ރާއްޖެއަށް ދިމާވެފައިވާ ތިމާވެށީގެ ގޮންޖެހުންތައް ހައްލުކުރުމާ ބެހޭގޮތުން މަޝްވަރާކޮށްފި

ރާއްޖެއަށް ދިމާވެފައިވާ ތިމާވެށީގެ ގޮންޖެހުންތައް ހައްލުކުރުމާ ބެހޭގޮތުން މަޝްވަރާކޮށްފިއެވެ.

ކޮޕް 16 ގައި ބައިވެރިވެވަޑައިގެން އުޅުއްވަމުން މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު ޠާރިޤް އިބްރާހީމް ވަނީ ޕްލެނެޓްގެ ޗީފް އިމްޕެކްޓް އޮފިސަރ އެންޑްރޫ ޒޮލީއާ ބައްދަލުކުރައްވާ ރާއްޖެއަށް ދިމާވެފައިވާ ތިމާވެށީގެ ގޮންޖެހުންތައް ހިއްސާކުރައްވާފައެވެ. އަދި އެ ގޮންޖެހުންތަކުން އަރައިގަތުމަށް ކުރެވިދާނެ ކަންކަމާއި ބެހޭގޮތުން، މި ބައްދަލުވުމުގައި މަޝްވަރާކުރައްވާފައިވެއެވެ.

އެގޮތުން، ރާއްޖެއަށް ދިމާވެފައިވާ ތިމާވެށީގެ ގޮންޖެހުންތައް ހައްލުކުރުމަށްޓަކައި، ޕްލެނެޓްގެ ސެޓެލައިޓް ޑޭޓާ ބޭނުންކުރެވިދާނެ ގޮތްތަކަށް މި ބައްދަލުވުމުގައި އަލިއަޅުވާލައްވާފައިވެއެވެ. މީގެ ތެރޭގައި، ރާއްޖެއަކީ ބިން ތިރި ރަށްތަކެއްގެ މައްޗަށް އުފެދިފައިވާ ގައުމަކަށްވުމުން، ގޮނޑުދޮށްތައް ގިރަމުންދާ މައްސަލައާއި ގުޅިގެން ކުރިމަތިވެފައިވާ ކަންބޮޑުވުންތައް ހައްލުކުރެވޭނެ ގޮތްތަކާއި، ދިރޭ ތަކެތި ހިމާޔަތްކުރުމާއި ބެހޭގޮތުން މި ބައްދަލުވުމުގައި ވަޒީރު ވާހަކަފުޅުދައްކަވާފައިވެއެވެ.

މީގެ އިތުރުން، ރާއްޖެއަކީ ކުދިޖަޒީރާ ރަށްތަކަކަށް ވުމުން، އެހެން ގައުމުތަކަށް މޫސުމީ ބަދަލުތަކުން އަސަރުކުރާ މިންވަރަށްވުރެ ބޮޑަށް ރާއްޖެއަށް އަސަރުކުރާނެކަމަށާއި، އެކަންކަމުން އަރައިގަތުމަށް ޒަމާނީ ޓެކްނޮލޮޖީގެ ބޭނުން ހިފުމާއިބެހޭގޮތުންވެސް ވަޒީރު ޠާރިޤް ވަނީ މަޝްވަރާކުރައްވާފައެވެ.

އެ ވުޒާރާއިން މައުލޫމާތު ދިންގޮތުގައި ރާއްޖޭގެ ތިމާވެށި ހިމާޔަތްކުރުމަށް ޕްލެނެޓްގެ ސެޓެލައިޓް ޑޭޓާ ބޭނުންކުރުމަށް އެހީތެރެވެދެއްވާނެކަމަށް އެންޑްރޫ ޒޮލީއާ ވަނީ ވިދާޅުވެފައެވެ.