އަމީންގެ ކާފަދަރިކަނބަލުން ފައްޔާޒަށް: ތި ދައްކަނީ އިސްލާމީ ހަމަތަކުންވެސް ބޭރު ވާހަކަ

މީހުން ހަވަރަށް ދީ "މަރަން" ތާއީދުކޮށް އެމްޑީޕީގެ ޗެއާޕާސަން ފައްޔާޒް އިސްމާއީލް ދައްކާފައިވަނީ އިސްލާމީ ހަމަތަކުންވެސް ބޭރު ވާހަކައެއް ކަމަށް ކުޜިގެ ރައީސް މުހައްމަދު އަމީންގެ ކާފަ ދަރިކަނބަލުން ޑރ. ފަރަހަނާޒް ފައިޒަލް ވިދާޅުވެއްޖެއެވެ.

އޭނާ މިހެން ވިދާޅުވެފައި މިވަނީ ރައްޔިތުންނަށް ދެރަދިނީމަ، ރާއްޖޭގެ ފުރަތަމަ ރައީސް މުހައްމަދު އަމީނަށް ހެދިހެން ހަދަން ޖެހޭ ކަމަށް ވިިދާޅުވެ ފައްޔާޒް ދައްކަވާފައިވާ ވާހަކަ އަށް އިޝާރާތްކޮށް ކުރެއްވި ޕޯސްޓެއްގައެވެ.

ފަރަހަނާޒް ވިދާޅުވީ އިސްލާމީ ޝަރުޢީ ހަމަތަކުން ބޭރުން، މީހަކު މަރާލުމަކީ ދުވަހަކުވެސް ގަބޫލުކުރެވޭނެ ކަމެއް ނޫންކަމަށާއި ކޮންމެ ގޮތަކަށް ކަމެއް ކުރިޔަސް ބަޔަކު ނިކުމެ މީހަކު މަރާލުމަކީ އިސްލާމްދީން ހުއްދަކުރާ ކަމެއް ނޫންކަމަށެވެ.

"މިއީ އެމްޑީޕީގެ ރަސްމީ ސްޓޭންޑް ތޯ؟ އެހެންނަމަ މިއީ ދިރިހުރުމުގެ ހައްގު ހިމެނޭ ގޮތަށް މީހުންގެ އަސާސީ ހައްގުތަކަށް ތެދުވި އެމްޑީޕީއެއް ނޫން." އޭނާ ވިދާޅުވެފައިވެއެވެ.

ކުރީގެ ރައީސް މުހައްމަދު އަމީން ދީދީ "ހަވަރަށް ދިން" ފަދައިން ރައީސް ޑރ. މުހައްމަދު މުއިއްޒަށް ވެސް އެހެން ހަދަން ޖެހިދާނެ ކަމަށް ބުނެ އިދިކޮޅު އެމްޑީޕީގެ ޖަލްސާއެއްގައި އެމަނިކުފާނަށް އިންޒާރުދިން މައްސަލައެއް ފުލުހުން އަންނަނީ ތަހްގީގުކުރަމުންނެވެ.

ގާނޫނުއަސާސީގެ ދިފާއުގައި" ނަމުގައި އެމްޑީޕީން ރޭ ހދ. ކުޅުދުއްފުށީގައި ބޭއްވި ޖަލްސާގައި ވާހަކަ ދެއްކި އަބްދުއްރަހްމާން އިސްމާއިލް ކިޔާ މީހަކު ވަނީ ސަރުކާރަށް ފާޑުކިޔައި މުހައްމަދު އަމީނަށް ހެދިހެން ހަދަން ޖެހޭ ކަމަށް ބުނެ އިންޒާރުދީފައެވެ.

އެމްޑީޕީން މީގެކުރިން ވެސް ސީދާކޮންނާއި ނުސީދާކޮށް ރައީސް މުއިއްޒަށް އެކި ބާވަތުގެ އިންޒާރު ދީފައިވެއެވެ. މީގެކުރިންވެސް ވެރިކަމުގައި ތިއްބަވާ ބޭފުޅުންނަށާއި، މަތީ މަގާމުތަކުގައި ތިއްބަވާ ބޭފުޅުންނަށް އިންޒާރު ދިނުމަކީ އެމްޑީޕީ ތެރޭގައި އާންމު ކަމެކެވެ.