ކްރެޑިޓް ރޭޓިންގ ދެމެހެއްޓީ އިގުތިޞާދު ހަމައަކަށް އަޅުވަން ސަރުކާރުން ކުރި މަސައްކަތުން: ފައިސަލް

ބައިނަލްއަގުވާމީ ކްރެޓިޑް ރޭޓިން އޭޖެންސީ "މޫޑީސް" އިން ދިވެހިރާއްޖެއަށް ދީފައިވާ ކްރެޑިޓް ރޭޓިން "ސީއޭއޭ2" ގައި ދެމެހެއްޓީ އިގުތިޞާދު ހަމައަކަށް އަޅުވަން ރައީސް ޑރ.މުހައްމަދު މުއިއްޒުގެ އިސް ނެންގެވުމާއެކު، ސަރުކާރުން ކުރި ބުރަ މަސައްކަތުން ކަމަށް ޓޫރިޒަމް މިނިސްޓަރު އިބްރާހިމް ފައިސަލް ވިދާޅުވެއްޖެ އެވެ.

މިނިސްޓަރ ފައިސަލް މިފަދައިން ވިދާޅުވެފައި ވަނީ މޫޑީސް އިން ރޭޓިން ދަށްނުކޮށް ދެމެހެއްޓުމާ ގުޅިގެން "އެކްސް" ގައި މިއަދު ކުރެއްވި ޕޯސްޓެއްގައެވެ. އެގޮތުން މިނިސްޓަރ ފައިސަލް ވިދާޅުވީ އެކަމުން ދޭހަވަނީ، ރައީސް ޑރ. މުހައްމަދު މުއިއްޒުގެ ސަރުކާރުން އިގުތިޞާދު ހަމައަކަށް އަޅުވަން ކުރި މަސައްކަތް ކަމަށެވެ. މިނިސްޓަރ ވިދާޅުވީ އިގުތިޞާދު ހަރުދަނާކޮށް، ފާގަތި މުސްތަގްބަލެއް ހޯދަން އަޅާ އިސްލާހީ ފިޔަވަޅުތައް ކުރިއަށް ގެންދިއުމުގައި ދެމިތިއްބަވާނެކަމަށެވެ.

މޫޑީސް އިން ރާއްޖޭގެ ރޭޓިން "ސީއޭއޭ2" އަށް ބަދަލުކޮށް އައުޓްލުކް "ރިވިއު" އަށް ލީ މިދިޔަ ސެޕްޓެމްބަރު މަހުގައެވެ. ރޭޓިން ރިވިއު ކުރުމަށްފަހު ރާއްޖޭގެ ރޭޓިން "ސީއޭއޭ2" ގައި ދަމަހައްޓަން އެ އޭޖެންސީ އިން ނިންމީ ރާއްޖޭގެ މާލީ ހާލަތު ކުރިއަށް ވުރެ ހަރުދަނާ ކުރުމަށް އަޅާފައިވާ މުހިންމު ފިޔަވަޅުތަކަަށް ރިއާޔަތްކޮށް ކަމަށް އެއެޖެންސީއިން ބުނެފައިވެއެވެ.

މޫޑީސް އިން މިކަމާ ގުޅިގެން ނެރުނު ބަޔާނުގައި ބުނީ އެމްއެމްއޭ އިން އަލަށް ތައާރަފުކުރި ބޭރު ފައިސާއާ ބެހޭ ގަވާއިދުތަކާއި އަދި ސަރުކާރުން ޓެކްސް އަށް ގެނައި އިސްލާހުތަކުން، ބޭރު ފައިސާގެ ރިޒާވް އިތުރުވުމުގެ ފުރުސަތު ބޮޑު ކަމަށާއި ރޭޓިން ރިވިއު ކުރި މުއްދަތުގެ ތެރޭގައި، ރާއްޖެ އަށް ބޭރު ފައިސާ ހޯދުމުގައި ކާމިޔާބީތަކެއް ހާސިލުވެފައިވާ ކަމަށެވެ

މިދިޔަ ސެޕްޓެމްބަރު މަހު މޫޑިސްއިން ރާއްޖޭގެ ކްރެޑިޓް ރޭޓީން ސީއޭއޭ1 އިން ސީއޭއޭ2 އަށް ބަދަލުކޮށްފައިވާއިރު، އޭގެ ސަބަބެއް ކަމަށް އެ އޭޖެންސީ އިން އޭރު ބުނެފައިވަނީ ނިމިދިޔަ ސަރުކާރުތަކުގައި ނަގާފައިވާ ބޮޑެތި ދަރަނިތައް އިތުރުވެ، ނިމިދިޔަ ސަރުކާރުން ޗާޕުކޮށްފައިވާ 8 ބިލިއަން ރުފިޔާގެ ސަބަބުން ބާޒާރުގައި ދައުރުވާ ދިވެހި ރުފިޔާ އިތުރުވެ، ބޭރު ފައިސާއަށް އޮންނަ ޑިމާންޑް ބޮޑުވެ، އެކްސްޗޭންޖް ރޭޓް ދަމަހައްޓަން ގޮންޖެހުންތައް ކުރިމަތިވުމެވެ.