އިންދިރާ ޕްރޮޖެކްޓްސްއިން ރާއްޖޭގައި އެންމެ ބާރަށް ކުރިއަށް ގެންދަނީ މޫނިމާގޭގެ މަސައްކަތް: އިހުސާން

ނިމުނު އެމްޑީޕީ ސަރުކާރުގެ ދުވަސްވަރު ރާއްޖޭގައި ގިނަ އަދަދެއްގެ ޕޮލިސް ސްޓޭޝަން އެޅުމަށް އެއްބަސްވި އިންދިރާ ޕްރޮޖެކްޓްސް ކުންފުނިން ރާއްޖޭގައި ކުރަނީ ކޮންކަމެއްތޯ ބެލިއިރު ފާހަގަކުރެވުނީ ބިގް ނަމަކަށް ކިޔާ ކުންފުނީގެ ހިއްސާ އިންދިރާ ޕްރޮޖެކްޓްސް ކުންފުނިން ގަނެގެން މިހާރު އެންމެ ބާރަށް ކުރިއަށް ގެންދަނީ މޫނިމާގޭގެ މަސައްކަތް ކަމުގައި ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.

ބިކް ކުންފުންޏަކީ ފައްޔާޒް ކުރިން މެނޭޖިން ޑިރެކްޓަރުކަން ކުރި އަދި މިހާރު ވެސް ފައްޔާޒްގެ އާއިލީ މަސްލަހަތު އޮންނަ ކުންފުންޏެކެވެ. މޫނިމާގެ އަކީ ދިގު މުއްދަތަކަށް ނަގައިގެން ފައްޔާޒްގެ އާއިލާ އިން ހަދަމުންދާ ގެއެކެވެ.

ރާއްޖޭގެ ރަށްތަކުގައި 60 ޕޮލިސް ސްޓޭޝަނެއް އަޅަން މަޝްރޫއެއް ހިންގުމަށް އިންދިރާ ޕްރޮޖެކްޓްސް ކިޔާ އިންޑިއާ ކުންފުންޏަކުން ޝައުގުވެރިކަން ފާޅުކުރީ 2019 ވަނަ އަހަރުގެ އޮގަސްޓު މަހުއެވެ. ރައީސް އިބްރާހީމް މުހައްމަދު ސާލިހުގެ ސަރުކާރުން އެކަމަށް އިޖާބަދިންއިރު ޝަރުތަކަށް އޮތީ، އެ ޕްރޮޖެކްޓުގެ 85 އިންސައްތައަށް ފައިނޭންސް ކުރާނީ އިންޑިއާގެ އެގްޒިމް ބޭންކުން ކަމަށެވެ. އަނެއް 15 އިންސައްތަ ރާއްޖޭން ފައިނޭންސް ކުރުމަށް އެއްބަސްވެފައިވާއިރު، އޭރުގެ ސަރުކާރުން ވަނީ އެ ކުންފުންޏަށް 3.6 މިލިއަން ޑޮލަރު ދައްކާފައެވެ.

މަޖިލީހުގެ މިއަދުގެ ޖަލްސާގައި އިނގުރައިދޫ ދާއިރާގެ މެންބަރު އިބްރާހީމް ފަލާހު ވަނީ އެ މަޝްރޫގެ މަސައްކަތަށް ވީ ގޮތެއް ސާފުކުރުމަށް މިނިސްޓަރާ ސުވާލުކުރައްވާފައެވެ.

އެ ސުވާލަށް ޖަވާބު ދެއްވަމުން މިނިސްޓަރު އިހުސާން ވިދާޅުވީ އެ ކުންފުނިން އެންމެ ފުރަތަމަ ޕްރޮޕޯސަލް ހުށަހަޅާފައިވަނީ އޭރުގެ އިކޮނޮމިކް މިނިސްޓްރީ އަށް ކަމަށާއި، އެ މަޝްރޫއު ފުލުހުންނާ ހަމައަށް އައިސްފައިވަނީ އޭގެ ދެ އަހަރު ފަހުން 2021 ވަނަ އަހަރު ކަމަށެވެ.

"60 މިލިއަން ޑޮލަރުގެ ޕްރޮޖެކްޓެއް ކަމަށް ޕްރޮޖެކްޓު ރޭވީ. އެ ޕްރޮޖެކްޓަށް ފައިނޭންސް ކުރާނީ އިންޑިއާގެ އެގްޒިމް ބޭންކުން ކަމަށް ރޭވިގެން އެގްރީމެންޓުތަކުގައި ސޮއިކުރެވިގެން މި މަސައްކަތް ފެށްޓުމަށްޓަކައި ވަރަށް ބާރަށް މަސައްކަތް ކޮށްފައި އޮތްކަން ލިޔެކިޔުންތަކުން ފެންނަން އެބަ އޮތް"، އިހުސާން ވިދާޅުވިއެވެ.

އެއްބަސްވުމާ އެއްގޮތަށް އޭރުގެ ސަރުކާރުން އެ ކުންފުންޏަށް 3.6 މިލިއަން ޑޮލަރު ދީފައިވާކަން ފާހަގަކުރައްވައި މިނިސްޓަރު ވިދާޅުވީ، ނަމަވެސް އެ މަޝްރޫއުގެ އަމަލީ އެއްވެސް މަސައްކަތެއް މިއަދާ ހަމައަށް ފެށިފައި ނުވާކަމަށެވެ. ދައުލަތުގެ ފައިސާ ވީ އެ ކުންފުނީގައި ކަމަށާއި ނަމަވެސް އެ ފައިސާއަށް ހެދި ގޮތުގެ އެއްވެސް ތަފްސީލެއް އެ ކުންފުނިން މިހާތަނަށް ދީފައިނުވާ ކަމަށް ވެސް އިހުސާން ވިދާޅުވިއެވެ.

"އަޅުގަނޑުމެން ދެން ކޮންކަމެއްތޯ އެ ކުންފުނިން ރާއްޖޭގައި ކުރަނީ ބަލާލިއިރުގައި އަޅުގަނޑުމެންނަށް ފާހަގަކުރެވިފައި އެބަ އޮތް ބިގް ނަމަކަށް ކިޔާ ކުންފުނީގެ ޝެއާ އެ ކުންފުނިން ގަނެގެން މިހާރު މޫނިމާގެ ކިޔާ ގެއެއްގެ އިމާރާތް އެ ތަނުން ވަރަށް ބާރަށް ކުރިއަށް ގޮސް ނިމެމުންދާކަން"، މިނިސްޓަރު ވިދާޅުވިއެވެ.

އެމްޑީޕީގެ ވެރިކަން ފެށިގެން 2019 ވަނަ އަހަރު ޕީއެސްއެމް އިން ބިގް ކުންފުންޏަށް 30 މިލިއަން ރުފިޔާ ބަދަލެއްގެ ގޮތުގައި ދިން މައްސަލައެއް ވެސް ފެންމަތިވިއެވެ. އެ ފައިސާ ބޭނުންކުރީ 19 ވަނަ މަޖިލީހުގެ ސުޕަމެޖޯރިޓީ ކާމިޔާބު ކުރުމަށް ކަމަށް ފައްޔާޒް ވަނީ މީގެކުރިން ވިދާޅުވެފައެވެ.

ނަމަވެސް ކުރީ ސަރުކާރުން 30 މިލިއަން ރުފިޔާ ބަދަލުގެ ގޮތުގައި ދީފައިވަނިކޮށް އެ ކުންފުންޏަށް ބަދަލުދިނުމަށް ދަށު ކޯޓުން ކުރި ހުކުމް މި އަހަރުގެ މާޗް މަހު ވަނީ ބާތިލް ކޮށްފައެވެ.