ބެސްޓިނެޓަށް ބަދަލު ދޭން ލަފާދިނީ ކުރީގެ ބަންޑާރަ ނައިބު: އިހުސާން

ރާއްޖެއަށް ގެންނަ ބިދޭސީ މަސައްކަތްތެރިންގެ ޕްރޮސެސް ފުރިހަމަ ކުރުމަށް ބޭނުންކުރާ އެކްސްޕެޓް ސިސްޓަމް ހެދި މޭލޭޝިއާގެ ބެސްޓިނެޓް ކުންފުންޏަށް ބަދަލުދޭން ލަފާ ދިނީ ކުރީގެ ބަންޑާރަ ނައިބު އިބްރާހީމް ރިފްއަތު ކަމަށް ހޯމްލޭންޑް މިނިސްޓަރު އަލީ އިހުސާން ވިދާޅުވެއްޖެއެވެ.

މަޖިލީހުގެ މިއަދުގެ ޖަލްސާގައި ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ވަނީ ބެސްޓިނެޓް ކުންފުނިން އެއްވެސް ދައުވާއެއް ކޮށްފައި ނެތް ކަމެއްގައި ދައުލަތުން ދިގު މުއްދަތަކަށް 6.9 ބިލިއަން ރުފިޔާ ހޭދަވެގެންދާނެ ގޮތަކަށް އެކްސްޕެޓް ސިސްޓަމް ހަވާލުކުރީ ކިހިނެއްތޯ މިނިސްޓަރާ ސުވާލުކުރައްވާފައެވެ.

އެ ސުވާލަށް ޖަވާބު ދެއްވަމުން މިނިސްޓަރު އިހުސާން ވިދާޅުވީ މި ސަރުކާރު އައިއިރު ބެސްޓިނެޓް ކުންފުނިން ކުރީގެ ސަރުކާރުތަކާއެކު އަށް ސިޓީ ބަދަލުކޮށްފައިވާ ކަމަށާއި އެބޭފުޅުންގެ ލޯ ފާމުތަކުން ހަތަރުފަހަރު ދިވެހި ދައުލަތުގެ މައްޗަށް ދައުވާ ކުރުމަށް ފަހު ހަތަރު ފަހަރު ފޮނުވާފައިވާ ކަމަށެވެ.

"އަޅުގަނޑަށް ހީވަނީ ވަރަށް ބޮޑަށް އޮޅިވަޑައިގަތުމެއް ކަންނޭނގެ އިއްޒަތްތެރި މެންބަރަށް މިއޮތީ. އަޅުގަނޑުމެންނަށް ހަވާލުވެގެން ބެލި ބެލުމުން ފެނުނީ މިދިޔަ ސަރުކާރުގައި ހުންނެވި އެޓާނީ ޖެނެރަލްގެ ލަފައެއް މި ކަމަށް ބަދަލު ދިނުމުގެ މަރުހަލާ ފެށްޓުމަށް ކަނޑައަޅުއްވާފައި އޮތް. ހަމައެއާއެކު އޭރުގެ ރައީސުލްޖުމްހޫރިއްޔާ އޮފީހުގެ ސިޓީފުޅެއް އެބަ އޮތް މިކަމާ މެދު ބަދަލު ދިނުމުގެ މަރުހަލާއަށް ދާން ޖެހިދާނެ ކަމަށް، އަދި އެގޮތަށް އަމަލު ކުރުމަށް އިމިގްރޭޝަނާއި އިކޮނޮމިކް މިނިސްޓްރީގެ މައްޗަށް ފޮނުވާފަ،" މިނިސްޓަރު ވިދާޅުވިއެވެ.

އިހުސާން ވިދާޅުވީ އެ ކުންފުންޏާއެކު މިހާރު ހަދާފައިވަ އެއްބަސްވުމުގެ ދަށުން މީގެކުރިން ދައުލަތަށް ލިބެމުން އައީ 600 މިލިއަން ރުފިޔާ ކަމަށެވެ. ނަމަވެސް އެ އަދަދު އިތުރުވެ، 900 މިލިއަން ރުފިޔާ ލިބެމުންދާ ކަން އިހުސާން ވަނީ ފާހަގަ ކުރައްވާފައެވެ.

"ހަމަ ތަނަކު ކުންފުންޏެއް އޮއްވައި އަޅުގަނޑުމެން އެ ކުންފުނި ހޯދައިގެން މިކަން ކުރީކީނޫން. ދައުލަތުގެ މައްޗަށް އަޅުގަނޑުމެންނަށް އޮބިނޯންނަ ވަރުގެ، އެ މީހުން އިމީޑިއޭޓްލީ ކްލެއިމްކޮށްފައި މިވަނީ 15 މިލިއަން ޑޮލަރަށް. އަދި އެއަށްފަހު އޭރުގެ އެ ކޮންޓްރެޓުގެ މުއްދަތުގެ ބާކީއަށް އޮތް އެމީހުންނަށް ގެއްލުންވާ އަދަދަށް ކްލެއިމް ކުރާނެ ކަމަށް ލީގަލް ޑޮކިއުމަންޓޭޝަން އޮވެފައި އޭރުގެ އެޓާނީ ޖެނެރަލްގެ ލަފާފުޅެއް ވެސް އޮވެގެން އަޅުގަނޑުމެން އަމަލުކުރި ގޮތެއް،" އިހުސާން ވިދާޅުވިއެވެ.

އެ ކުންފުންޏާ އެކު އެކްސްޕެޓް ސިސްޓަމް ހަދަން އެއްބަސްވުމެއް ހެދީ، ކުރިން ހަދާފައި އޮތް އެއްބަސްވުން ބާތިލުކުރާނަމަ ބޮޑު ބަދަލެއް ދޭންޖެހޭތީ ކަމަށް މިނިސްޓަރު ވަނީ މީގެކުރިން ވެސް ވިދާޅުވެފައެވެ.

ބެސްޓިނެޓް އާއެކު އެއްބަސްވުމެއްގެ މަސައްކަތް ފެށީ ކުރީގެ ރައީސް އަބްދުﷲ ޔާމީންގެ ވެރިކަމުގައި 2015 ވަނަ އަހަރުގެ ތެރޭގައެވެ. ނަމަވެސް 2019 ވަނަ އަހަރު ރާއްޖެއަށް ބަންގްލަދޭޝް މަސައްކަތްތެރިން އެތެރެކުރުން ހުއްޓުވަން ނިންމުމާއެކު 15 އަހަރުގެ މުއްދަތަށް ހެދި އެއްބަސްވުމަށް އަމަލުކުރުން ހުއްޓުނެވެ.

އެއަށްފަހު މިދިޔަ ސަރުކާރުގައި އެ ކުންފުނިން ވަނީ ދެ ހުށަހެޅުމެއް ހުށަހަޅާފައެވެ. އެއް ގޮތަކީ އެ ކުންފުންޏަށް ލިބުނު 13.7 މިލިއަން ޑޮލަރުގެ ގެއްލުމުގެ ބަދަލު އެވަގުތަށް ދެއްކުމަށްފަހު، 15 އަހަރު ދުވަހަށް ލިބޭ ގެއްލުމުގެ ބަދަލު ފަހުން ދިނުމެވެ. ދެވަނައަށް ހުށަހަޅާފައިވަނީ އެހެން ހިދުމަތްތަކާއެކުގައި ފޮރިން ޕްލޭސްމަންޓް ސިސްޓަމެއް ރާއްޖޭގައި ގާއިމުކުރުމެވެ.

ރަނގަޅަށް ދިރާސާ ކުރުމަށްފަހު ސަރުކާރުން ނިންމާފައިވަނީ އެތައް މިލިއަން ޑޮލަރުގެ ބަދަލެއް ނުދީ އެ ސިސްޓަމް ގާއިމުކުރުމަށް ބެސްޓިނެޓް އާ އެކު އެއްބަސްވުމެއް ހެދުމަށެވެ.