ސަފާރީތަކުން ހުއްދައާ ހިލާފުވާނަމަ ގާނޫނުގައިވާ އެންމެ ހަރުކަށި ފިޔަވަޅު އަޅާނެ: މިނިސްޓަރު

ސަފާރީތަކުގެ ހުއްދައާ ހިލާފުވާނަމަ ގާނޫނީ އެންމެ ހަރުކަށި ފިޔަވަޅު އަޅާނެކަމަށް ހޯމްލޭންޑް ސެކިއުރިޓީ މިނިސްޓަރު އަލީ އިހުސާން ވިދާޅުވެއްޖެ އެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު ވިދާޅުވި ގޮތުގައި، އުސޫލުގައި ބަޔާންކޮށްފައިވާނީ ދިވެހިރާއްޖޭގެ ސަރަހައްދުގައި އޮޕަރޭޓުކުރާ ސަފާރީތަކުން ކަސްޓަމްސްގެ ބޮންޑެޑް ވެއާހައުސްއިން ރާ ނަގައިގެން ޓޫރިޒަމް ވިޔަފާރީގެ ތެރެއިން ރަލުގެ ވިޔަފާރި ކުރެވޭ ގޮތަށެވެ.

އެހެންނަމަވެސް ބައެއް ސަފާރީތަކުގައި އެއާ ހިލާފަށް ރަލުގެ މުއާމަލާތްކުރަމުންދާަ ކަމަށް މިނިސްޓަރު ވިދާޅުވި އެވެ. އެގޮތުން ބައެއް ސަފާރީތަކުން މި ފަހަކަށް އައިސް އެއްވެސް ގެސްޓެއް ނެތި ބަރާބަރަށް ރާ އަރުވާ، އޭގެ ވިޔަފާރިކުރާކަމުގެ މައުލޫމާތު ލިބިފައިވާކަމަށް މިނިސްޓަރު ފާހަގަކުރެއްވި އެވެ.

މިނިސްޓަރު ވިދާޅުވީ ތަފާސްހިސާބުތަކަށް ބެލުމަށްފަހު، ކަސްޓަމްސްއިން މިހާރު ކުރިއަށް ގެންދާ އޮޕަރޭޝަނުގެ ތެރެއިން ކަސްޓަމަށް ރާ ނަގަން އަންނަ ނަމަ އެ އުޅަނދަށް ދީފައިވާ މުއްދަތުގައި ރާ ބޭނުންކުރަމުން ދިޔަ މީހުންގެ އަދަދަކީ ހުއްދަ ދީފައިވާ އަދަދުތޯ ބަލާނެ ކަމަށެވެ.

ރާއްޖޭގައި ގަވާއިދާ ހިލާފަށް ރަލުގެ ވިޔަފާރިި ކުރާ ފަރާތްތަކުން އެކަން ހުއްޓާލަންޖެހޭކަން ފާހަގަކުރައްވައި މިނިސްޓަރު ވިދާޅުވީ، ކަނޑައަޅާފައިވާ ހައްދުތަަކުގެ ބޭރުން ރަލުގެ ވިޔަފާރި ކުރާނަމަ އެ އުޅަނދަކަށް އޭގެ ފަހުން ރާ ދޫކުރުން ހުއްޓާލާނެ ކަމަށެވެ.

މީގެއިތުރުން ކަސްޓަމްސްއިން ރާ ނަގައިގެން ގޮސް ރާއްޖޭގެ އެކި ރަށްރަށަށް އެތަކެތި ބާލާ މައްސަލައަށްވެސް މިނިސްޓަރު އަލިއަޅުއްވާލެއްވި އެވެ. އެގޮތުން ދިވެހިން ހިމެނޭހެން ހުއްދަނޫން ގޮތުގައި ރަލުގެ ވިޔަފާރިކުރާ މަންޒަރު ފެނި އެކަން ސާބިތުވެސް ވެފައިވާ ކަމަށް މިނިސްޓަރު ވަނީ ވިދާޅުވެފަ އެވެ.

މިނިސްޓަރު އިތުރަށް ވިދާޅުވީ ފުލުހުންނާއި ކަސްޓަމްސް ގުޅިގެން އެ މައްސަލަ ހުއްޓުވާނެކަމަށެވެ. އަދި އެފަދަ މައްސަލައަކާ ގުޅިގެން ދޫކޮށްފައިވާ ހުއްދު ހުއްޓުވައިފި ނަމަ އަލުން ހުއްދަ ނުލިބޭނެ ކަމަށް ވެސް މިނިސްޓަރު ވިދާޅުވި އެވެ.