ކީރިތި ޤުރުއާނުގެ އަޚްލާގުން ޒީނަތްތެރިވުމުން ދެދުނިޔޭގެ ބާއްޖަވެރިކަން ލިބޭނެ: ޚުތުބާ

ކީރިތި ޤުރުއާނުގެ އަޚްލާގުން ޒީނަތްތެރިވުމުން ދެދުނިޔޭގެ ބާއްޖަވެރިކަން ލިބޭނެކަމަށް މިއަދުގެ ހުކުރު ޚުތުބާގައި ބުނެފިއެވެ.

ހުކުރު ޚުތުބާގެ މިއަދުގެ މައުޟޫއުއަކީ "ކީރިތި ޤުރުއާނުގެ އަހުލުވެރިންގެ އަދަބުތައް" މިއެވެ.

ކީރިތި ޤުރުއާނަކީ މާތް ﷲ އެކަލާނގެ ރަސޫލާ މުހައްމަދު ﷺ އަށް ބާވާލެއްވި އެކަލާނގެ ކަލާމްފުޅުކަން ބަޔާންކޮށް ޚުތުބާގައި ބުނެފައިވަނީ ކީރިތި ޤުރުއާނަކީ މާތް ﷲ އިންސާނުންނަށް ތެދުމަގު ދެއްކެވުމަށްޓަކައި ބާވާލެއްވި އިލާހީ ޤާނޫނުކަމަށެވެ.

އަދި އެއީ މުސްލިމުން ދިރިއުޅެންވީ ގޮތުގެ މަންހަޖުކަމަށާއި އެހެންކަމުން އަހުރެމެން މުސްލިމުން ކީރިތި ޤުރުއާން ކިޔަވައި، އެފޮތާއި އެއްގޮތަށް އުޅުމާއި ސުލޫކު ބައްޓަން ކުރަންޖެހޭކަމަށްވެސް ޚުތުބާގައި ބުނެފައިވެއެވެ.

ޚުތުބާގައި ބުނެފައިވަނީ އަހުރެމެންގެ ދަރީންނަށް ކީރިތި ޤުރުއާން އުނގަންނައިދޭން ޖެހޭކަމަށާއި އެކުދިންގެ ހިތްތަކުގައި ކީރިތި ޤުރުއާނުގެ ލޯބި އަށަގަންނުވައި އެފޮތުގެ މަތިވެރިކަމާއި މާތްކަން ދަސްކޮށްދޭން ޖެހޭކަމަށެވެ. އަދި ކީރިތި ޤުރުއާންއަށް އިޙްތިރާމް ކުރަން ދަސްކޮށްދޭން ޖެހޭކަމަށްވެސް ޚުތުބާގައި ބުނެފައިވެއެވެ.

ހުކުރު ޚުތުބާގައި އިތުރަށް ބުނެފައިވަނީ ކީރިތި ޤުރުއާނަކީ ބަލާޣާތްތެރިކަމާއި ފަޞާހާތްތެރިކަމުގައިވެސް މުއުޖިޒާތެއްކަމަށާއި ޖާހިލީ ޒަމާނުގައި އަރަބީންގެ ތެރޭގައި އުޅުނު އެންމެ ފަޞާހާތްތެރީންވެސް ވަނީ އެފަދަ ޤުރުއާނެއް ގެނައުމަށް ނުކުޅެދިފައިވާކަމަށެވެ.

އެކަލަށް އިޝާރާތްކުރައްވާ މާތް ﷲ سبحانه وتعالى ވަހީކުރެއްވި ބަސްފުޅެއްގެ މާނާގައިވަނީ:

"ކާލޭގެފާނު ވިދާޅުވާށެވެ! ހަމަކަށަވަރުން މި ޤުރުއާނާ އެއްފަދަ އެއްޗެއް ގެނައުމަށް އިންސީންނާއި ޖިންނީން އެއްވިނަމަވެސް އެއާ އެއްފަދަ އެއްޗެއް އެއުރެންނަކަށް ނުގެނެވޭނެއެވެ. އެއުރެންގެ އެއްބަޔަކު އަނެއްބަޔަކަށް ވާގިވެރިންކަމުގައި ވީނަމަވެސްމެއެވެ."

ޚުތުބާގައި ބުނެފައިވަނީ ކީރިތި ޤުރުއާން ބާވާލެއްވީ ﷲ ތައާލާ އެފޮތުގެ ކުރިން ބާވާލެއްވި ހުރިހައި ފޮތްތަކެއް ތެދުކުރަނިވި އަދި އެ ފޮތްތަކުގެ މައްޗަށް ހެކިވަނިވި ފޮތެއްގެ ގޮތުގައިކަމަށެވެ.

އަދި ކީރިތި ޤުރުއާން ކިޔެވުމާއި އެފޮތަށް އަމަލުކުރުމަކީ އަހަރެމެންގެ މައްޗަށް ވާޖިބު ކަމަކަށްވީ ހިނދު ޤުރުއާނުން މީހާ ޒީނަތްތެރިވުމަކީ ވެސް ވާޖިބު ކަމަށްވެސް ޚުތުބާގައި ބުނެފައިވެއެވެ.

އެގޮތުން ތިމާގެ އެތެރެފުށާއި ބޭރުފުށުގެ ތާހިރުކަމަކީ އެންމެ ފުރަތަމަ ޒީނަތްކަމަށާއި ދެވަނަ ޒީނަތަކީ ﷲއަށް ބިރުވެތިވުމުގައި ތިމާގެ ނަފުސު ޒީނަތްތެރިކުންކަމަށް ޚުތުބާގައި ބުނެފައިވެއެވެ.

ﷲ ވަހީކުރެއްވި ބަސްފުޅެއްގެ މާނާގައިވަނީ:

"ﷲ އެންމެ ރިވެތި ބަސްތައް ފޮތެއްގެ ސިފައިގައި ބާވާލެއްވިއެވެ، (ފުރިހަމަކަމުގައި) އެއްފަދަވެގެންވާ ތަކުރާރުކޮށް ކިޔެވޭ ފޮތަކަށްވާ ހާލުގައެވެ. އެފޮތް ކިޔެވޭ ހިނދު އެއުރެންގެ ވެރިރަސްކަލާނގެއަށް ބިރުވެތިވާމީހުންގެ ގައިގެހަންތައް ތުރުތުރުއަޅައިގެންދެއެވެ. ދެން އެއުރެންގެ ގައިގެ ހަތްކަތާއި ހޮތްތައް ﷲ ހަނދުމަކުރުމަށް މަޑުމޮޅިވެދެތެވެ. އެއީ ﷲ ގެ ތެދުމަގެވެ. އެކަލާނގެ އިރާދަކުރައްވާ މީހަކަށް އެއިން މަގު ދައްކަވަތެވެ. އަދި ﷲ މަގުފުރައްދަވާ މީހަކަށް ފަހެ ތެދުމަގު ދައްކަވާނެ ހަމަ އެކަކުވެސް ނުވެއެވެ.

ޤުރުއާނުން ޒީނަތްތެރިވުމުގައި ތިންވަނަ ޒީނަތަކީ އެފޮތުގައިވާ އެންމެހައި ކަމެއް ތެދުކުރުންކަން ފާހަގަކޮށް ޚުތުބާގައި ބުނެފައިވަނީ ﷲގެ އެއްކައުވަންތަކަން ގަބޫލުކޮށް އީމާންކަމާއި އިސްލާމްކަމުގައި ރުކުންތައް ތެދުކޮށް ގަބޫލުކުރާނަމަ ތިމާގެ އަމަލާއި ބަސް ދިމާވާން ޖެހޭނެކަމަށެވެ.

އަދި ޤުރުއާނުން ޒީނަތްތެރިވުމުގައި ހަތަރު ވަނަ ޒީނަތަކީ މަޑުމައިތިރިވުމާއި ކެތްތެރިކަން ކަމަށްވެސް ހުކުރު ޚުތުބާގައި ބުނެފައިވެއެވެ.

ޚުތުބާގައި ބުނެފައިވަނީ ކެތްތެރިވުމާއި ބެހޭގޮތުން ކީރިތި ޤުރުއާނުގައި ވަރަށް ގިނަ އާޔަތްތައް އައިސްފައިވާކަމަށާއި އެހެންވެ އެކަމުގެ މުހިއްމުކަން އެނގޭކަމަށެވެ.

މީގެއިތުރުން ކީރިތި ޤުރުއާނުގެ އަޚްލާގުން ޒީނަތްތެރިވުމަކީ އެކަމުގެ ސަބަބުން ގިނަގުނަ ދަރުމައާއި ޘަވާބު ލިބޭނެކަމެއްކަމަށާއި އަދި އެއީ ދެދުނިޔޭގެ ބާއްޖަވެރިކަން ލިބޭނެ ކަމެއްކަމަށް ވެސް ޚުތުބާގައި ބުނެފައިވެއެވެ