ރާއްޖޭގެ ބަޔޯޑައިވަސިޓީ ހިމާޔަތް ކުރުމަށް ބައިނަލްއަގުވާމީ އެހީ ބޭނުންވޭ: މިނިސްޓަރު

ރާއްޖޭގެ ބަޔޯޑައިވަސިޓީ ހިމާޔަތް ކުރުމަށް ބައިނަލްއަގުވާމީ އެހީ ބޭނުންވާ ކަމަށް ކްލައިމެޓް ޗޭންޖް، އެންވައިރޮމެންޓް އެންޑް އެނާޖީ މިނިސްޓަރު ތާރިގު އިބްރާހިމް ވިދާޅުވެއްޖެ އެވެ.

މިނިސްޓަރު މިފަދައިން ވިދާޅުވީ ކޮޕް 16 ގައި ކޮންވެންޝަން އޮން ބަޔޮލޮޖިކަލް ޑައިވަސިޓީ (ސީބީޑީ) ގެ އެގްޒެކެޓިވް ސެކްރެޓަރީ އަސްޓްރިޑް ޝޯމޭކަރާއި ބައްދަލުކުރެއްވުމަށް ފަހު އެވެ.

ބައްދަލުވުމުގައި ކުންމިން-މޮންޓްރިއަލް ގްލޯބަލް ބަޔޯޑައިވަސިޓީ ފްރޭމްވަކް ތަންފީޒު ކުރުމުގައި ހުރި ކުރިއެރުންތަކާއި ގޮންޖެހުންތަކާ މެދު މަޝްވަރާކުރި ކަމަށް އެ މިނިސްޓްރީ އިން ބުނެފައިވެއެވެ.

ޔޫއެންއީޕީގެ އެގްޒެކެޓިވް ޑިރެކްޓަރު އިންގާ އެންޑަސަން އާއި ވެސް މިނިސްޓަރު ވަނީ ބައްދަލުކުރައްވާފައެވެ. އެ ބައްދަލުކުރެއްވުމުގައި ރާއްޖޭގެ ބަޔޯޑައިވަސިޓީ ރައްކާތެރިކުރުމާއި މޫސުމަށް އަންނަ ބަދަލުތަކާ ގުޅިގެން ކުރެވިދާނެ މަސައްކަތްތަކާ މެދު މަޝްވަރާކުރައްވާފައިވެއެވެ.

ކޮލަމްބިއާގައި ކުރިއަށްދާ ކޮޕް 16 ގައި 196 ގައުމުން ބައިވެރިވާއިރު މި ބައްދަލުވުމުގައި ދިރޭތަކެތީގެ ނަސްލުތައް ހިމާޔަތްކުރުމަށް ކުރާ މަސައްކަތްތައް މޮނިޓަރކުރާނެ ނިޒާމެއް ގާއިމުކުރުމާއި، މި މަސައްކަތަށް ކުރާ ހޭދަ އިތުރުކުރުމާ ގުޅޭ ގޮތުން މަޝްވަރާކުރުމަށް ހަމަޖެހިފައިވާ ކަމަށް އެ މިނިސްޓްރީ އިން ބުނެފައިވެއެވެ.