މާލެ ސަރަހައްދުން 1336 މީހަކު ހިލޭ މެޑިކަލް ޗެކަޕް ހައްދައިފި

މާލެ ސަރަހައްދުން 1300 އަށްވުރެ ގިނަ މީހުން ހިލޭ މެޑިކަލް ޗެކަޕް ހައްދާފައިވާކަމަށް މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހިމް ޢަބްދުއްރައްޒާޤު ޙަލީމް ވިދާޅުވެއްޖެއެވެ.

ޕީއެސްއެމް އަށް މައުލޫމާތު ދެއްވަމުން ސީއީއޯ ޙަލީމް ވިދާޅުވެފައިވަނީ، އަހަރަކު ދެފަހަރު އާސަންދަ މެދުވެރިކޮށް މެޑިކަލް ޗެކަޕް ހެދޭ ސްކީމްގެ ދަށުން އައިޖީއެމްއެޗާއި ދަރުމަވަންތަ ހޮސްޕިޓަލާއި ހުޅުމާލެ ހޮސްޕިޓަލް އަދި ވިލިމާލެ ހޮސްޕިޓަލުން މިހާތަނަށް 1336 ފަރާތަކުން މެޑިކަލް ޗެކަޕް ހައްދާފައިވާ ކަމަށެވެ.

ހަލީމް ވިދާޅުވީ، ބަލިވެ އެ ބަލި ބޮޑުވުމުން ފަރުވާ ހޮދަން އައުމަކީ ދެވެހިންގެ އާދައެއްކަމަށެވެ. ނަމަވެސް، މި ސްކީމްގެ ދަށުން އެ ބަލި ބޮޑު ވުމުގެ ކުރިން ނުވަތަ ސިއްހީ ނުރައްކަލަކަށް ހިނގައިދާނެ ހާލަތެއް މެދުވެރިވުމުގެ ކުރިން އެ ބައްޔަކަށް ދުރާލާ ފަރުވާ ކުރަން ފެށިގެންދާނެކަމަށެވެ.

ދިވެހި މުޖުތަމައުއަކީ ސިއްހަތު ރަނގަޅު ބަޔަކު އުޅޭ މުޖުތަމައުއަކަށް ހެދުމަށްޓަކައި ރައީސުލްޖުމްހުރިއްޔާ ޑރ. މުޙައްމަދު މުޢިއްޒު ތައާރަފުކޮށްދެއްވި މި ހިދުމަތުގެ ސަބަބުން، ހަށިގަނޑުގައި ބައްޔެެއް ހުރިނަމަ ދުރާލާ ދެނެގަތުމަށް މަގުފަހިވެގެންދެއެވެ. އަދި ނުރައްކާތެރި ބައްޔެއް ހަށިގަނޑުގައި ދައުރުވާނަމަ، އަހަރަކު ދެފަހަރު ހެދޭ މި ބޮޑީ ޗެކަޕުން، އެ ބައްޔަށް ފަރުވާކުރުމަށްވެސް އެޅުމަށްވެސް ފަސޭހަ ވެގެންދެއެވެ.

ދުޅަހެޔޮ މުޖުތަމައުއެއް ބިނާކުރެއްވުމަށް ރައީސުލްޖުމްހޫރިއްޔާ ޑރ. މުޢިއްޒު ވެވަޑައިގެންފައިވާ ވައުދުފުޅުގެ ދަށުން ސިއްހީ ދާއިރާއިން އެތައް ކަމެއް ކުރައްވާފައިވެއެވެ. އެގޮތުން، ހިލޭ ބޮޑީ ޗެކަޕް ހެއްދޭނެ މަގު ފަހިކޮށްދިނުމުގެ އިތުރުން، އިސްރައްވެހިންނަށް އަމާޒުކޮށްގެން ހިންގާ ސިއްހީ ޕްރޮގްރާމުތަކާއި، އުމުރުން 40 އަހަރުން މަތީގެ ފަރާތްތަކަށް ކެންސަރ ސްކްރީން ކުރެވޭނެގޮތް ހަމަޖައްސައިދެއްވާފަވެއެވެ.