މޯލްޑިވިއަންގެ ވައިޑް ބޮޑީ ބޯޓު، މި އަހަރު ނިމުމުގެ ކުރިން ރާއްޖެ އަންނާނެ: މިނިސްޓަރު އަމީން

ރާއްޖޭގެ ގައުމީ އެއާލައިން މޯލްޑިވިއަން ގެ ވައިޑް ބޮޑީ ބޯޓު، މި އަހަރު ނިމުމުގެ ކުރިން ރާއްޖެ އަންނާނެ ކަމަށް ޓްރާންސްޕޯޓް އެންޑް ސިވިލް އޭވިއޭޝަން މިނިސްޓަރު މުހައްމަދު އަމީން ވިދާޅުވެއްޖެ އެވެ.

މިނިސްޓަރު މިފަދައިން ވިދާޅުވީ މިއަދު ކުރިއަށް ގެންދިޔަ ނޫސްވެރިންގެ ބައްދަލުވުމުގައެވެ. އެ ބައްދަލުވުމުގައި މިނިސްޓަރު ވިދާޅުވީ މޯލްޑިވިއަން ގެ ވައިޑް ބޮޑީ ބޯޓުގެ ހުރިހާ ކަމެއް ނިމި، މިހާރު އޭގެ ރިފާރނިޝްމެންޓް ޕްރޮސެސް ފެށިގެން ލިވަރީ ޕެއިންޓަށް މިމަހުގެ ކުރިޔަށް އޮތް 6 ދުވަހުގެ ތެރޭގައި ވަންނާނެ ކަމަށާއި ޝެޑިއުލްއާ އެއްގޮތަށް މިއަހަރު ނިމުމުގެ ކުރިން ރާއްޖެ އަންނާނެ ކަމަށެވެ.

ރައީސްގެ ވައުދުފުޅާ އެއްގޮތަށް ޗައިނާ އަދި ޔޫރަޕްގެ ބައެއް ޑެސްޓިނޭޝަންތަކަށް ޑައިރެކްޓް ފްލައިޓްތައް ފަށާނެ ކަމަށާއި ދަތުރުތައް އެކްސްޕޭންޑް ވާވަރަކަށް ހުރިހާ ޑެސްޓިނޭޝަނެއް އެއްބޯޓަކުން ނުފެށޭނެ ކަން މިނިސްޓަރު ފާހަގަކޮށްފިއެވެ.

މީގެ އިތުރުން މިނިސްޓަރު ވިދާޅުވީ 2025 ވަނަ އަހަރު ފެށޭއިރު މި ޚިދުމަތްތައް ރާއްޖޭގެ ޓޫރިޒަމަށް ކޮންޓްރިބިއުޓް ކުރާނެ ކަމަށާއި، ކުދި ވިޔަފާރިތައްވެސް މީގެ ތެރޭގައި ހިމެނިގެންދާނެ ކަމަށެވެ. އަދި އިކޮނޮމިކް ކޮންޓްރިބިއުޝަން ވަރަށް ބޮޑަށް ފުޅާވެގެންދާނެ ކަމަށާއި، މިގޮތަށް ބޮޑެތި ސިޓީތަކަށް ޑައިރެކްޓް ބޯޓު ދުއްވުމަކީ ހަމައެކަނި އެއަރލައިންގެ ވިޔަފާރިއަށް ނޫން، ކުދިކުދި ވިޔަފާރިތައް އުފެދޭ ކަމެއް ކަމަށް ވެސް މިނިސްޓަރު ވިދާޅުވިއެވެ.