ކުޑަކުއްޖަކު މަރާލި މައްސަލާގައި އިންޑިއާގެ ދެމަފިރިއަކު ހައްޔަރުކޮށްފި

15 އަހަރުގެ ކުޑަކުއްޖަކު މަރާލި މައްސަލައެއްގައި އިންޑިއާގެ ދެމަފިރިއަކު ހައްޔަރުކޮށްފިއެވެ.

އިންޑިއާގެ ޗެންނާއީގައި 15 އަހަރުގެ އަންހެން ކުއްޖަކަށް ރަޙުމުކުޑަކޮށް އަނިޔާކޮށް މަރާލާފައި އޮއްވާ ފެނުނީ ހައްޔަރު ކުރެވުނު ދެމަފިރިން ދިރިއުޅޭ ގޭގެ ފާޚާނާ ތެރެއިންނެވެ. މަރާލާފައި އޮއްވާ ފެނުނު އަންހެންކުއްޖާއަކީ އެގޭގައި މަސައްކަތްކުރަން އުޅުނު ކުއްޖެއްކަމަށް ޗެންނާއީގެ ފުލުހުން ވަނީ ބުނެފައެވެ.

އިންޑިއާގެ ފުލުހުން ބުނިގޮތުގައި އަންހެންކުއްޖާ މަރާލުމުގެ ކުރިން ރަޙުމުކުޑަ އަނިޔާތަކެއް ކޮށްފައިވެއެވެ. މިގޮތުން އިސްތިރި ހޫނުކޮށްފައި ޖެއްސުމާއި ހަށިގަނޑުގެ އެކި ތަންތަނަށް ސިގިރޭޓް ނިއްވާފައި ހުރިކަން ހަށިގަނޑުން ފާހަގަވާކަމުގައި ފުލުހުން ބުނެފައިވެއެވެ.

މި ދެމަފިރިން ހައްޔަރުކޮށްފައިވަނީ ދިރިއުޅޭ ގެ ދޫކޮށް ފިލައިގެން އެހެން ގެއެއްގައި އުޅެނިކޮށެވެ. އަދި ތުހުމަތު ކުރެވޭ ގޮތުގައި އަންހެންކުއްޖާއަށް އަނިޔާކުރަނިކޮށް މަރުވުމުން ފާޚާނާތެރެއަށް ދޫކޮށްލާފައި މި ދެމީހުން ބިރުން ދިޔައީއެވެ.

މިމައްސަލާގައި އިތުރު 4 މީހަކު ހައްޔަރުކޮށްފައިވާއިރު، އަންހެންކުއްޖާގެ ޕޯސްޓްމޯޓަމް ހެދުމަށް ފޮނުވާފައިވާކަމަށާއި އަންހެންކުއްޖާގެ މަރުގެ ސަބަބު ޕޯސްޓްމޯޓަމްގެ ފަހުގައި ދެނެގަނެވޭނެކަމަށް ފުލުހުން ބުނެއެވެ.