ޓްރަމްޕް ރައީސްކަމާ ހަވާލުވުމުގެ ކުރިން ޣައްޒާގެ ހަނގުރާމަ ނިމުމަކަށް އަތުވެދާނެކަމަށް ޤަތަރުގެ ބޮޑުވަޒީރު މުޙައްމަދު ބިން އަބްދުއްރަޙްމާން ބިން ޖާސިމް އާލް ޘާނީ ވިދާޅުވެއްޖެއެވެ.
ދޯހާ އަހަރީ ފޯރަމްގައި ވާހަކަފުޅު ދައްކަވަމުން ބޮޑުވަޒީރު ވިދާޅުވީ، ޣައްޒާގެ ސުލްހައިގެ މަޝްވަރާތަކަށް އަލުން ހަލުވިކަމެއް އައިސްފައިވާ ކަމަށާއި، މިހާރު އޮތީ މައިގަނޑު ދެ މައްސަލައެއް ކަމަށެވެ. އެއީ އިޒްރާއީލްގެ މުޖާހިދުން ދޫކޮށްލުމާއި ބަދަލުގައި ހައްޔަރުކޮށްފައިވާ ރަހީނުން ދޫކޮށްލުމުގެ މައްސަލައާއި، ހަނގުރާމަ ނިންމުމުގެ ޢަޒުމް ހުރިތޯ ބެލުމެވެ.
ބޮޑުވަޒީރު ވިދާޅުވީ، އިންތިޚާބަށްފަހު މި މަސައްކަތަށް އަލުން ހީވާގިކަމެއް އައިސްފައިވާކަން ފާހަގަކުރެވޭ ކަމަށެވެ. އަދި ޓްރަމްޕްގެ އެޑްވައިޒަރުންގެ ފަރާތުން ވެސް މަޝްވަރާތަކުން ހައްލެއް ހޯދުމަށް މަސައްކަތްކުރާނެކަމުގެ ޔަޤީންކަން ލިބިފައިވާ ކަމަށް ވިދާޅުވިއެވެ.
ހަމާސްއާއި އިޒްރާއީލާ ދެމެދު އޮތް ހިޔާލުތަފާތުވުންތައް މާބޮޑު ނޫންކަމަށް ބޮޑުވަޒީރު ވިދާޅުވިއެވެ. އަދި މަޝްވަރާތައް ސިއްރުކޮށްގެން ކުރިއަށް ގެންދިއުމަށް މަސައްކަތްކުރަމުންދާ ކަމަށާއި، އެއީ ކުރީގައި ހުރިހާ ކަމެއް ހާމަކުރުމުގެ ސަބަބުން މީހުންނަށް މާޔޫސްކަން ލިބިފައިވާތީ ކަމަށް ވެސް ވިދާޅުވިއެވެ.
"އިންތިޚާބަށްފަހު މި މަސައްކަތަށް އަލުން ހީވާގިކަމެއް އައިސްފައިވާކަން އަޅުގަނޑުމެންނަށް އިހުސާސްކުރެވޭ. ބައެއް ތަފާތުތައް ހުންނާނެ، އެކަމަކު ހަނގުރާމަ ނިންމުމުގެ މަޤްޞަދުގައި އެއްވެސް ތަފާތެއް ނެތްކަން ފާހަގަކުރެވުނު. އެއީ އަޅުގަނޑުމެންނަށް ވަރަށް މުހިންމު ކަމެއް." ބައިޑެނާއި، ޓްރަމްޕްގެ ތަފާތު އަޅާކިޔުއްވަމުން އެމަނިކުފާނު ވިދާޅުވިއެވެ.
ޣައްޒާގެ ހަނގުރާމައަކީ 2023 ވަނަ އަހަރުގެ އޮކްޓޯބަރު މަހުގެ 7 ވަނަ ދުވަހު ފެށުނު، އިޒްރާއީލާއި ހަމާސްއާ ދެމެދު ހިނގަމުންދާ ހަނގުރާމައެކެވެ. މި ހަނގުރާމައިގެ ސަބަބުން ގިނަ އަދަދެއްގެ އާއްމު ރައްޔިތުން މަރުވެ، ޣައްޒާގެ ގިނަ ސަރަހައްދުތަކެއް ވަނީ ވީރާނާވެފައެވެ.
ޤަތަރަކީ މި ހަނގުރާމަ ހުއްޓުވުމަށް މެދުވެރިއެއްގެ ދައުރު އަދާކުރަމުން އަންނަ މުހިންމު ޤައުމެކެވެ.
ޙައްޖާއި ޢުމްރާގެ މަޝްވަރާ ނިންމަވާލެއްވުމަށްފަހު ޑރ. ޝަހީމް ރާއްޖެވަޑައިގެންފި
އަހަރުގެ މިހާތަނަށް އެންމެ ގިނައިން ރިޕޯޓުކޮށްފައި ވަނީ ވައްކަމުގެ މައްސަލަ
އިންޑިއާގައި ޑޮކްޓަރަކު ރޭޕްކުރުން: ފަސް މަސް ފަހުން އެކެއްގެ މައްޗަށް ކުށް ސާބިތުވެއްޖެ
މާލޭގައި ކުރިއަށްގެންދިޔަ ކުރަނގި އޮޕަރޭޝަންގައި 1455 ބިދޭސީންގެ މައުލޫމާތު އެއްކޮށްފި
