ނިޝާން އަސްކަރީގެ ވެރިކަމު އިއްޒަތް ޚާއްސަ ކުރެއްވީ 3 ނޮވެމްބަރުގެ ސިފައިންނަށް

މި އަހަރުގެ ނަސްރުގެ ދުވަހު ރައީސުލްޖުމްހޫރިއްޔާ އެރުވި ނިޝާން އަސްކަރީގެ ވެރިކަމުގެ އިއްޒަތް ޚާއްސަކުރައްވާނީ 3 ނޮވެމްބަރުގައި އޭނާގެ ކޮމާންޑު ކަމުގެ ދަށުން މަސައްކަތް ކުރެއްވި ސިފައިންނަށް ކަމަށް މޭޖާ ޖެނެރަލް ރިޓަޔާޑް މޫސާ އަލީ ޖަލީލް ވިދާޅުވެއްޖެއެވެ.

މޫސާ އަލީ ޖަލީލް ކުރެއްވި ޕޯސްޓެއްގައި ވިދާޅުވީ 3 ނޮވެންބަރު 1988 ވަނަ ދުވަހު ރާއްޖޭގެ މިނިވަންކަން ނަގައިލުމަށް ދިން އުދުވާނީ ހަމަލާގައި އޭނާގެ އޭނާގެ ކޮމާންޑުކަމުގެ ދަށުން މާލެ މަގުމައްޗަށް ޕެޓްރޯލްކުރަން ހިތްވަރުގަދަ ސިފައިންތަކެއް ނުކުންނެވި ކަމަށެވެ.

(ރިޓަޔަރޑް) މޫސާ ޢަލީ ޖަލީލަށް މި ޢިއްޒަތް އެރުވުމަށް ރައީސް މުޢިއްޒު ކަނޑައެޅުއްވީ، ދިވެހި ޤައުމާއި ރައްޔިތުންގެ ސަލާމަތަށްޓަކައި ޢަސްކަރީ ގޮތުން ކުރެއްވި އަގުހުރި ޚިދުމަތްތަކާއި، ޤައުމުގެ އިސްތިޤްލާލާއި ސިޔާދަތު ރައްކާތެރިކޮށް ދެމެހެއްޓުމަށްޓަކައި ކޮށްދެއްވި މަސައްކަތްޕުޅުތަކާއި، ޚާއްޞަކޮށް، 1988 ނޮވެންބަރު މަހުގެ 3 ވަނަ ދުވަހު ރާއްޖެއަށް ކުރިމަތިވި ނުރައްކާތެރި ޢުދުވާނީ ޙަމަލާއާ ގުޅިގެން، ދިވެހި ޤައުމާއި ރައްޔިތުންގެ ދިފާޢުގައި ކުރެއްވި މަތިވެރި ޖިހާދުގެ އަގު ވަޒަންކުރެއްވުމުގެ ގޮތުންނެވެ.

މޫސާ ޢަލީ ޖަލީލްވަނީ 39 އަހަރަށް ވުރެ ދިގު މުއްދަތަކަށް ދިވެހިރާއްޖޭގެ ޤައުމީ ދިފާޢީ ބާރަށް ކޮށްދެއްވި ޚިދުމަތުގެ އަގުވަޒަންކޮށް ނިޝާން ޢަސްކަރީގެ ވެރިކަމުގެ ޢިއްޒަތް އެރުވިކަމަށްޓަކައި އޭނާ ވަނީ ރައީސް ޑރ. މުހައްމަދު މުއިއްޒު އަށާއި ޑިފެންސް މިނިސްޓަރު ޣައްސާން މައުމޫނަށް ޝުކުރު އަދާކުރައްވާފައެވެ.

ނިޝާން އަސްކަރީގެ ވެރިކަން (ނ.އ.ވ) މިއީ ގައުމާއި ރައްޔިތުންގެ ސަލާމަތަށްޓަކައި އަސްކަރީގޮތުން ސިފައިން ކުރާ ހިދުމަތަށާއި، ގައުމެއްގެއިސްތިގްލާލާއި ސިޔާދަތު ރައްކާތެރިކުރުމުގެ ގޮތުން ހާއްސަ މުހިންމު ހިދުމަތްތަކެއް ކޮށްފައިވާ މީހުންނަށާއި، ބައިނަލްއަގްވާމީ ފެންވަރެއްގައި އަސްކަރީގޮތުން ވިޔަސް، ހިދުމަތްކޮށްފައިވާ މީހުންނަށް ދެވޭ އިއްޒަތެކެވެ.

ޖިހާދުގެ ރަތް މެޑަލާއި ދިގުމުއްދަތެއްގައި ޚިދުމަތް ކުރުމުގެ މެޑަލްވެސް މޫސާ އަލީ ޖަލީލް އަށް މީގެކުރިން ވަނީ ލިބިފައެވެ.