ފިރިހެން ޑިވިޜަނަށް ކުޅޭ ބީޗް ވޮލީ ލީގާއި ޗެމްޕިއަންޝިޕްގައި ބައިވެރިވާން ހުޅުވާލައިފި

މި ހިނގާ 2024 ވަނަ އަހަރުގެ ޤައުމީ ބީޗް ވޮލީބޯޅަ ލީގާއި ޗެމްޕިއަންޝިޕްގައި މުބާރާތުގައި ބައިވެރިވުމުގެ ފުރުސަތު ވޮލީބޯލް އެސޯސިއޭޝަން އޮފް މޯލްޑިވްސްއިން ހުޅުވާލައިފިއެވެ.

މިއީ މި މަހުގެ 12 ވަނަ ދުވަހުން ފެށިގެން 25 ވަނަ ދުވަހުގެ ނިޔަލަށް ހުޅުމާލެ ރެޑްބުލް ބީޗް ވޮލީ ބޯޅަ ކޯޓުގައި ބާއްވާ މުބާރާތެކެވެ.

ފިރިހެން ޑިވިޜަނަށް ކުޅޭ މި މުބާރާތުގައި ރާއްޖޭގައި ބީޗް ވޮލީ ކުޅޭ އެންމެހާ ފަރާތްތަކަށް ބައިވެރިވެވޭނެއެވެ.

މި މުބާރާތުގައި ބައިވެރިވުމުގެ އެންމެ ފަހު ތާރީހަކީ މި މަހުގެ ފަސް ވަނަ ދުވަހުގެ މެންދުރު ފަހު 2:00 އެވެ. އަދި ޓީމް ލިސްޓް ހުށަހަޅަންޖެހޭ ސުންގަޑިއަކީވެސް މިއީއެވެ.

މި މުބާރާތުގައި ބައިވެރިވުމުގެ ފޯމާއި ޓީމް ލިސްޓް ހުށަހަޅަން ޖެހޭނީ އެ އެސޯސިއޭޝަނުގެ މެއިލް އެޑްރެސް [email protected] އަށެވެ.

ވޮލީބޯލް އެސޯސިއޭޝަނުން ބުނީ މި މުބާރާތުގެ އަންހެން އަދި ފިރިހެން ޑިވިޒަން ވަކިން ތިން ވަނަ ޓީމާއި ރަނާސްއަޕް ޓީމް އަދި ޗެމްޕިއަން ޓީމް ހޮވާނެކަމަށެވެ.