ވަގަށްނަގާފައިވާ ގިނަ ސިގިރޭޓާއި އެކު މީހަކު ހައްޔަރުކޮށްފި

ވަގަށް ނަގާފައިވާ ގިނަ އަދަދެއްގެ ސިގިރޭޓައި އެކު މީހަކު ހައްޔަރުކޮށްފިއެވެ.

މޯލްޑިވްސް ޕޮލިސް ސަރވިސްއިން ހާމަކުރި ގޮތުގައި ނޮވެންބަރު 2 ވަނަ ދުވަހު މާލެސިޓީ އޮލިމްޕަސް ކައިރިން ދަބަސްތަކަކާއި ކޮތަޅުތަކެއް ހިފައިގެން ދިޔަ މީހަކާމެދު ޝައްކު ކުރެވިގެން ބަލާ ފާސްކުރިއިރު އޭނާގެ އަތުން 67 ކާޓޫނު ސިގިރޭޓް ފެނިފައިވެއެވެ.

އަދި ޕޮލިހުން ބެލި ބެލުމުން މި ސިގިރޭޓް ތަކަކީ އޯޝަން ނޮކްޓިއަލް ޕވޓ. ލޓޑ އިން ވަގަށް ނަގާފައިވާ ތަކެތިކަން އެނގިފައިވާކަމަށެވެ. އަދި މި ތަކެއްޗާއެކު ހައްޔަރުކުރީ ށ. ފޭދޫ ހިރުނދުމާގެ އަހުމަދު ލުޖެއިން ނަމަކަށް ކިޔާ 24 އަހަރުގެ ދިވެހި ފިރިހެނެއް ކަމަށްވެސް ފުލުހުން ބުނެއެވެ.

ކްރިމިނަލް ކޯޓުން ވަނީ މިމީހާ 5 ދުވަހަށް ބަންދުކުރުމަށް އަމުރުކޮށްފައި ކަމަށާއި މިމައްސަލަ އިތުރަށް ބަލަމުންދާކަމަށްވެސް ފުލުހުން ބުނެއެވެ.