އިޒްރާއީލުން ޣައްޒާގައި ހިންގަމުންދާ ގަތުލުއާންމުގައި މިއަދު އިތުރު 17 މީހަކު ޝަހީދުކޮށްލައިފިއެވެ.
ޣައްޒާ ސިއްހަތާބެހޭ މިނިސްޓްރީން ނެރުނު ބަޔާނުގައި ވާ ގޮތުގައި، އިޒްރާއީލުން ޣައްޒާއަށް ދެމުންގެންދާ ހަމަލާތަކުގައި ފަލަސްތީނުން އިތުރު 17 މީހަކު ޝަހީދުކޮށްފައިވާއިރު، މިއާއެކު މިދިޔަ އަހަރުން ފެށިގެން މިހާތަނަށް ޝަހީދުވި މީހުންގެ އަދަދު 43،391 އަށް ވަނީ އަރައިފައެވެ.
އެ މިނިސްޓްރީން އިތުރަށް ބަޔާންކުރެއްވި ގޮތުގައި، މި ހަމަލާތަކުގައި މިހާތަނަށް 102،347 މީހުން ޒަޚަމުވެފައިވެއެވެ. އަދި ވޭތުވެދިޔަ 24 ގަޑިއިރުގެ ތެރޭގައި އާއިލާތަކަށް އަމާޒުކޮށް ދިން ތިން ހަމަލާއެއްގައި 17 މީހުން ޝަހީދުވެ، 86 މީހުން ޒަޚަމުވެފައިވެއެވެ.
މީގެ އިތުރުން، ގިނަ އަދަދެއްގެ މީހުން ވަނީ ސަލާމަތްކުރާ ފަރާތްތަކަށް ވާސިލެނުވެވި، ވީރާނާވެފައިވާ އިމާރާތްތަކުގެ ދަށުގައާއި މަގުމަތީގައި ތާށިވެފައެވެ.
މިދިޔަ އަހަރު ހަމާސްއިން ދިން ހަމަލާއަކަށްފަހު، އިޒްރާއީލުން ވަނީ ޣައްޒާއަށް ވަރަށް ވަރުގަދަ ނުރައްކާތެރި ހަމަލާތަކެއް ދޭން ފަށާފައެވެ.
އެމެރިކާއާއި، މިސްރާއި، ޤަޠަރުން މެދުވެރިވެގެން ހަނގުރާމަ ހުއްޓުވުމަށާއި، ގައިދީން ދޫކޮށްލުމަށް މަސައްކަތްކުރި ނަމަވެސް، އިޒްރާއީލުގެ ބޮޑުވަޒީރު ބެންޖަމިން ނަތަންޔާހޫ ހަނގުރާމަ ހުއްޓުވުމަށް އިންކާރުކުރުމާ ގުޅިގެން މި މަސައްކަތްތައް ވަނީ ނާކާމިޔާބުވެފައެވެ.
މީގެ އިތުރުން، ޣައްޒާގައި އިޒްރާއީލުން ހިންގަމުންދާ ޢަމަލުތަކާ ގުޅިގެން، ބައިނަލްއަޤްވާމީ ޢަދުލުގެ ކޯޓުގައި އިޒްރާއީލުގެ މައްޗަށް ނަސްލު ނައްތާލުމުގެ ދަޢުވާއެއް އުފުލިފައިވެއެވެ.
ކުރުދީ ހަނގުރާމަވެރިންގެ ބޮޑު ބިންގަރާހެއް ސީރިއާއިން ހޯދައިފި
އަލިފާނުގެ ހާދިސާއާ ގުޅިގެން ރެެހެންދި އެވޯޑު ހަފްލާ ފަސްކޮށްފި
އިޔާދަކުރަނިވި ހަކަތައިގެ ލަނޑުދަނޑިތައް ހާސިލްކުރަން އެހީ ބޭނުންވޭ: ޒަމީރު
އޮންލައިންކޮށް ހުށަހަޅާ ޕާސްޕޯޓުތައް ހުޅުމާލެއިން ނެގޭނެ އިންތިޒާމް ހަމަޖައްސައިފި
