ސަރުކާރުގެ އެހީގައި މިހާތަނަށް ތިން ކުއްޖަކު ބޯންމެރޯ ފަރުވާ ފުރިހަމަކޮށްފި

ސަރުކާރުގެ އެހީގައި ތެލެސީމިއާ ކުދިންގެ ތެރެއިން ބޯންމެރޯ ޓްރާންސްޕްލާންޓް ހެދުމަށް ފޮނުވި ކުދިންގެ ތެރެއިން ތިން ކުއްޖަކު މުޅީން ފަރުވާ ފުރިހަމަކޮށްފައިވާ ކަމަށް މޯލްޑިވިއަން ބްލަޑް ސާވިސް އިން ބުނެފިއެވެ.

ދައުލަތުގެ މީޑިއާގެ ޕްރޮގްރާމެއްގައި ވާހަކަ ދައްކަވަމުން ބްލަޑް ސާވިސްގެ އެސޯސިއޭޓް ސްޕެޝަލިސްޓް އިން ޕީޑިއަޓްރިކްސް ޑރ. އަހުމަދު އުމަރު ވިދާޅުވީ ސަރުކާރުން ޒަކާތު ފަންޑުގެ އެހީގައި 14 ކުއްޖަކު ބޯންމެރޯ ފަރުވާ އަށް ފޮނުވުމަށް ކަނޑައަޅާފައިވާ ކަމަށެވެ. އަދި މި އަހަރުގެ އެކި ދުވަސްވަރު އެ ހުރިހާ ކުދިން ވެސް ފޮނުވާފައިވާ ކަމަށާއި އޭގެތެރެއިން ތިން ކުދިން ފަރުވާ ފުރިހަމަކޮށްފައިވާ އިރު ދެ ކުއްޖަކު އެނބުރި ރާއްޖެ އައިސްފައިވާ ކަމަށް އޭނާ ވިދާޅުވިއެވެ.

ޒަކާތު ފަންޑުގެ އެހީގައި ކޮންމެ އަހަރަކު 10 ކުދިން، ބޯންމެރޯ ހެދުމަށް ފޮނުވުމަށް ސަރުކާރުން ވަނީ ނިންމާފައެވެ.

ތެލެސީމިއާ ކުދިންނަށް ދެމެހެއްޓެނިވި ގޮތެއްގައި، ހިލޭ ބޯންމެރޯ ހެދޭނެ ގޮތް ހަމަޖައްސަވައި ދެއްވުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ. ރާއްޖޭގައި ތެލެސީމިއާ ކުދިންގެ އަދަދު ގިނައިރު، އެ ކުދިންގެ ފަރުވާއަށް ވެސް ހަރުދަނާ ގޮތްތަކެއް ހަމަޖައްސައިދޭން ޖެހޭ ކަމަށް ރައީސް ގަބޫލުފުޅުކުރައްވައެވެ.