ތުރުކީއަކީ އަލަށް ކުރިމަތިވި ސަރަހައްދީ ނުރައްކަލެއް، ހަމަލާދޭން ޖެހިދާނެ: އިޒްރާއީލް

ތުރުކީއަކީ މެދު އިރުމަތީގައި އަލަށް އުފެދިފައިވާ ނުރައްކަލެއް ކަމަށް ބުނެ، ތުރުކީއަށް ސީދާ ހަމަލާދޭން ޖެހިދާނެކަމަށް އިޒްރާއީލުން ބުނެފިއެވެ.

އިޒްރާއީލް ސަރުކާރުން އެކުލަވާލާފައިވާ ސަލާމަތީ ލަފާދޭ ކޮމިޓީން ހޯމަ ދުވަހު ބެންޔަމިން ނަތަންޔާހޫގެ ސަރުކާރަށް ހުށަހެޅި ރިޕޯޓެއްގައި ބުނެފައިވަނީ ތުރުކީން އޮޓޯމަން ޚިލާފަތުގެ ނުފޫޒު އަލުން ގާއިމުކުރަން މަސައްކަތްކުރާ ކަމަށާއި، މިކަމަކީ އިޒްރާއީލުގެ މަސްލަހަތުތަކަށް ނުރައްކާވެދާނެ ކަމެއް ކަމަށެވެ.

މި ރިޕޯޓު ހުށަހަޅާފައި ވަނީ އިޒްރާއީލުގެ ބޮޑުވަޒީރު ނަތަންޔާހޫގެ އިތުރުން ދިފާއީ ވަޒީރު އިޒްރާއީލް ކަޓްޒް އަދި މާލީ ވަޒީރު ބެޒަލަލް ސްމޮޓްރިޗް އަށެވެ.

އެރިޕޯޓްގައި ފާހަގަކޮށްފައިވާ ގޮތުގައި ސީރިއާގައި ތުރުކީ ސަރުކާރުން ބާރުވެރިކުރުވާފައިވާ ހަތިޔާރުއެޅި ޖަމާއަތްތައް މެދުވެރިކޮށް އިޒްރާއީލްގެ ހަމަޖެހުމަށް ނުރައްކާވެދާނެ ކަމަށް ބެލެވެއެވެ.

ވޭތުވެދިޔަ މަހުގެ ތެރޭގައި އިޒްރާއީލުގެ ގިނަ ސިޔާސީ އަދި އަސްކަރީ އިސް ފަރާތްތަކުން ވެސް މިފަދަ އިންޒާރުތައް ދީފައިވެއެވެ. އެފަރާތްތަކުން ދެކޭ ގޮތުގައި އާ ސީރިއާ ސަރުކާރާއި ތުރުކީ ސަރުކާރާ ދެމެދު އޮތް ގާތް ގުޅުމަކީ އިޒްރާއީލުގެ މަސްލަހަތުތަކަށް ހުރަސްތަކެއް ކުރިމަތިވެދާނެ ކަމެކެވެ.

ރިޕޯޓުގައި ފާހަގަކޮށްފައިވާ ގޮތުގައި ސީރިއާއިން ކުރިމަތިވެދާނެ ނުރައްކާ، އީރާނުގެ ނުރައްކަލަށްވުރެ މާ ބޮޑުވެގެން ހިނގައިދާނެއެވެ. އީރާނަކީ އިޒްރާއީލުގެ ސަރަހައްދީ ވާދަވެރިއެއްގެ ގޮތުގައި ފާހަގަކުރެވޭ ގައުމެކެވެ. އެގައުމުން ސީރިއާގެ ކުރީގެ ރައީސް އަސަދުގެ ވެރިކަމަށް އެހީތެރިކަން ފޯރުކޮށްދެމުން އައިސްފައި ވެއެވެ.

އިޒްރާއީލުގެ ދިފާއީ ބަޖެޓު މިހާރުވެސް ވަރަށް ބޮޑުކަމަށް ފާހަގަކުރެވޭއިރު، ކުރިއަށް އޮތް ފަސް އަހަރު ދުވަހުގެ ތެރޭގައި އަހަރަކު 4.1 ބިލިއަން ޑޮލަރު އިތުރުކުރުމަށް ކޮމިޓީން ހުށަހަޅާފައިވެއެވެ. މީގެ އިތުރުން އެފް-15 ހަނގުރާމަ މަތިންދާބޯޓު އިތުރުކުރުމަށާއި، ޑްރޯން އަދި ސެޓެލައިޓް އިތުރުކުރުމަށްވެސް ހުށަހަޅާފައިވެއެވެ. އަދި ވައިގެ ދިފާއީ ނިޒާމު ހަރުދަނާކުރުމަށާއި، ޖޯޑަން ވެލީގެ ސަރަހައްދުގައި އިތުރު ސެކިއުރިޓީ ބެރިއާއެއް ޤާއިމުކުރުމަށްވެސް ހުށަހަޅާފައިވެއެވެ.

މި ރިޕޯޓާ ގުޅިގެން އިޒްރާއީލުގެ ބޮޑުވަޒީރު ނަތަންޔާހޫ ބުނީ މެދުއިރުމައްޗަށް މިހާރު ދަނީ އަސާސީ ބަދަލުތަކެއް އަންނަމުން ކަމަށެވެ. އަދި އެންމެ ބޮޑު ނުރައްކަލަކަށް އޮތީ އީރާން ކަމުގައިވީ ނަމަވެސް، އަލަށް އިތުރު ބާރުތަކެއް މި ސަރަހައްދަށް ވަންނަމުންދާ ކަމަށާއި، މިކަމަށް ތައްޔާރުވާން ޖެހޭނެ ކަމަށެވެ.