ޤައުމަށް އާމްދަނީ ލިބޭނެ އެތައް މަގެއް ފަހިވަމުންއެބަދޭ: ނައިބު ރައީސް

ދިވެހިރާއްޖެއަށް އާމްދަނީ ލިބޭނެ އެތައް މަގެއް މިއަދު ފަހިވަމުންދާކަމަށް ރައީސުލްޖުމްހޫރިއްޔާގެ ނައިބު އަލްއުސްތާޛު ހުސައިން މުޙައްމަދު ލަޠީފް ވިދާޅުވެއްޖެއެވެ.

"ހަށިހެޔޮ ރާއްޖެ" ޕްރޮގްރާމް ފެށުމަށްޓަކައި ކުޅުދުއްފުށި ސިޓީގައި ބޭއްވި ރަސްމިއްޔާތު ޝަރަފުވެރިކޮށްދެއްވައި ވާހަކަފުޅުދައްކަވަމުން ނައިބު ރައީސް ވިދާޅުވީ ރައްޔިތުންގެ ހަށިހެޔޮކަމާއި ދުޅަހެޔޮކަމަކީ ރައީސް ޑރ. މުޙައްމަދު މުޢިއްޒު ޚާއްސަ އިސްކަމެއްދެއްވާކަމެއް ކަމަށެވެ.

ނައިބު ރައީސް ވިދާޅުވި ގޮތުގައި ރައީސްގެ އެންމެ ބޮޑު އެއް އަމާޒަކީ ރާއްޖޭގެ އިގްތިޞާދު ވެއްޓެމުންދިޔަ ފުން އަނދަވަޅުން ސަލާމަތްކުރުންކަމަށެވެ. އެގޮތުން މިއަދު އިގްތިޞާދު ކުރިއެރުވުމަށް ކާމިޔާބު މަސައްކަތްތަކެއް ފެށި، ކަންކަން ހަމަމަގަށް އެޅެމުންދާކަމަށް އެމަނިކުފާނު ފާހަގަކުރެއްވިއެވެ.

ނައިބު ރައީސް ވިދާޅުވީ ޤައުމު މި ހާލަތައް ވެއްޓުނީ ރައްޔިތުންގެ ފައިދާ ނަހަމަގޮތުގައި ބަޔަކު ހިފުމުން ކަމަށެވެ. އަދި އިގްތިޞާދީ ކުރިއެރުން ލިބޭވަރަކުން ރަށްރަށުގައި މިހާރު ނުނިމި ހުރި މަޝްރޫޢުތައް ނިންމައި، އާ މަޝްރޫޢުތައް ވެސް ފެށިގެންދާނެކަމަށް ނައިބު ރައީސް ފާހަގަކުރެއްވިއެވެ.

މީގެއިތުރުން، ރައީސް ޑރ. މުޢިއްޒަކީ ޤައުމަށް އިޚުލާސްތެރި ތެދުވެރި ބޭފުޅެއް ކަމަށާއި، އެމަނިކުފާނުގެ ވަޢުދުފުޅާއެއްގޮތަށް ކުޅިވަރުގެ ވަޞީލަތްތައް ޤާއިމްކޮށްދިނުމުގެ މަސައްކަތްތައް ކުރަމުންދާކަމަށް ނައިބު ރައީސް ވިދާޅުވިއެވެ.

އެމަނިކުފާނު އިތުރަށް ވިދާޅުވީ ދުޅަހެޔޮ ސިއްޙަތެއްގައި ދެމިހުރުމަށްޓަކައި ހެލިފެލިވެ އުޅުމާއި ކަސްރަތުކުރުމަކީ މުހިންމުކަމެއް ކަމަށެވެ. އެހެންކަމުން ފުރުސަތު ހޯދައިގެން މިކަމަށް މަސައްކަތް ކުރުމުގެ މުހިއްމުކަމުކގެ މައްޗަށް ނައިބު ރައީސް އަލިއަޅުއްވައިލެއްވިއެވެ.

"ހަށިހެޔޮ ރާއްޖެ" ޕްރޮގްރާމް ރާއްޖޭގެ އެކި ސަރަޙައްދުތަކުގައި ކުރިއަށްދާނެކަމަށާއި، މި ޕްރޮގްރާމްގެ ޓްރެއިނަރުންނަށް ލިބޭ މަޢުލޫމާތުގެ ސަބަބުން އޭގެ ފައިދާ ރައްޔިތުންނަށް އެންމެ ފުރިހަމަ ގޮތުގައި ލިބޭނެކަމަށް އުއްމީދުކުރައްވާކަމަށް ނައިބު ރައީީސް ވިދާޅުވިއެވެ.