ކުޅިވަރު ދާއިރާ ކުރިއަރުވަން ޗައިނާގެ ޝިއަމެން ސިޓީއާއެކު މަޝްވަރާކޮށްފި

ރާއްޖޭގެ އެތުލީޓުން ޗައިނާގެ ޝިއަމެންއަށް ފޮނުވައިގެން ކުޅިވަރު ތަމްރީނުތައް ހެދުމުގެ ފުރުސަތު ފަހިކުރުމަށާއި، ޒިއަމެންގެ އެތުލީޓުން ރާއްޖެ ގެނެސްގެން ކުޅިވަރުގެ ދާއިރާއިން ގުޅުން ބަދަހިކުރުމަށް މަޝްވަރާ ކުރައްވާފައިވާކަމަށް ސްޕޯޓްސް މިނިސްޓަރު އަބްދުﷲ ރާފިއު ވިދާޅުވެއްޖެއެވެ.

މިނިސްޓަރު މިހެން ވިދާޅުވީ "ސީ އެންޑް ޑީ ޝިއަމެން މެރަތަން 2025" ގައި ބައިވެރިވެވަޑައިގަތުމަށް ޗައިނާއަށް ކުރެއްވި ދަތުރުފުޅުގެ ތެރެއިން، ޒިންހުއާ ގްލޯބަލް ސާވިސްއަށް ދެއްވި ބަސްދީގަތުމެއްގައެވެ.

މިނިސްޓަރު ވިދާޅުވިގޮތުގައި ފޫޖިއާން ޕްރޮވިންސްގެ އައްސޭރިފަށުގައި އޮންނަ ސިޓީއެއް ކަމަށްވާ ޝިއަމެންއަކީ ކުޅިވަރުގައި ވަރަށް ކުރިއަރާފައިވާ ސަރަހައްދެކެވެ. އަދި ދެ ގައުމުން ގުޅިގެން އެކްސްޗޭންޖް ޕްރޮގްރާމުތައް ކުރިއަށް ގެންދިއުމާއި، ކުޅިވަރުގެ ދާއިރާއިން އެއްބާރުލުން އިތުރު ކުރެވޭނެ ކަމަށް އުންމީދު ކުރައްވާ ކަމަށްވެސް މިނިސްޓަރު ވިދާޅުވިއެވެ.

މީގެ އިތުރުން، ޝިއަމެންއަކީ ޓެކްނޮލޮޖީ އާއި ކުޅިވަރުގެ ދާއިރާއިން ވަރަށް ކުރިއަރާފައިވާ ތަނެއް ކަމަށާއި، ރާއްޖެއަށް ކުޅިވަރު ކުރިއެރުވުމުގައި ޝިއަމެންގެ އެހީ ހޯދޭނެ ގޮތްތަކާ ގުޅޭ ގޮތުންނާއި، އެތުލީޓް އެކްސްޗޭންޖް ޕްރޮގްރާމެއް ފެށުމަށް މަޝްވަރާ ކުރައްވާފައިވާ ކަމަށްވެސް މިނިސްޓަރު ރާފިއު ވިދާޅުވިއެވެ.

އަދި ކޮންމެ ހަފްތާއަކު ޝިއަމެން އިން ރާއްޖެއަށް ސީދާ ދަތުރުކުރާ ދެ ފްލައިޓް އޮންނަ ކަމަށާއި، މިއީ ދެގައުމުގެ ރައްޔިތުންގެ މެދުގައި ގުޅުން ބަދަހިކުރުމަށް އޮތް ފުރުސަތެއް ކަމަށްވެސް އޭނާ ފާހަގަކުރެއްވިއެވެ.

މި ދަތުރުފުޅުގައި މިނިސްޓަރު ވަނީ މިދިޔަ އާދިއްތަ ދުވަހު ޝިއަމެން މެރަތަންގައި ފަސް ކިލޯ މީޓަރުގެ ދުވުން ފުރިހަމަ ކުރައްވާފައެވެ. މި މެރަތަންގައި 42 ގައުމަކުން ޖުމްލަ 35،000 މީހުން ބައިވެރިވެފައިވެއެވެ.

މިނިސްޓަރު ރާފިޢުއަށް މި މެރަތަންގައި ބައިވެރިވެވަޑައިގަތުމަށް ދައުވަތު ލިބިވަޑައިގެންނެވީ މިދިޔަ އަހަރުގެ ސެޕްޓެމްބަރުގައި ލާމު އަތޮޅުގައި ކުރިއަށް ގެންދިޔަ ޝިއަމެން ލާމު މެރަތަންގެ ތެރެއިންނެވެ.