގެ މާކެޓަށްވެސް އަސަރުކުރަން ފަށާފައިވެއެވެ. އިންޑިއާގެ ތެޔޮ ރިފައިނަރީތަކުން އެމެރިކާގެ ދަށުން ހިމެނޭ ރަޝިއާގެ އުޅަނދުފަހަރާއި އެހެނިހެން ފަރާތްތަކާއެކު މުޢާމަލާތްކުރުން ހުއްޓާލާފައިވާކަމަށް އިންޑިއާ ސަރުކާރުގެ އިސް ވެރިއެއް ރޮއިޓަރޒްއަށް މަޢުލޫމާތު ދެއްވާފައިވެއެވެ.

މިހާލަތުގައި އިންޑޮނޭޝިއާއަށް ބައިނަލްއަޤްވާމީ ގަވާއިދުތަކާ އެއްގޮތަށް ރަޝިއާގެ ތެޔޮ އިމްޕޯޓްކުރުމަކީ ގޮންޖެހުންތަކެއް ހުރި ކަމެއް ކަމަށް ވާނެއެވެ.