މި ސަރުކާރު ވެރިކަމާއި ހަވާލުވުމަށްފަހު މިހާތަނަށް މަސްވެރިންނަށް 981 މިލިޔަން ރުފިޔާ ދޫކޮށްފައިވާކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮންޕެނީ ލިމިޑެޓް (މިފްކޯ)އިން ބުނެފިއެވެ.
މިފްކޯއިން ބުނިގޮތުގައި މި ސަރުކާރު ވެރިކަމާއި ހަވާލުވުމަށްފަހު 17 ނޮވެމްބަރ 2023 އިން 28 ޑިސެމްބަރ 2024 ގެ ނިޔަލަށް މިފްކޯއަށް 55،925 މެޓްރިކް ޓަނުގެ މަސް ވަނީ ކިރުވާފައެވެ. އަދި ކިރުވާފައިވާ މަހަށް 981،126،385 ރުފިޔާ މަސްވެރިންނަށް ވަނި ދީފައެވެ.
މަސްވެރިންނަށް 48 ގަޑިއިރުގެ ތެރޭގައި ފައިސާ ދޫކުރުމުގައި ބޭންކް އޮފް މޯލްޑިވްސްއާއި، މާލީ ވުޒާރާއާއި މަސްވެރިކަމާއި ކަނޑުގެ ވަސީލަތްތަކާއި ބެހޭ ވުޒާރާގެ ފަރާތުން ވަރަށް ބޮޑު އެހީތެރިކަމަކާއި އެއްބާރުލުމެއް ލިބެމުންދާކަމަށް މިފްކޯއިން ބުނެފައިވެއެވެ.
މަސްވެރިން ކިރުވާ މަހަށް 48 ގަޑިއިރު ތެރޭގައި ފައިސާ ދިނުމަކީ ރައީސް މުޢިއްޒުގެ ރިޔާސީ ވަޢުދުފުޅެކެވެ. ވެރިކަމާއި ހަވާލުވުމަށްފަހު ރައީސް ވަނީ މި ވަޢުދު ފުއްދެވުމަށްޓަކައި މިފްކޯގެ ހިންގުން ހަރުދަނާ ކުރައްވައި، މަސްވެރިންނަށް ނުދެވި ހުރި ފައިސާ ވީއެންމެ އަވަހަކަށް ޖަމާކުރުމަށް ބޮޑު އިސްކަމެއް ދެއްވާފައެވެ.