އީސީ އަދި އޭސީސީ އަށް ވެރިން ޢައްޔަންކުރުމާ ގުޅޭ އިސްލާޙު އާއްމުންގެ ހިޔާލަށް ހުޅުވާލައިފި

ރައީސުލްޖުމްހޫރިއްޔާއަށް އެންޓި ކޮރަޕްޝަން ކޮމިޝަން (އޭސީސީ) އަދި އިލެކްޝަންސް ކޮމިޝަން (އީސީ) ގެ ރައީސްއާއި ނައިބު ރައީސް އައްޔަނު ކުރެވޭ ގޮތަށް ދެ ގާނޫނަށް ހުށަހަޅާ އިސްލާހުގެ ދެ ބިލަށް އާންމުންގެ ހިޔާލު ހޯދަން ހުޅުވާލައިފި އެވެ.

އޭސީސީގެ ގާނޫނަށް އިސްލާހު ގެނައުމުގެ ބިލު ރައްޔިތުންގެ މަޖިލީހަށް ސަރުކާރުގެ ފަރާތުން ހުށަހެޅުއްވީ ފެލިދޫ ދާއިރާގެ މެންބަރު އާދަމް ޒާހިރެވެ. އަދި އީސީގެ ގާނޫނަށް އިސްލާހު ގެނައުމުގެ ބިލު ސަރުކާރުގެ ފަރާތުން ހުށަހެޅުއްވީ ކެލާ ދާއިރާގެ މެންބަރު އަބްދުﷲ ޝަރީފެވެ.

މަޖިލީހުގެ އިދާރާއިން މިއަދު ވަކިވަކިން ކުރި ދެ އިއުލާނެއްގައި ވަނީ ދެ ބިލާ ގުޅޭގޮތުން އާންމުންގެ ހިޔާލު ހޯދުމަށް ހުޅުވާލާފައިވާކަމަށާއި، ހިޔާލެއް އޮތްނަމަ އެކަން މަޖިލީހުގެ އިދާރާއަށް ލިއުމުން ހުށަހެޅުމަށެވެ. ހިޔާލު ހުށަހެޅުމުގެ ފުރުސަތު ހުޅުވާލާފައިވަނީ މިއަދުން ފެށިގެން މި މަހުގެ 12 ވަނަ ދުވަހުގެ ނިޔަލަށެވެ.

މަޖިލިހަށް ހުށަހަޅާފައިވާ ބިލުތަކުގައި ބަޔާންކޮށްފައި ވާގޮތުން، އިސްލާހުތައް ގެންނަނީ މުސްތަގިއްލު ކޮމިޝަންތަކުގެ ހިންގުން ހަރުދަނާކޮށް، ކޮމިޝަންތަކަށް އައްޔަނުކުރާ މެންބަރުންގެ ތެރެއިން އެ ކޮމިޝަންގެ ރައީސް އާއި ނައިބު ރައީސްގެ މަގާމަށް މެންބަރުން އައްޔަނުކުރުމުގައި އަމަލުކުރަމުން އަންނަ އުސޫލު އެއްހަމަ ކުރުމަަށެވެ.

އެ ދެ ބިލުގެ ބަހުސް ނިންމައި، އިތުރަށް ދިރާސާކުރުމަށް މަޖިލީހުގެ މިނިވަން މުއައްސަސާތަކާ ބެހޭ ކޮމިޓީއަށް ފޮނުވީ އިއްޔެ އެވެ.

މިހާރު ގާނޫނުގައި އޮންނަނީ އޭސީސީ އާއީ އީސީގެ މެންބަރުންގެ މެދުގައި ނަގާ ވޯޓަކުން އެ ދެ ކޮމިޝަނުގެ ރައީސް އާއި ނައިބު ރައީސް ހޮވާ ގޮތަށެވެ.